ໂດຍການເປັນປະທານຂອງທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ(ສພຊ), ມີທ່ານ ນາງ ອາລີ ວົງໜໍ່ບຸນທໍາ ປະທານຄະນະບໍລິຫານງານສູນກາງສະຫະພັນແມ່ຍິງລາວ (ສສຍລ), ບັນດາທ່ານປະທານ ແລະ ຮອງປະທານກໍາມາທິການທີ່ກ່ຽວຂ້ອງຂອງ ສພຊ, ຮອງລັດຖະມົນຕີກະຊວງຍຸຕິທໍາ, ຮອງຫົວໜ້າຫ້ອງວ່າການສໍານັກງານປະທານປະເທດ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຮອງປະທານຄະນະບໍລິຫານງານສສຍລ ພ້ອມດ້ວຍຄະນະກົມ, ຄະນະພະແນກ ແລະ ພະນັກງານຈາກ ສພຊ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ນາງ ສູນທອນ ໄຊຍະຈັກ ກ່າວວ່າ: ກອງປະຊຸມຄັ້ງນີ້ ແມ່ນການພິຈາລະນາຄືນບັນດາຄໍາເຫັນຂອງສະມາຊິກສະພາແຫ່ງຊາດໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ທີ່ຄະນະຮັບຜິດຊອບເຫັນດີ ຫຼື ບໍ່ປັບປຸງຕາມການສະເໜີ ແລະ ບັນຫາອື່ນທີ່ສະມາຊິກສະພາແຫ່ງຊາດບໍ່ໄດ້ຍົກຂຶ້ນ; ແຕ່ຫາກຍັງເຫັນວ່າຍັງບໍ່ສອດຄ່ອງ, ບໍ່ຄົບຖ້ວນ ຫຼື ການຂຽນຍັງບໍ່ຖືກຕ້ອງ ກໍຈະໄດ້ປັບປຸງ ແລະ ຮຽບຮຽງຄືນ ເພື່ອໃຫ້ເນື້ອໃນກົດໝາຍສອງສະບັບປັບປຸງນີ້ ມີຄວາມຈະແຈ້ງ, ຮັດກຸມໃຫ້ຖືກຕ້ອງຕາມເປົ້າໝາຍ, ເປັນລະບົບ ແລະ ສອດຄ່ອງກັບສະພາບການຂະຫຍາຍຕົວທາງດ້ານເສດຖະກິດ-ສັງຄົມກ່ອນລາຍງານຕໍ່ກອງປະຊຸມຄະນະປະຈຳສະພາແຫ່ງຊາດ ແລະ ນຳສະເໜີທ່ານປະທານສະພາແຫ່ງຊາດພິຈາລະນາລົງລາຍເຊັນ.
ຜູ້ເຂົ້າຮ່ວມໄດ້ພ້ອມກັນຄົ້ນຄວ້າ, ສົນທະນາແລກປ່ຽນຕໍ່ຄໍາເຫັນຂອງສະມາຊິກສະພາແຫ່ງຊາດ ແລະ ບັນຫາອື່ນໆທີ່ກອງປະຊຸມຕັ້ງຂຶ້ນ; ພ້ອມກັນນັ້ນ, ຄະນະຮັບຜິດຊອບ ກໍຄືສູນກາງສະຫະພັນແມ່ຍິງລາວໄດ້ອະທິບາຍ, ຊີ້ແຈງຕໍ່ທຸກບັນຫາຢ່າງເລິກເຊິ່ງ, ຮອບດ້ານແລະ ຮັດກຸມທີ່ສຸດ.
(ຂ່າວ-ພາບ: ນາງ ກຸກກິກ ບຸດດາໄຊ)
ຄໍາເຫັນ