ກອງປະຊຸມການເຊື່ອມໂຍງພະລັງງານໂລກປີ 2025 ໄດ້ຈັດຂຶ້ນໃນວັນທີ 9 ກັນຍາ ຜ່ານມາ ທີ່ຫໍປະຊຸມແຫ່ງຊາດ ທີ່ນະຄອນຫຼວງປັກກິ່ງ ສປ ຈີນ ຊຶ່ງກອງປະຊຸມຄັ້ງນີ້ເປັນຄັ້ງທີ 7 ຈັດໂດຍອົງການຮ່ວມມືພັດທະນາການເຊື່ອມໂຍງພະລັງງານລະດັບໂລກ ຮ່ວມກັບອົງການພັດທະນາແຫ່ງສະຫະປະຊາຊາດ, ຄະນະກໍາມະການເສດຖະກິດ ແລະ ສັງຄົມ ສໍາລັບອາເມຣິກາ ແລະ ຄາລີບຽນ, ຄະນະກຳມະການເສດຖະກິດ ແລະ ສັງຄົມສຳລັບອາຊີ-ປາຊີຟິກ, ອົງການອຸດສາຫະກຳສະຫະປະຊາຊາດ, ອົງການເຄືອຂ່າຍແນວທາງແກ້ໄຂການພັດທະນາແບບຍືນຍົງຂອງສະຫະປະຊາຊາດ ແລະ ອົງການພະລັງງານ ອາເມຣິກາ ລາຕິນ. ໂດຍໃຫ້ກຽດເຂົ້າຮ່ວມຂອງທ່ານ ຫານ ເຈິ້ງ (Han Zheng) ຮອງປະທານປະເທດແຫ່ງ ສປ ຈີນ ແລະ ທ່ານຊິ່ນ ປ້າວອັນ (Xin Baoan) ປະທານອົງການພັດທະນາ ແລະ ການຮ່ວມມືລະຫວ່າງການເຊື່ອມຕໍ່ພະລັງງານທົ່ວໂລກ ປະທານສະພາໄຟຟ້າ ແຫ່ງ ສປຈີນ, ພາຍໃຕ້ຫົວຂໍ້ “ເຊື່ອມໂຍງພະລັງງານໂລກ ເພື່ອຕອບສະໜອງໄຟຟ້າທົ່ວໂລກດ້ວຍພະລັງງານສະອາດ”, ໂດຍມີແຂກພາຍໃນ ແລະ ຕ່າງປະເທດເຂົ້າຮ່ວມຫຼາຍກວ່າ 100 ປະເທດ. ໃນນັ້ນມີຕາງໜ້າຈາກກະຊວງອຸດສາຫະກຳ ແລະ ການຄ້າຂອງ ສປປ ລາວ ເຂົ້າຮ່ວມອີກດ້ວຍ.
ຈຸດປະສົງຂອງກອງປະຊຸມດັ່ງກ່າວ ແມ່ນເພື່ອເພີ່ມການຮ່ວມມືໃນການຜະລິດພະລັງງານໝູນວຽນ, ການເຊື່ອມໂຍງຕາຂ່າຍໄຟຟ້າ ແລະ ພະລັງງານອັດສະລິຍະລວມເຖິງການສົ່ງເສີມການດຳເນີນການຕາມອະນຸສັນຍາສະຫະປະຊາຊາດ ວ່າດ້ວຍການປ່ຽນແປງສະພາບດິນຟ້າອາກາດ ແລະ ການພັດທະນາເຕັກໂນໂລຊີສຳລັບການໃຊ້ພະລັງງານສະອາດ ສົ່ງເສີມຄວາມຮ່ວມມືດ້ານການເຂົ້າເຖິງພະລັງງານ ເພື່ອຊ່ວຍໃຫ້ປະເທດກຳລັງພັດທະນາເພີ່ມຂີດຄວາມສາມາດໃນການຮັບປະກັນຄວາໝັ້ນຄົງດ້ານພະລັງງານ.
ທ່ານ ຫານເຈີ້ງ ໄດ້ສະເໜີໃນກອງປະຊຸມ ກ່ຽວກັບການພັດທະນາພະລັງງານໂລກ ວ່າ: ການສົ່ງເສີມການປ່ຽນແປງສູ່ສີຂຽວ ແລະ ກາກບອນຕ່ຳ, ນະວັດຕະກຳທາງເຕັກໂນໂລຊີ, ການຂັບເຄື່ອນການພັດທະນາທີ່ຍືນຍົງ, ການເສີມສ້າງການຮ່ວມມືດ້ານຊັບພະຍາກອນ ແລະ ສັກກະຍະພາບທາງອຸດສາຫະກຳ. ທ່ານ ຫານເຈີ້ງ ກ່າວຕື່ມວ່າ: ສົ່ງເສີມໂຄງການພື້ນຖານໂຄງລ່າງດ້ານພະລັງງານເຂດຊາຍແດນ ທັງພາກພື້ນ ແລະ ສາກົນ ເພື່ອສົ່ງເສີມຄວາມຮ່ວມມືຊຶ່ງກັນ ແລະ ກັນ ໃຫ້ມີຜົນປະໂຫຍດຮ່ວມກັນ.
ຂ່າວ: ໄມຕຣີ
ຄໍາເຫັນ