ກອງປະຊຸມການສົ່ງເສີມ ແລະ ໂຄສະນາກິດຈະກຳ ຕະຫຼາດທ່ອງທ່ຽວຢູ່ແຂວງສາລະວັນ.

ຈຸດປະສົງຂອງກອງປະຊຸມຄັ້ງນີ້, ເພື່ອປຶກສາລືກ່ຽວກັບການສ້າງກິດຈະກຳການທ່ອງທ່ຽວຕ່າງໆພາຍໃນແຂວງສາລະວັນ ພ້ອມທັງກະຕຸ້ນການມີສ່ວນຮ່ວມລະຫວ່າງພາກລັດ ແລະ ພາກທຸລະກິດ ໃນຂະແໜງການທ່ອງທ່ຽວ ເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ອງທ່ຽວແຂວງສາລະວັນໃຫ້ນັບມື້ຫຼາຍຂຶ້ນ. ຈາກນັ້ນ, ທ່ານ ທິບພະວົງ ສຸວັນນະແພງສີ ຮອງຫົວໜ້າຂະແໜງທ່ອງທ່ຽວ ໄດ້ຜ່ານບົດລາຍງານການຈັດຕັ້ງປະຕິບັດກິດຈະກຳຕາມປະຕິທິນທ່ອງທ່ຽວແຂວງ ໃນປີ 2024 ໂດຍຜ່ານຄົ້ນຄວ້າ-ສັງລວມຂໍ້ມູນຕ່າງໆ ໃນຜ່ານມາ ເຈົ້າແຂວງໄດ້ເຫັນດີຮັບຮອງເອົາປະຕິທິນທ່ອງທ່ຽວຂອງແຂວງສາລະວັນ ປະກອບດ້ວຍງານລະດັບຊາດ 1 ງານ (ງານບຸນປະເພນີແຫ່ພະໄຕປີດົກ ສືບສານວັດທະນະທຳ ລຳວົງສາລະວັນ) ແລະ ງານລະດັບແຂວງ 8 ງານ ທີ່ເປັນກິດຈະກໍາສົ່ງເສີມປີທ່ອງທ່ຽວຂອງແຂວງສາລະວັນ. ນອກນັ້ນ, ພະແນກວັດທະນະທໍາ ແລະ ທ່ອງທ່ຽວໄດ້ອອກຂໍ້ຕົກລົງຮັບຮອງເອົາປະຕິທິນທ່ອງທ່ຽວຂັ້ນເມືອງ ແລະ ຂັ້ນບ້ານຂອງ 8 ຕົວເມືອງທົ່ວແຂວງ ມີທັງໝົດ 21 ກິດຈະກໍາ, ແບ່ງເປັນຂັ້ນເມືອງ 6 ກິດຈະກໍາ ແລະ ຂັ້ນບ້ານ 15 ກິດຈະກໍາ ໂດຍປະຕິບັດແລ້ວ 6 ກິດຈະກໍາ. ນອກນັ້ນ, ກໍໄດ້ແຕ່ງຕັ້ງຄະນະພະແນກ ແລະ ວິຊາການລົງຊູກຍູ້ຊ່ວຍເຫຼືອບັນດາເມືອງໃນການກະກຽມຈັດຕັ້ງປະຕິບັດງານປະຕິທິນທ່ອງທ່ຽວຂອງເມືອງຕິດພັນກັບການສົ່ງເສີມປີທ່ອງທ່ຽວລາວ ພ້ອມນັ້ນ ຜູ້ເຂົ້າຮ່ວມກອງປະຊຸມກໍໄດ້ຮ່ວມກັນປຶກສາຫາລືປະກອບຄຳເຫັນ ເຂົ້າໃສ່ວຽກງານສົ່ງເສີມການສ້າງກິດຈະກຳການທ່ອງທ່ຽວໃນການກະຕຸ້ນໃຫ້ມີການເພີ່ມທະວີການໂຄສະນາ ແລະ ສ້າງຜະລິດຕະພັນ ເພື່ອກະຕຸ້ນໃຫ້ນັກທ່ອງທ່ຽວເຂົ້າມາທ່ຽວແຂວງສາລະວັນໃຫ້ຫຼາຍຂຶ້ນ.

(ພາບ-ຂ່າວ: ທິດລານີ ໂຄດໂຍທາ)