ເຈົ້າໜ້າທີ່ສາທາລະນະສຸກຂອງ ສາທາລະນະລັດ ປະຊາທິປະໄຕ ກົງໂກ ໄດ້ກວດພົບຜູ້ທີ່ສົງໃສວ່າຕິດເຊື້ອອີໂບລາປະມານ 1,000 ຄົນໃນພື້ນທີ່ທີ່ໄດ້ຮັບຜົນກະທົບ, ໂດຍມີ 101 ຄົນມີຜົນກວດເປັນບວກ. ໂຕເລກເບື້ອງຕົ້ນຊີ້ບອກວ່າມີຜູ້ເສຍຊີວິດ 200-220 ຄົນທີ່ກ່ຽວຂ້ອງກັບການລະບາດຄັ້ງນີ້, ໂດຍຜົນການກວດໃນຫ້ອງທົດລອງຢືນຢັນການຕິດເຊື້ອໃນຜູ້ເສຍຊີວິດ 17 ຄົນ.
ໄລຍະເວລາຂອງການລະບາດໃນປັດຈຸບັນແມ່ນຂຶ້ນກັບປະສິດທິພາບຂອງມາດຕະການຕອບໂຕ້ ຊຶ່ງເຈົ້າໜ້າທີ່ກຳລັງວາງແຜນການປະຕິບັດງານຕອບໂຕ້ທີ່ຄາດວ່າຈະໃຊ້ເວລາ 4-6 ເດືອນ. ໂດຍການລະບາດຄັ້ງນີ້ເກີດຈາກເຊື້ອໄວຣັດອີໂບສາຍພັນ Bundibugyo ຊຶ່ງມີຄວາມຮຸນແຮງໜ້ອຍກວ່າເຊື້ອໄວຣັດ Zaire ແຕ່ຍັງຄົງເປັນອັນຕະລາຍຖ້າອັດຕາການຕິດເຊື້ອຍັງສືບຕໍ່ເພີ່ມຂຶ້ນ.
ປັດຈຸບັນ, ຍັງບໍ່ມີວັກຊິນທີ່ໄດ້ຮັບການອະນຸມັດ ຫຼື ການປິ່ນປົວສະເພາະສຳລັບເຊື້ອໄວຣັດອີໂບລາສາຍພັນ Bundibugyo. ໂດຍເຈົ້າໜ້າທີ່ຂອງ ສາທາລະນະລັດ ປະຊາທິປະໄຕ ກົງໂກ ກຳລັງອີງໃສ່ການກວດ, ການທົດສອບ,ການແຍກຕົວ ແລະ ການຕິດຕາມຜູ້ສຳຜັດ, ລວມທັງການມີສ່ວນຮ່ວມຂອງຊຸມຊົນ ແລະ ການຝັງສົບທີ່ປອດໄພເພື່ອຄວບຄຸມການແຜ່ລະບາດຂອງພະຍາດ.
ກ່ອນໜ້ານີ້, ໃນວັນທີ 23 ພຶດສະພາ ຜ່ານມາ, ລັດຖະບານຂອງ ສາທາລະນະລັດ ປະຊາທິປະໄຕ ກົງໂກ ໄດ້ໂຈະຖ້ຽວບິນພົນລະເຮືອນຂາເຂົ້າ - ຂາອອກ ຈາກເມືອງບູເນຍ ຊຶ່ງເປັນເມືອງຫຼວງຂອງແຂວງອີຕູຣີ ແລະ ເປັນຈຸດສູນກາງຂອງການລະບາດ, ແຕ່ຍັງເປີດໃຫ້ຖ້ຽວບິນເພື່ອມະນຸດສະທຳເດີນທາງຕາມປົກກະຕິ.
ທ່ານ ແຄມບາ ກ່າວວ່າ: ໄວຣັດອີໂບລາອາດຈະແຜ່ລະບາດກ່ອນການປະກາດຢ່າງເປັນທາງການໃນວັນທີ 15 ພຶດສະພາ ຜ່ານມາ, ຍ້ອນວ່າໄລຍະຟັກຕົວຂອງໄວຣັດສູງເຖິງ 21 ມື້. ທ່ານກ່າວຕື່ມວ່າ: ເຈົ້າໜ້າທີ່ສາທາລະນະສຸກຍັງບໍ່ສາມາດລະບຸ "ຜູ້ຕິດເຊື້ອຄົນທຳອິດ" ຂອງການລະບາດຄັ້ງນີ້ໄດ້.
ຄໍາເຫັນ