 |
ກອງປະຊຸມຈັດຂຶ້ນພາຍໃຕ້ຫົວຂໍ້ “ຟື້ນຟູທີ່ດິນ, ຟື້ນຟູຄວາມຫວັງ” (Restoring Land, Restoring Hope), ໂດຍເຕົ້າໂຮມ 197 ພາຄີ UNCCD, ອົງການສາກົນ, ນັກວິທະຍາສາດ, ພາກເອກະຊົນ, ຊາວໜຸ່ມ, ແມ່ຍິງ, ຊົນເຜົ່າພື້ນເມືອງ, ຊຸມຊົນທ້ອງຖິ່ນ, ຜູ້ລ້ຽງສັດ ແລະ ຊາວກະສິກອນ ມີຜູ້ເຂົ້າຮ່ວມທັງໝົດປະມານ 10,000 ກວ່າທ່ານ. ຈຸດປະສົງຫຼັກແມ່ນກໍານົດທິດທາງ ແລະ ເລັ່ງການປະຕິບັດເພື່ອຫຼີກລ່ຽງ, ຫຼຸດຜ່ອນ ແລະ ຟື້ນຟູຄວາມເສື່ອມໂຊມຂອງດິນ, ສ້າງຄວາມທົນທານຕໍ່ໄພແຫ້ງແລ້ງ, ຮັກສາຄວາມໝັ້ນຄົງດ້ານນ້ຳ ແລະ ອາຫານ, ພ້ອມທັງລະດົມຊັບພະຍາກອນ, ເຕັກໂນໂລຊີ, ຄວາມຮູ້ ແລະ ການຮ່ວມມືໃຫ້ພຽງພໍ.
 |
ຄວາມສຳຄັນຂອງ COP17-UNCCD ແມ່ນການຍົກບັນຫາທີ່ດິນໃຫ້ເປັນວາລະສຳຄັນຂອງການພັດທະນາ ເນື່ອງຈາກຄວາມເສື່ອມໂຊມຂອງດິນບໍ່ພຽງແຕ່ສົ່ງຜົນກະທົບຕໍ່ສິ່ງແວດລ້ອມ ແຕ່ຍັງກະທົບໂດຍກົງຕໍ່ການຜະລິດກະສິກຳ, ຄວາມໝັ້ນຄົງດ້ານອາຫານ ແລະ ນ້ຳ, ລາຍຮັບ ແລະ ຊີວິດການເປັນຢູ່ຂອງປະຊາຊົນ, ຕະຫຼອດຮອດສະຖຽນລະພາບທາງເສດຖະກິດ ແລະ ສັງຄົມ. ດັ່ງນັ້ນ, ການຟື້ນຟູ ແລະ ຄຸ້ມຄອງທີ່ດິນຢ່າງຍືນຍົງ ຈຶ່ງເປັນການລົງທຶນເພື່ອສ້າງພື້ນຖານໃຫ້ແກ່ການພັດທະນາ, ຄວາມຜາສຸກຂອງປະຊາຊົນ ແລະ ຄວາມໝັ້ນຄົງຂອງປະເທດ.
