 |
ກອງປະຊຸມເຈົ້າໜ້າທີ່ອາວຸໂສຄັ້ງນີ້ ໄດ້ປຶກສາຫາລືເພື່ອກະກຽມຄວາມພ້ອມຮອບດ້ານໃຫ້ແກ່ ກອງປະຊຸມຄະນະກໍາມາທິການຮ່ວມ ວ່າດ້ວຍການຮ່ວມມືລາວ-ໄທ ຄັ້ງທີ 23 ທີ່ຈະຈັດຂຶ້ນໃນວັນທີ 2 ຕຸລານີ້ ທັງທາງດ້ານພະລາທິການ ແລະ ດ້ານເນື້ອໃນ. ໃນນີ້ໄດ້ມີການຮ່ວມກັນທົບທວນຄືນການຈັດ ຕັ້ງປະຕິບັດບົດບັນທຶກກອງປະຊຸມຄະນະກໍາມາທິການຮ່ວມ ວ່າດ້ວຍການຮ່ວມມື ລາວ-ໄທ ຄັ້ງທີ 22 ທີ່ໄດ້ຈັດຂຶ້ນໃນປີ 2021. ຕະຫຼອດໄລຍະ 5 ປີຜ່ານມາ ການຮ່ວມມືຂອງສອງປະເທດ ແມ່ນມີຄວາມຄືບໜ້າເປັນຮູບປະທຳຫຼາຍໆດ້ານ, ທັງໝົດນັ້ນລ້ວນແຕ່ປະກອບສ່ວນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືຖານບ້ານໃກ້ເຮືອນຄຽງທີ່ດີ ລະຫວ່າງສອງປະເທດ ໃຫ້ມີບາດກ້າວອັນໃໝ່ທີ່ດີຍິ່ງຂຶ້ນ.
 |
ກອງປະຊຸມຍັງໄດ້ປຶກສາຫາລືການກໍານົດທິດທາງແຜນການຮ່ວມມືລະຫວ່າງສອງຝ່າຍ ລາວ-ໄທ ໃນຊຸມປີຕໍ່ໜ້າ ແລະ ກ້າວໄປສູ່ການສ້າງບົດບັນທຶກກອງປະຊຸມຄະນະກໍາມາທິການຮ່ວມ ວ່າດ້ວຍການຮ່ວມມືລາວ-ໄທ ຄັ້ງທີ 23 ໃຫ້ໄດ້ຢ່າງສົມບູນ ຊຶ່ງຈະເປັນພື້ນຖານອັນສໍາຄັນໃຫ້ແກ່ການຮັດແໜ້ນ ແລະ ເສີມຂະຫຍາຍການຮ່ວມມືຖານບ້ານໃກ້ເຮືອນຄຽງທີ່ດີ ກໍຄືການເປັນຄູ່ຮ່ວມຍຸດທະສາດ ເພື່ອການຈະເລີນເຕີບໂຕ ເເລະ ການພັດທະນາເເບບຍືນຍົງ ທີ່ເຕັມໄປດ້ວຍໄມຕີຈິດມິດຕະພາບ ແລະການຊ່ວຍເຫຼືອຊຶ່ງກັນ ແລະ ກັນ ລະຫວ່າງສອງປະເທດ ເພື່ອພ້ອມກັນພັດທະນາຢ່າງບໍ່ຢຸດຢັ້ງ. ກອງປະຊຸມເຈົ້າໜ້າທີ່ອາວຸໂສຄັ້ງນີ້ ໄດ້ດໍາເນີນດ້ວຍບັນຍາກາດອັນດີ, ມີຄວາມເຂົ້າອົກເຂົ້າໃຈຊຶ່ງກັນ ແລະ ກັນ, ກົງໄປກົງມາ ແລະ ໄດ້ຮັບຜົນສໍາເລັດຕາມຄາດໝາຍທີ່ວາງໄວ້.
 |
ໃນຕອນເຊົ້າຂອງວັນດຽວກັນ, ຍັງໄດ້ມີກອງປະຊຸມ 3 ກຸ່ມຍ່ອຍຄື: ກຸ່ມດ້ານການເມືອງ ແລະ ຄວາມໝັ້ນຄົງ; ກຸ່ມດ້ານເສດຖະກິດ ແລະ ກຸ່ມດ້ານສັງຄົມ ແລະ ການພັດທະນາ (ວັດທະນະທໍາ-ສັງຄົມ) ເພື່ອທົບທວນຜົນການຈັດຕັ້ງຜັນຂະຫຍາຍບົດບັນທຶກກອງປະຊຸມຄະນະກໍາມາທິການຮ່ວມ ວ່າດ້ວຍການຮ່ວມມື ລາວ-ໄທ ຄັ້ງທີ 22 ພ້ອມທັງປຶກສາຫາລືຮ່ວມກັນໃນການກຳນົດແຜນການຮ່ວມມືໃນຊຸມປີຕໍ່ໜ້າດ້ວຍຄວາມເອົາໃຈໃສ່ ແລະ ກົງໄປກົງມາ.
 |
(ຂ່າວ: ກົມການຂ່າວ ກຕທ)
ຄໍາເຫັນ