 |
ທ່ານ ພົທ ວັນທອງ ກອງມະນີ ກ່າວວ່າ: ກອງປະຊຸມຄັ້ງນີ້, ສຸດທີ່ມີຄວາມໝາຍສໍາຄັນທີ່ 4 ພາກສ່ວນໄດ້ພ້ອມກັນກວດກາ, ຕີລາຄາ ແລະ ປະເມີນຜົນໃນການເຄື່ອນໄຫວຈັດຕັ້ງປະຕິບັດບົດບັນທຶກກອງປະຊຸມຮ່ວມ 4 ພາກສ່ວນກ່ຽວກັບການດໍາເນີນຄະດີຕາມຂະບວນຍຸຕິທໍາຄັ້ງທີ VII ໃນໄລຍະ 2 ປີຜ່ານມາ ໂດຍສະເພາະແມ່ນການແກ້ໄຂຄະດີ ແລະ ການປະສານງານຕ່າງໆ ເຖິງແມ່ນວ່າສະພາບພາກພື້ນ ແລະ ສາກົນມີຄວາມຜັນແປຢ່າງສະຫຼັບສັບຊ້ອນ, ມີທັງກາລະໂອກາດທີ່ເອື້ອອໍານວຍ ແລະ ສິ່ງທ້າທາຍທົດສອບຫຼາຍປະການເປັນຕົ້ນບັນຫາທາງດ້ານການເມືອງ, ວິກິດການທາງດ້ານເສດຖະກິດການເງິນ ແລະ ການປະທະກັນດ້ວຍອາວຸດຮ້າຍແຮງຢູ່ຕາເວັນອອກກາງ ຊຶ່ງສົ່ງຜົນກະທົບເຖິງລາຄານ້ຳມັນ ແລະ ເສດຖະກິດໂລກ, ການໂຈລະກຳ, ການກໍ່ການຮ້າຍ, ໄພພິບັດທາງທຳມະຊາດ, ພະຍາດລະບາດ ແລະ ບັນຫາອື່ນໆ ແຕ່ເຈົ້າໜ້າທີ່ຕຳຫຼວດ, ໄອຍະການປະຊາຊົນ, ຜູ້ພິພາກສາ ແລະ ພະນັກງານປະຕິບັດຄໍາຕັດສິນຂອງສານກໍໄດ້ສຸມໃສ່ບຸກບືນຜ່ານຜ່າແກ້ໄຂຄະດີໃຫ້ມີຄວາມວ່ອງໄວ, ໂປ່ງໃສ, ຖືກຕ້ອງ ແລະ ຮັບປະກັນຄວາມຍຸຕິທໍາ, ປັບປຸງກົນໄກ, ປະສານງານ ແລະ ການຈັດຕັ້ງໃຫ້ມີຄວາມໜັກແໜ້ນ, ເຂັ້ມ ແຂງ, ມີການຫັນປ່ຽນທີ່ຕັ້ງໜ້າ, ສາມາດເຮັດສຳເລັດຕາມພາລະບົດບາດໜ້າທີ່ຂອງຕົນເພື່ອເປັນການພັດທະນາວຽກງານການດໍາເນີນຄະດີຕາມຂະບວນການຍຸຕິທໍາ, ຍົກສູງການຄຸ້ມຄອງລັດ, ຄຸ້ມຄອງສັງຄົມໃຫ້ຖືກຕ້ອງຕາມລະບຽບກົດໝາຍ ແລະ ຍຸຕິທໍາ ເທື່ອລະກ້າວຕາມທີ່ໄດ້ກຳນົດໄວ້ຢູ່ໃນມະຕິກອງປະຊຸມໃຫຍ່ຄັ້ງທີ XII ຂອງພັກ, ມະຕິກົມການເມືອງສູນກາງພັກເລກທີ 112/ກມສພ ວ່າດ້ວຍການຍົກສູງຄຸນນະພາບການດໍາເນີນຄະດີຕາມຂະບວນຍຸຕິທໍາ ແລະ ມະຕິຄະນະບໍລິຫານງານສູນກາງພັກເລກທີ 037/ຄບສພ ວ່າດ້ວຍການຍົກສູງປະສິດທິພາບໃນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍໃຫ້ເຂົ້າສູ່ລວງເລິກ ແລະ ເປັນຮູບປະທໍາ, ຊອກໃຫ້ເຫັນດ້ານດີເພື່ອເປັນບົດຮຽນໃນການສືບຕໍ່ເສີມຂະຫຍາຍ, ຊອກຮູ້ສິ່ງທີ່ເປັນຂໍ້ຫຍຸ້ງຍາກ, ຂໍ້ຂາດຕົກບົກຜ່ອງເພື່ອພ້ອມກັນຫາວິທີປັບປຸງແກ້ໄຂ, ສ້າງເງື່ອນໄຂເຮັດໃຫ້ການຈັດຕັ້ງ ແລະ ການເຄື່ອນໄຫວວຽກງານຂອງພວກເຮົາໃຫ້ເປັນຮູບປະທຳ ແລະ ມີຄຸນນະພາບສູງຂຶ້ນເທື່ອລະກ້າວ.