ການເຂົ້າຮ່ວມຂອງຮອງລັດຖະມົນຕີ ໄດ້ເນັ້ນໃຫ້ເຫັນເຖິງຄວາມມຸ່ງໝັ້ນຢ່າງຕໍ່ເນື່ອງຂອງ ສປປ ລາວ ໃນການຕ້ານການເຊື່ອມໂຊມຂອງທີ່ດິນ ແລະ ການພັດທະນາການຄຸ້ມຄອງທີ່ດິນແບບຍືນຍົງ ທັງໃນປະເທດ ແລະ ພາກພື້ນ.ໃນກອງປະຊຸມລະດັບສູງ ວັນທີ 24 ສິງຫາ 2026, ໄດ້ມີການກ່າວຖະແຫຼ່ງການໂດຍເນັ້ນລົງເລິກ ດິນທີ່ມີສຸຂະພາບດີ ແມ່ນຮາກຖານຂອງອາຫານ, ສຸຂະພາບ, ສັນຕິພາບ ແລະ ຄວາມຫວັງ. ສຳລັບ ສປປ ລາວ, ຄະນະຜູ້ແທນໄດ້ຍົກບັນດາບຸລິມະສິດຂອງ ປະເທດ ຄື: ການຄຸ້ມ ຄອງ ແລະ ຟື້ນຟູທີ່ດິນຢ່າງຍືນຍົງ, ການສ້າງຄວາມທົນທານຕໍ່ໄພແຫ້ງແລ້ງ, ການຄຸ້ມຄອງນ້ຳ, ປ່າໄມ້ ແລະ ຊີວະນາໆພັນ, ກະສິກຳທີ່ທົນທານຕໍ່ສະພາບອາກາດ ແລະ ຄວາມໝັ້ນຄົງດ້ານອາຫານ. ສປປ ລາວ ຍັງໄດ້ເນັ້ນເຖິງສະພາບ ສະເພາະຂອງປະເທດ ດ້ອຍພັດທະນາ ແລະ ປະເທດກຳລັງພັດທະນາທີ່ບໍ່ມີທາງອອກສູ່ທະເລ, ພ້ອມຮຽກຮ້ອງໃຫ້ມີແຫຼ່ງທຶນທີ່ພຽງພໍ, ຄາດຄະເນໄດ້ ແລະ ເຂົ້າເຖິງໄດ້ງ່າຍ, ຄຽງຄູ່ກັບການຖ່າຍທອດເຕັກໂນໂລຊີ, ການແລກປ່ຽນຄວາມຮູ້ ແລະ ການສ້າງຂີດຄວາມສາມາດ ເພື່ອບັນລຸເປົ້າໝາຍຄວາມເປັນກາງ ດ້ານຄວາມເສື່ອມໂຊມຂອງດິນ ທີ່ແຕ່ລະປະເທດກໍານົດດ້ວຍຄວາມສະໝັກໃຈ.
 |
ໃນລະຫວ່າງກອງປະຊຸມດັ່ງກ່າວ, ທ່ານ ໄຊນະຄອນ ອິນທະວົງ ຮອງລັດຖະມົນຕີກະຊວງກະສິກໍາ ແລະ ສິ່ງແວດລ້ອມ, ພ້ອມດ້ວຍ ທ່ານ ຫົງແກ້ວ ສຸກສະຫວັດ ເອກອັກຄະລັດທະທູດລາວ ປະຈຳ ມົງໂກລີ ໄດ້ຖືໂອກາດພົບປະທະວິພາຄີ ກັບ ທ່ານ JAMBALTSEREN TUMUR-UYA ຫົວໜ້າຫ້ອງການ ກະຊວງ ອາຫານ, ກະສິກຳ ແລະ ອຸດສາຫະກຳເບົາ ແຫ່ງ ມົງໂກລີ ເພື່ອທົບທວນການຮ່ວມມືທີ່ມີຢູ່ ແລະ ປຶກສາຫາລືທິດທາງຮ່ວມມືໃນຕໍ່ໜ້າດ້ານກະສິກຳ, ສັດຕະວະແພດ ແລະ One Health, ການປົກປ້ອງ ແລະ ກັກກັນພືດ, ການຄຸ້ມຄອງທົ່ງຫຍ້າ ແລະ ທີ່ດິນ, ການຟື້ນຟູດິນ ແລະ ການແລກປ່ຽນວິຊາການ.
