ທ່ານ ລີກ່າວວ່າ: ລະບຽບການຄ້າເສລີກຳລັງມີການປ່ຽນແປງຄັ້ງຍິ່ງໃຫຍ່ ໂດຍເສດຖະກິດໂລກກຳລັງປະເຊີນກັບຄວາມບໍ່ແນ່ນອນທີ່ເພີ່ມຂຶ້ນ ແລະ ການຄ້າ, ການລົງທຶນກຳລັງສູນເສຍແຮງກະຕຸ້ນ. ຂະນະການປະຕິວັດເຕັກໂນໂລຊີ,ໂດຍສະເພາະປັນຍາປະດິດ (AI) ເປັນທັງວິກິດການ ແລະ ໂອກາດທີ່ບໍ່ເຄີຍມີມາກ່ອນ ຊຶ່ງທຸກຝ່າຍສາມາດຮ່ວມມືກັນເພື່ອບັນລຸເປົ້າໝາຍສູງສຸດຂອງຄວາມຈະເລີນຮຸ່ງເຮືອງຮ່ວມກັນ.
ທັງນີ້, ກອງປະຊຸມດັ່ງກ່າວຍັງເກີດຂຶ້ນທ່າມກາງຄວາມບໍ່ແນ່ນອນທາງເສດຖະກິດສາກົນທີ່ເພີ່ມຂຶ້ນ, ລວມເຖິງການຟື້ນຕົວຂອງລັດທິປົກປ້ອງການຄ້າ ແລະ ລັດທິຝ່າຍດຽວ ຊຶ່ງທັງໝົດນີ້ກຳລັງປ່ຽນແປງລະບຽບການຄ້າເສລີແບບດັ່ງເດີມ.
ການແຂ່ງຂັນດ້ານຍຸດທະສາດທີ່ຮຸນແຮງຂຶ້ນໃນບັນດາປະເທດເສດຖະກິດຂະໜາດໃຫຍ່ ແລະ ການປັບໂຄງສ້າງລະບົບຕ່ອງໂສ້ການສະໜອງທົ່ວໂລກ ໄດ້ເຮັດໃຫ້ການຮ່ວມມືໃນພາກພື້ນສັບສົນ.
ໃນຂະນະດຽວກັນ, ສະມາຊິກ APEC ປະເຊີນກັບສິ່ງທ້າທາຍດ້ານໂຄງສ້າງຫຼາຍຢ່າງ, ລວມທັງຈຳນວນປະຊາກອນຜູ້ອາຍຸສູງຢ່າງໄວວາ, ຊ່ອງວ່າງການພັດທະນາທີ່ກວ້າງຂວາງ, ການຫັນປ່ຽນດີຈີຕອນທີ່ບໍ່ສະເໝີພາບແລະ ຄ່າໃຊ້ຈ່າຍທີ່ເພີ່ມຂຶ້ນຂອງການຫັນປ່ຽນທີ່ເປັນມິດກັບສິ່ງແວດລ້ອມ ຫຼື ສີຂຽວ.
ວາລະກອງປະຊຸມ APEC ປີ 2025 ພາຍໃຕ້ຫົວຂໍ້ວ່າ: "ການສ້າງອະນາຄົດທີ່ຍືນຍົງ" ສຸມໃສ່ການພັດທະນາການເຊື່ອມຕໍ່ໃນພາກພື້ນ. ການກະຕຸ້ນການເຕີບໂຕທີ່ຂັບເຄື່ອນດ້ວຍນະວັດຕະກໍາ ແລະ ສ້າງອະນາຄົດຂອງອາຊີປາຊີຟິກທີ່ເຂັ້ມແຂງຍິ່ງຂຶ້ນ.
ໃນປີ 2025, ສະມາຊິກ APEC ກວມເອົາລວມຍອດຜະລິດຕະພັນພາຍໃນປະເທດ (GDP) ຫຼາຍກວ່າ 60% ທົ່ວໂລກ. ໂດຍບົດລາຍງານການວິເຄາະທ່າອ່ຽງລະດັບພາກພື້ນຂອງ APEC ລ່າສຸດລະບຸວ່າ: ການເຕີບໂຕທາງເສດຖະກິດພາກພື້ນໃນປີ 2025 ຢູ່ທີ່ 3.1% ຊຶ່ງສູງກວ່າທີ່ຄາດຄະເນໄວ້ກ່ອນໜ້ານີ້ພຽງເລັກນ້ອຍ.
ການປັບປຸງການຄາດຄະເນໃຫ້ສູງຂຶ້ນແມ່ນໄດ້ຮັບແຮງຂັບເຄື່ອນຈາກການຄ້າ ແລະ ຄວາມຕ້ອງການສິນຄ້າເຕັກໂນໂລຊີສູງທີ່ເຂັ້ມແຂງ, ແຕ່ບົດລາຍງານໄດ້ເຕືອນວ່າການເຕີບໂຕອາດຈະຫຼຸດລົງເຫຼືອ 2.9% ໃນປີ 2026 ຍ້ອນວ່າໜີ້ສິນສາທາລະນະເພີ່ມຂຶ້ນ ແລະ ແຮງກະຕຸ້ນຊົ່ວຄາວຫຼຸດລົງ.
ຄໍາເຫັນ