ພ້ອມນີ້, ທ່ານ ພົຕ ກອງສະຫວັດ ບຸນລ້ຽງ ກໍາມະການສໍາຮອງສູນກາງພັກ ຮອງລັດຖະມົນຕີ ຫົວໜ້າກົມໃຫຍ່ຕໍາຫຼວດ ກະຊວງ ປກສ ໃຫ້ຮູ້ວ່າ: ໃນໄລຍະການຈັດຕັ້ງປະຕິ ບັດເນື້ອໃນບົດບັນທຶກຮ່ວມ 4 ພາກສ່ວນ ຄັ້ງທີ VII ເປັນເວລາ 2 ປີຜ່ານມາ ສາມາດເຮັດສໍາເລັດໜ້າທີ່ການດໍາເນີນຄະດີຕາມຂະບວນຍຸຕິທໍາ ຄື: ອົງການສືບສວນ-ສອບສວນ ເຈົ້າໜ້າທີ່ຕໍາຫຼວດ ສາມາດມ້າງຄະດີໄດ້ 12,488 ເລື່ອງ ມີຜູ້ຖືກຫາ 19,401 ຄົນ ຍິງ 2.410 ຄົນ ແລະ ຄົນຕ່າງປະເທດ 869 ຄົນ ຍິງ 165 ຄົນ. ໃນນັ້ນ, ມີຄະດີຢາເສບຕິດ ຈໍານວນ 7,470 ເລື່ອງ ຈັບຜູ້ຖືກຫາ ຈໍານວນ 11,345 ຄົນ ຍິງ 824 ຄົນ, ຄົນຕ່າງປະເທດ 440 ຄົນ ຍິງ 72 ຄົນ ແລະ ດໍາເນີນຄະດີສໍາເລັດ 9,917 ເລື່ອງ ຜູ້ຖືກຫາ 14,879 ຄົນ ຍິງ 1,784 ຄົນ ຕ່າງປະເທດ 634 ຄົນ ຍິງ 77 ຄົນ; ອົງການໄອຍະການປະຊາຊົນໄດ້ຄົ້ນຄວ້າ ແລະ ແກ້ໄຂຄະດີອາຍາສຳເລັດ 24,741 ເລື່ອງ; ສານປະຊາຊົນ ສາມາດຕັດສິນຄະດີອາຍາໄດ້ທັງໝົດ 12,308 ເລື່ອງ ແລະ ກະຊວງຍຸຕິທໍາ ສາມາດປະຕິບັດຄຳຕັດສິນຂອງສານສຳເລັດ 4,758 ເລື່ອງ. ໃນນັ້ນ, ສາມາດເກັບກູ້ຊັບສິນ, ວັດຖຸ, ເງິນ-ຄຳ ແລະ ເຄື່ອງຂອງອື່ນໆຄືນໃຫ້ຜູ້ຊະນະຄະດີ ແລະ ຮີບເປັນຂອງລັດ ຕາມປະເດັນຄຳຕັດສິນໄດ້ຢ່າງຄົບຖ້ວນ.
ໃນວາລະກອງປະຊຸມ 4 ພາກສ່ວນ ກ່ຽວກັບການດໍາເນີນຄະດີຕາມຂະບວນຍຸຕິທໍາຄັ້ງນີ້, ຍັງໄດ້ເຊັນບົດບັນທຶກຮ່ວມກັນທາງດ້ານວິຊາການກ່ຽວກັບການຈັດຕັ້ງປະຕິບັດກົດໝາຍ ແລະ ການດໍາເນີນຄະດີ ເພື່ອເປັນບ່ອນອີງໃນການປະຕິບັດໃຫ້ຖືກຕ້ອງ ແລະ ເປັນເອກະພາບໃນການດໍາເນີນຄະດີ ແລະ ການປະຕິບັດກົດໝາຍ.