ໃນໂອກາດດຽວກັນ, ທ່ານ ໄຊນະຄອນ ອິນທະວົງ ພ້ອມຄະນະ, ໄດ້ສືບຕໍ່ພົບປະທະວິພາຄີ ກັບ ກະຊວງກະສິກໍາ ແລະ ສະຫະກອນ ແຫ່ງ ຣາຊະອານາຈັກໄທ, ສອງຝ່າຍໄດ້ທົບທວນສາຍພົວພັນອັນໃກ້ຊິດ ແລະ ການຮ່ວມມືທີ່ມີມາຍາວນານໃນຂະແໜງກະສິກຳ, ພ້ອມທັງແລກປ່ຽນທັດສະນະ ກ່ຽວກັບການຂະຫຍາຍການຮ່ວມມືດ້ານການສຳຫຼວດ, ວາງແຜນ, ຄຸ້ມຄອງ ແລະ ພັດທະນາທີ່ດິນ; ການອະນຸລັກດິນ ແລະ ນ້ຳ; ການຟື້ນຟູພື້ນດິນເສື່ອມໂຊມ, ການປັບຕົວຕໍ່ໄພແຫ້ງແລ້ງ ແລະ ການປ່ຽນແປງດິນຟ້າອາກາດ; ຕະຫຼອດຮອດການຝຶກອົບຮົມ, ການແລກປ່ຽນຜູ້ຊ່ຽວຊານ, ເຕັກໂນໂລຊີ ແລະ ບົດຮຽນທີ່ດີ. ສອງຝ່າຍ ຍັງເຫັນຄວາມສຳຄັນຂອງ ການສົ່ງເສີມບົດບາດພາກເອກະຊົນ, ການລົງທຶນ ແລະ ຕ່ອງໂສ້ມູນຄ່າກະສິກຳທີ່ຍືນຍົງ, ເພື່ອຫັນ ການຮ່ວມມືລາວ-ໄທໃຫ້ເປັນກິດຈະກຳ ທີ່ເປັນຮູບປະທຳ ແລະ ນຳມາຊຶ່ງຜົນປະໂຫຍດຮ່ວມກັນ.
ໃນວັນທີ 25 ສິງຫາ 2026, ທ່ານຮອງລັດຖະມົນຕີ ໄດ້ເຂົ້າຮ່ວມກອງປະຊຸມລັດຖະມົນຕີສິ່ງ ແວດລ້ອມຂອງບັນດາປະເທດ ກຳລັງພັດທະນາທີ່ບໍ່ມີທາງອອກສູ່ທະເລ (LLDCs), ເພື່ອຊຸກຍູ້ບຸລິມະສິດຮ່ວມ ແລະ ສຽງຂອງ LLDCs ໃນຂະບວນການ COP17. ຜົນປະໂຫຍດສຳຄັນຕໍ່ ສປປ ລາວ ແມ່ນການຍົກສູງບົດບາດ ແລະ ສຽງຂອງປະເທດໃນເວທີສາກົນ; ສ້າງເຄືອຂ່າຍກັບປະເທດ ພາຄີ, ອົງການສາກົນ ແລະ ຄູ່ຮ່ວມງານພັດທະນາ; ເປີດໂອກາດເຂົ້າເຖິງແຫຼ່ງທຶນ, ເຕັກໂນໂລຊີ, ຂໍ້ມູນ ແລະ ວິຊາການ; ພ້ອມ ທັງນຳ ແນວທາງ ແລະ ບົດຮຽນຈາກ COP17 ມາປະກອບເຂົ້າໃນນະໂຍບາຍ, ແຜນງານ ແລະ ໂຄງການຂອງຊາດ. ໃນໄລຍະຕໍ່ໄປ, ຜົນຂອງກອງປະຊຸມສາມາດນຳໄປສູ່ການກະກຽມໂຄງການທີ່ລົງທຶນໄດ້, ການພັດທະນາລະບົບເຕືອນໄພແຫ້ງແລ້ງ, ການຟື້ນຟູພື້ນທີ່ເສື່ອມໂຊມ, ການຄຸ້ມຄອງນ້ຳ ແລະ ປ່າໄມ້, ແລະ ການສົ່ງເສີມລະບົບກະສິກຳ-ອາຫານທີ່ຍືນຍົງ ຊຶ່ງຈະຊ່ວຍສ້າງລາຍຮັບ, ຫຼຸດຜ່ອນ ຄວາມສ່ຽງ ແລະ ເສີມສ້າງຄວາມທົນທານໃຫ້ປະຊາຊົນລາວ.
(ແຫຼ່ງຂ່າວ: ຂ່າວສານກະສິກຳ ແລະ ສິ່ງແວດລ້ອມ)
ຄໍາເຫັນ