ທ່ານ ນາງ ອໍາວຽງ ເພົ້າວົງໄຊ ກ່າວເປີດປະຊຸມວ່າ: ຈຸດປະສົງຂອງກອງປະຊຸມຝຶກອົບຮົມຄັ້ງນີ້ ແມ່ນເພື່ອແລກປ່ຽນບົດຮຽນດ້ານວິຊາການໃນການຄຸ້ມຄອງອ່າງຫາງແຮ່, ການຕິດຕາມ ກວດກາສິ່ງແວດ ລ້ອມບໍ່ແຮ່, ຫຼັກການກວດກາບໍ່ແຮ່ ແລະ ເຕັກໂນໂລຊີບໍ່ແຮ່ ຕາມແຜນການຮ່ວມມືດ້ານແຮ່ທາດອາຊຽນ ແຕ່ປີ 2021-2025 (AMCAP, 2021-2025) ໂດຍສະເພາະໃນໜ້າວຽກທີ່ ສປປ ລາວ ຕ້ອງໄດ້ຈັດຕັ້ງປະຕິບັດພາຍໃຕ້ໜ້າວຽກການພັດທະນາບໍ່ແຮ່ແບບຍືນຍົງ (WGSMD) ຊຶ່ງບັນດາຫົວຂໍ້ຝຶກອົບຮົມທີ່ໄດ້ນຳສະເໜີປະກອບມີ 4 ຫົວຂໍ້: 1 ບົດບາດຂະແໜງບໍ່ແຮ່ໃນການຕິດຕາມກວດກາບໍ່ແຮ່, ອ່າງຫາງແຮ່ ແລະ ການຄຸ້ມຄອງສິ່ງແວດລ້ອມບໍ່ແຮ່, 2. ການວິເຄາະຄາດຄະເນຜົນກະທົບຂອງການປ່ຽນແປງດິນຟ້າອາກາດໃນໄລຍະຍາວຕໍ່ກັບການຄຸ້ມຄອງອ່າງຫາງແຮ່, 3. ວຽກງານການຄຸ້ມຄອງອ່າງຫາງແຮ່ ແລະ ສິ່ງແວດ ລ້ອມບໍ່ແຮ່ຂອງໂຄງການຂຸດຄົ້ນ ແລະ ປຸງແຕ່ງແຮ່ທອງ-ຄໍາ (ເຊໂປນ) ແລະ 4. ການຄຸ້ມຄອງອ່າງຫາງແຮ່ ແລະ ສິ່ງແວດລ້ອມບໍ່ແຮ່ຂອງໂຄງການຂຸດຄົ້ນ ແລະ ປຸງແຕ່ງແຮ່ເງິນ-ຄໍາ-ທອງ (ໂຄງການພູຄໍາ ແລະ ໂຄງການບ້ານຫ້ວຍຊາຍ).
ຕອນບ່າຍຂອງວັນດຽວກັນກໍໄດ້ຈັດກອງປະຊຸມປຶກສາຫາລືກ່ຽວກັບການພັດທະນາຄູ່ມືການລົງທຶນ ແລະ ນະໂຍບາຍແຮ່ທາດອາຊຽນ ເພື່ອຈຸດປະສົງແລກປ່ຽນຂໍ້ມູນດ້ານນະໂຍບາຍການພັດທະນາບໍ່ແຮ່ຂອງແຕ່ລະປະເທດອາຊຽນ, ກົດໝາຍ ແລະ ລະບຽບການທີ່ກ່ຽວຂ້ອງ, ຂັ້ນຕອນການລົງທຶນດ້ານບໍ່ແຮ່ ທີ່ຕິດພັນກັບຍຸດທະສາດການພັດທະນາບໍ່ແຮ່ຂອງແຕ່ລະປະເທດອາຊຽນ.
ການດຳເນີນກອງປະຊຸມທັງສອງຫົວຂໍ້, ຜູ້ເຂົ້າຮ່ວມທັງພາກລັດ ແລະ ເອກະຊົນ ຂອງ ສປປ ລາວ ກໍໄດ້ຜັດປ່ຽນກັນແລກປ່ຽນຄວາມຮູ້ ແລະ ປະສົບການໃນວຽກງານດ້ານຄຸ້ມຄອງອ່າງຫາງແຮ່, ສິ່ງ ແວດລ້ອມບໍ່ແຮ່, ແລກປ່ຽນຂໍ້ມູນດ້ານນະໂຍບາຍການພັດທະນາບໍ່ແຮ່ຂອງແຕ່ລະປະເທດອາຊຽນ, ກົດໝາຍ ແລະ ລະບຽບການທີ່ກ່ຽວຂ້ອງ, ຂັ້ນຕອນການລົງທຶນດ້ານບໍ່ແຮ່ ແລະ ອື່ນໆ ຮ່ວມກັນກັບບັນດາຜູ້ເຂົ້າຮ່ວມກອງປະຊຸມຝຶກອົບຮົມດັ່ງກ່າວຈາກພາຍໃນ ແລະ ຕ່າງປະເທດ ຢ່າງກົງໄປກົງມາ.
(ຂໍ້ມູນ: ກະຊວງ ອຸດສາຫະກຳ ແລະ ການຄ້າ)
ຄໍາເຫັນ