 |
ໃນໂອກາດນີ້, ທ່ານ ພົອ ວິໄລ ຫຼ້າຄໍາຟອງ ໄດ້ໂອ້ລົມສະແດງຄວາມຍ້ອງຍໍຊົມເຊີຍຕໍ່ຄະນະພັກ- ຄະນະນໍາທັງ 4 ພາກສ່ວນທີ່ໄດ້ເອົາໃຈໃສ່ນຳພາ-ຊີ້ນຳພະນັກງານຂອງຕົນ ສຸມໃສ່ເຮັດວຽກການດຳເນີນຄະດີໃຫ້ມີຄວາມວ່ອງໄວ ແລະ ມີຄຸນນະພາບ, ສາມາດແກ້ໄຂປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ, ເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ. ເພື່ອເປັນການສືບຕໍ່ຮັບປະກັນໃຫ້ວຽກດັ່ງກ່າວ ທ່ານໄດ້ເນັ້ນ 6 ບັນຫາທີ່ສໍາຄັນເພື່ອໃຫ້ຄະນະພັກ-ຄະນະນໍາທັງ 4 ພາກສ່ວນນໍາໄປຈັດຕັ້ງປະຕິບັດເຂົ້າໃນວຽກງານການດໍາເນີນຄະດີຕາມຂະບວນຍຸຕິທໍາໃຫ້ຖືກຕ້ອງຕາມລະບຽບກົດໝາຍ ແລະ ມີປະສິດທິພາບດີຂຶ້ນກວ່າເກົ່າ ຄື:
1. ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານທີ່ຢູ່ໃນຄວາມຮັບຜິດຊອບຂອງຕົນ ກໍຄືເຈົ້າໜ້າທີ່ຕໍາຫຼວດ, ພະນັກງານໄອຍະການປະຊາຊົນ, ຜູ້ພິພາກສາ ແລະ ພະນັກງານປະຕິບັດຄໍາຕັດສິນຂອງສານໃຫ້ມີຈັນຍາບັນ-ຈັນຍາທໍາໃນການປະຕິບັດໜ້າທີ່ຂອງຕົນ, ເນື່ອງຈາກວ່າໃນເງື່ອນໄຂແຫ່ງການປະຕິບັດກົນໄກເສດຖະກິດຕະຫຼາດ, ການເຊື່ອມໂຍງກັບສາກົນບວກໃສ່ກຸ່ມຄົນບໍ່ດີ ແລະ ອິດທິກຳລັງປໍລະປັກໄດ້ດຳເນີນສົງຄາມຫັນປ່ຽນໂດຍສັນຕິ ຊຶ່ງໄດ້ຊັກຈູງໃຫ້ສະມາຊິກພັກ-ພະນັກງານຂອງຈໍານວນໜຶ່ງທີ່ບໍ່ມີຫຼັກໝັ້ນ, ອຸດົມການ, ຂາດຈັນຍາບັນ-ຈັນຍາທໍາ, ສ້າງເງື່ອນໄຂ, ສວຍໃຊ້ຊ່ອງວ່າງຂອງກົດໝາຍ, ກົດໜ່ວງ ການດໍາເນີນຄະດີຊັກຊ້າ, ຫຼົບໄປ-ຫຼົບມາ ແລະ ບໍ່ໄປຕາມກົດໝາຍກໍານົດເພື່ອຫາຜົນປະໂຫຍດສ່ວນຕົວ.
2. ເອົາໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງພັກ, ມະຕິກົມການເມືອງສູນກາງພັກເລກທີ 112/ກມສພ ວ່າດ້ວຍການຍົກສູງຄຸນນະພາບການດໍາເນີນຄະດີຕາມຂະບວນຍຸຕິທໍາ ແລະ ມະຕິຄະນະບໍລິ ຫານງານສູນກາງພັກເລກທີ 037/ຄບສພ ວ່າດ້ວຍການຍົກສູງປະສິດທິພາບໃນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍໃຫ້ເຂົ້າສູ່ລວງເລິກ ແລະ ເປັນຮູບປະທໍາ ໃຫ້ເປັນແຜນງານປະຕິບັດລະອຽດແຕ່ລະດ້ານ, ການສືບ ສວນ-ສອບສວນຈະປັບປຸງແກ້ໄຂດ້ານໃດ ໃຫ້ຖືກເປົ້າໝາຍ, ມີຫຼັກຖານຄົບຖ້ວນຮັດກຸມ ແລະ ຈະເຮັດແນວໃດໃຫ້ສັ່ງຟ້ອງ, ຜູ້ທີ່ໄດ້ກະທຳຜິດແທ້ໃຫ້ສານຕັດສິນຢ່າງເປັນທຳ.
