ກອງປະຊຸມ ປຶກສາຫາລືການສ້າງຕັ້ງສານປະຊາຊົນ ຢູ່ເຂດເສດຖະກິດພິເສດສາມຫຼ່ຽມຄໍາ

ສານປະຊາຊົນສູງສຸດ(ສປສສ) ໄດຈັດກອງປະຊຸມປຶກສາຫາລືການສ້າງຕັ້ງສານປະຊາຊົນ ຢູ່ເຂດເສດຖະກິດພິເສດສາມຫຼ່ຽມຄໍາ ຂຶ້ນໃນວັນທີ 7 ມີນາ ນີ້ ທີ່ ສປສສ,ພາຍໃຕ້ການເປັນປະທານໂດຍທ່ານ  ນາງ ວຽງທອງ ສີພັນດອນ ຄະນະເລຂາທິການສູນກາງພັກເລຂາຄະນະບໍລິຫານງານພັກປະທາສານປະຊາຊົນ ມີ ບັນດາທ່ານຮອງລັດຖະມົນຕີ, ຮອງຫົວໜ້າອົງການ ແລະ ບັນດາຮອງປະທານສານເຂົ້າຮ່ວມ.
ຈຸດປະສົງຂອງກອງປະຊຸມໃນຄັ້ງນີ້ເພື່ອພ້ອມກັນຄົ້ນຄວ້າ ແລະ ຈັດຕັ້ງປະຕິບັດດຳລັດສະບັບເລກທີ 359/ນຍ, ລົງວັນທີ 22 ພະຈິກ 2023 ວ່າດ້ວຍ ການຈັດຕັ້ງ ແລະ ເຄື່ອນໄຫວ ຂອງອົງການຄຸ້ມຄອງ-ບໍລິຫານ ເຂດເສດຖະກິດພິເສດສາມຫຼ່ຽມຄໍາ ແລະ ຂໍ້ຕົກລົງສະບັບເລກທີ 147/ນຍ ລົງວັນທີ 22 ພະຈິກ 2023 ວ່າດ້ວຍການແຕ່ງຕັ້ງຄະນະຊີ້ນຳ ອົງການຄຸ້ມຄອງ, ບໍລິຫານເຂດເສດຖະກິດພິເສດສາມຫຼ່ຽມຄຳ ແລະ ແຈ້ງການສະບັບເລກທີ 356/ພນ ລົງວັນທີ 29 ທັນວາ 2023 ຂອງລັດຖະມົນຕີກະຊວງພາຍໃນ ກ່ຽວກັບການຈັດຕັ້ງຜັນຂະຫຍາຍດຳລັດດັ່ງກ່າວ ຊຶ່ງໄດ້ກຳນົດ 20 ຂະແໜງການ ໜຶ່ງໃນນັ້ນ ໄດ້ກຳນົດໂຄງປະກອບດ້ານກົງຈັກການຈັດຕັ້ງ ຂອງອົງການຕຸລາການເຂົ້າຢູ່ນຳ ເພື່ອເຮັດ
ໜ້າທີ່ພິຈາລະນາຕັດສິນຄະດີ ທີ່ເກີດຂຶ້ນໃນຂົງເຂດເສດຖະກິດພິເສດສາມຫຼ່ຽມຄຳ ບົນພື້ນຖານລັດຖະທຳມະນູນ ແລະ ກົດໝາຍກຳນົດໄວ້.
ຜ່ານມາສານປະຊາຊົນ ໄດ້ເປັນເຈົ້າການຈັດຕັ້ງຜັນຂະຫຍາຍ ມະຕິ, ຄຳສັ່ງ ຂອງສູນກາງພັກ ແລະ ລັດຖະບານ ເປັນຕົ້ນ ມະຕິສະບັບເລກທີ 037/ຄລສພ, ລົງວັນທີ 18 ມິຖຸນາ 2018 ວ່າດ້ວຍການຍົກສູງປະສິດທິພາບຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ, ມະຕິ ສະບັບເລກທີ 112/ກມສພ, ລົງວັນທີ 2 ມິຖຸນາ 2020 ວ່າດ້ວຍ ການຍົກສູງຄຸນນະພາບການດໍາເນີນຄະດີຕາມຂະບວນການຍຸຕິທໍາ ໄປຄຽງຄູ່ກັບການປະຕິບັດລັດຖະທຳມະນູນ ແລະ ກົດໝາຍ ຢ່າງເຂັ້ມງວດເຂົ້າໃນການປະຕິບັດສິດ, ໜ້າທີ່ ແລະ ພາລະບົດບາດຂອງຕົນ ໂດຍສະເພາະແມ່ນການຕັດສິນ ແລະ ພິພາກສາຄະດີໃຫ້ຖືກຕ້ອງ ເປັນທຳ.
ຂ່າວ-ພາບ:ຕຸໄລເພັດ