ຄະນະຜູ້ແທນອົງການໄອຍະການປະຊາຊົນສູງສຸດ ຊຶ່ງນຳໂດຍ ທ່ານ ຄຳເພັດ ສົມວໍລະຈິດ ຄະນະປະຈຳພັກ ຮອງຫົວໜ້າອົງການໄອຍະການປະຊາຊົນສູງສຸດ (ອອປສ) ໄດ້ເຂົ້າຮ່ວມ ກອງປະຊຸມອົງການໃຈກາງປະສານງານອາຊຽນ ກ່ຽວກັບການຮ່ວມມືທາງອາຍາ ຄັ້ງທີ 1ໃນວັນທີ 22 ພະຈິກ ຜ່ານມາທີ່ປະເທດ ບຣູໄນ ດາລູຊາລາມ, ມີລັດຖະມົນຕີ, ຫົວໜ້າອົງການໄອຍະການສູງສຸດ, ພະນັກງານວິຊາການ ອົງການໄອຍະການປະເທດສະມາຊິກອາຊຽນ ແລະ ກອງເລຂາອາຊຽນ ເຂົ້າຮ່ວມ.
ກອງປະຊຸມ ໄດ້ຮັບຟັງການລາຍງານ ການຈັດຕັ້ງປະຕິບັດສົນທິສັນຍາອາຊຽນ ວ່າດ້ວຍການຮ່ວມມືທາງອາຍາ ໂດຍບັນດາປະເທດສະມາຊິກອາຊຽນ ເຫັນໄດ້ຄວາມສຳຄັນຂອງການຮ່ວມມື, ຄວາມໝາຍໝັ້ນ, ສິ່ງທ້າທາຍ, ຄວາມຮັບຜິດຊອບຂອງບັນດາປະເທດສະມາຊິກໃນການຈັດຕັ້ງປະຕິບັດພັນທະຂອງຕົນ ຕາມສົນທິສັນຍາ ມີຜົນສຳເລັດ, ຮັບ ຮອງເອົາບົດລາຍງານກອງປະຊຸມເຈົ້າໜ້າທີ່ອາວຸໂສອາຊຽນ ກ່ຽວກັບການຮ່ວມມືທາງອາຍາປີ 2021, 2022 ຜ່ານມາ; ເຫັນດີໃຫ້ປະເທດກຳປູເຈຍ ຕາມລຳດັບຕົວອັກສອນ ເປັນເຈົ້າພາບກອງປະຊຸມອົງການໃຈກາງປະສານງານອາຊຽນ ກ່ຽວກັບການຮ່ວມມືທາງອາຍາ ຄັ້ງທີ 2 ໃນປີ 2026; ເຫັນດີໃຫ້ ປະເທດອິນໂດເນເຊຍ ເປັນເຈົ້າພາບຈັດກອງປະຊຸມເຈົ້າໜ້າທີ່ອາວຸໂສອາຊຽນກ່ຽວກັບການຮ່ວມມືທາງອາຍາ ໃນປີ 2024 ແລະ ສປປ ລາວ ໃນປີ 2025; ຮັບຮອງເອົາຖະແຫຼງການກອງປະຊຸມ ຊຶ່ງບັນດາປະເທດສະມາຊິກອາຊຽນ ໄດ້ໃຫ້ຄຳໝັ້ນສັນຍາໃນການຈັດຕັ້ງປະຕິບັດສົນທິສັນຍາດັ່ງກ່າວ ບົນພື້ນຖານລັດຖະທຳມະນູນ, ກົດໝາຍ ຕາມພາລະບົດບາດ, ສິດ ແລະ ໜ້າທີ່ຂອງຕົນ, ປະກອບສ່ວນສຳຄັນ ເຂົ້າໃນການຕ້ານອາຊະຍາກຳຂ້າມຊາດ, ນຳເອົາຜູ້ກະທຳຜິດມາລົງໂທດຕາມກົດໝາຍຢ່າງສັກສິດ, ເຮັດໃຫ້ສັງຄົມມີຄວາມສະຫງົບ ມີຄວາມເປັນລະບຽບຮຽບຮ້ອຍ, ເສດຖະກິດມີການພັດທະນາຂະຫຍາຍຕົວຕໍ່ເນື່ອງຢ່າງບໍ່ຢຸດຢັ້ງ.
ຄໍາເຫັນ