3. ສຸມໃສ່ປັບປຸງກົງຈັກການຈັດຕັ້ງ, ສ້າງພະນັກງານດໍາເນີນຄະດີໃຫ້ມີຄວາມຮູ້-ຄວາມສາມາດ, ມີຄວາມຊ່ຽວຊານ ແລະ ເປັນມືອາຊີບໃນສະເພາະດ້ານ ເພື່ອເຮັດໃຫ້ບັນຫາຂໍ້ຂັດແຍ່ງ ແລະ ການລະເມີດກົດໝາຍທີ່ເກີດຂຶ້ນໄດ້ຮັບການແກ້ໄຂຢ່າງວ່ອງໄວ ແລະ ຖືກຕ້ອງ ເນື່ອງຈາກວ່າການພັດທະນາເສດຖະກິດ-ສັງຄົມ ມີການຂະຫຍາຍຕົວສູງ, ການຄ້າ-ການລົງທຶນໄດ້ເປີດກວ້າງຢູ່ໃນສັງຄົມ; ບັນດາຂໍ້ຂັດແຍ່ງ ແລະ ອາຊະຍາກຳທີ່ເກີດຂຶ້ນ ຄຽງຄູ່ກັບການພັດທະນາ, ມີຄວາມຫຍຸ້ງຍາກ, ສັບສົນ, ສະຫຼັບສັບ ຊ້ອນ ແລະ ພົວພັນກັບຫຼາຍບຸກຄົນ, ຫຼາຍພາກສ່ວນ ທັງຢູ່ພາຍໃນປະເທດ ແລະ ຕ່າງປະເທດ, ພົວພັນກັບກົດໝາຍທັງພາຍໃນປະເທດ ແລະ ກົດໝາຍສາກົນ.
4. ປັບປຸງແບບແຜນ, ກົນໄກການດໍາເນີນຄະດີຢູ່ແຕ່ ລະຂັ້ນຕອນໃຫ້ມີຄວາມວ່ອງໄວ, ໂປ່ງໃສ ແລະ ຖືກຕ້ອງຕາມກົດໝາຍ ໃຫ້ສາມາດກວດສອບໄດ້ທຸກຂັ້ນຕອນການດໍາເນີນຄະດີ, ເຮັດຕາມກົດໝາຍກຳນົດຢ່າງເຄັ່ງຄັດ ແລະ ເຂັ້ມງວດ.
5. ເອົາໃຈໃສ່ໂຄສະນາເຜີຍແຜ່ກົດໝາຍໃຫ້ກວ້າງຂວາງ ແລະ ທົ່ວເຖິງໃນສັງຄົມເພື່ອໃຫ້ປະຊາຊົນຮັບຮູ້, ເຂົ້າໃຈຕໍ່ກົດໝາຍ, ຍົກສູງສະຕິກົດໝາຍຢູ່ໃນສັງຄົມໃຫ້ສູງຂຶ້ນ ໂດຍການເຜີຍແຜ່ໃຫ້ປະຊາຊົນ ແລະ ພາກສ່ວນອື່ນຮັບຮູ້ເຂົ້າໃຈຢ່າງທົ່ວເຖິງ ແນໃສ່ເຮັດໃຫ້ການສ້າງຂໍ້ຜູກພັນ, ສັນຍາຕ່າງໆ ໄປຕາມກົດໝາຍກຳນົດ, ບໍ່ລະເມີດກົດໝາຍ ແລະ ຮັບປະກັນບໍ່ໃຫ້ມີການກໍ່ອາຊະຍາກຳທີ່ຂັດກັບກົດໝາຍຫຼາຍຂຶ້ນ.
6. ເພີ່ມທະວີຄວາມຮັບຜິດຊອບໃນການປະຕິບັດໜ້າ ທີ່ວິຊາສະເພາະຂອງແຕ່ລະພາກສ່ວນໃຫ້ເຂັ້ມງວດຕາມກົດໝາຍ ເພື່ອເຮັດໃຫ້ການດໍາເນີນຄະດີມີຄວາມໂປ່ງໃສ, ວ່ອງໄວ ແລະ ມີຄຸນນະພາບເພື່ອປົກປ້ອງສິດຜົນປະໂຫຍດ ອັນຊອບທຳຂອງລັດ, ຂອງພົນລະເມືອງ, ຮັບປະກັນສິດເສລີພາບ, ກຽດສັກສີ, ສຸຂະພາບ ແລະ ຊີວິດຂອງພົນ ລະເມືອງໃນທຸກຂັ້ນຕອນຂອງການດໍາເນີນຄະດີຕາມຂະບວນຍຸຕິທຳ.
ຂ່າວ: ລັດດາວັນ
ຄໍາເຫັນ