 |
ທ່ານ ພູວົງ ບຸນຊູ ໄດ້ກ່າວເປີດກອງປະຊຸມວ່າ: ຈຸດປະສົງຕົ້ນຕໍ ຂອງກອງປະຊຸມ ແມ່ນເພື່ອທົບທວນ, ສະຫຼຸບ ແລະ ປະເມີນຄືນຜົນການຈັດຕັ້ງປະຕິບັດວຽກງານໃນໄລຍະ 9 ເດືອນ ຜ່ານມາ, ພ້ອມທັງຄົ້ນຄວ້າ ແລະ ວາງທິດທາງແຜນການ 3 ເດືອນທ້າຍປີ 2026 ໃຫ້ມີຄວາມຊັດເຈນ ແລະ ຕົກລົງເຫັນດີເປັນເອກະພາບ. ນອກຈາກນີ້, ຜູ້ເຂົ້າຮ່ວມໄດ້ຮ່ວມກັນຄົ້ນຄວ້າ, ພິຈາລະນາ ແລະ ຮັບຮອງເອົາບັນດາບົດລາຍງານ ແລະ ນິຕິກຳສຳຄັນຂອງແຂວງ, ເປັນຕົ້ນແມ່ນ: ບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 9 ເດືອນ ແລະ ທິດທາງແຜນການ 3 ເດືອນທ້າຍປີ 2026 ທີ່ສະເໜີໂດຍ ທ່ານ ສີວຽງໄຊ ອໍລະບູນ, ຮອງປະທານຄະນະກຳມະການປົກຄອງແຂວງ; ບົດລາຍງານການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ (2027-2030) ຂອງແຂວງວຽງຈັນ ທີ່ສະເໜີໂດຍ ທ່ານ ສົມປະສົງ ສຸວົງຄຳຈັນ, ຮອງປະທານຄະນະກຳມະການປົກຄອງແຂວງ; ບົດລາຍງານການກ່ຽວກັບການຈັດຕັ້ງປະຕິບັດວຽກງານການສະກັດກັ້ນ ແລະ ແກ້ໄຂປະກົດການຫຍໍ້ທ້ໍ ໃນຂົງເຂດເສດຖະກິດ-ສັງຄົມຂອງແຂວງວຽງຈັນ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ທີ່ສະເໜີໂດຍ ທ່ານ ພົມມະລາ ນັນທະວົງ, ຫົວໜ້າຫ້ອງວ່າການແຂວງ; ບົດປະເມີນຜົນການຈັດຕັ້ງປະຕິບັດ ຂໍ້ຕົກລົງ ສະບັບເລກທີ 2381/ຈຂ.ວຈ, ລົງວັນທີ 10 ທັນວາ 2019 ວ່າດ້ວຍການກຳນົດຂອບເຂດປະເມີນມູນຄ່າດິນ, ເພຶ່ອຄິດໄລ່ຄ່າທຳນຽມໃນການຈົດທະບຽທີ່ດິນແຂວງ ແລະ ການກະກຽມຄວາມພ້ອມໃນການປັບປຸງນິຕິກຳໃຕ້ກົດໝາຍດັ່ງກ່າວ ເພື່ອສະເໜີຕໍ່ສະພາປະຊາຊົນແຂວງ ສະເໜີໂດຍ ທ່ານ ຄອນສະຫວັນ ສີອັກຄະສອນ ຫົວໜ້າພະແນກ ກະສິກຳ ແລະ ສິ່ງແວດລ້ອມແຂວງ; ບົດລາຍງານການປະເມີນຄືນກ່ຽວກັບການຈັດຕັ້ງປະຕິບັດ ຂໍ້ຕົກລົງ 963/ຈຂ.ວຈ, ລົງວັນທີ 23 ສິງຫາ 2022 ວ່າດ້ວຍການຂຸດຄົ້ນຫີນ-ຊາຍ ແລະ ດິນດຳຕາມລຳນ້ຳຂອງ, ນ້ຳງື່ມ, ນ້ຳລີກ, ນ້ຳກາຍ ແລະ ແມ່ນ້ຳສາຍອື່ນໆ ຢູ່ພາຍໃນແຂວງວຽງຈັນ ສະເໜີໂດຍ ທ່ານ ຄຳມອນ ສີສອນສັກ ຫົວໜ້າພະແນກ ໂຍທາທິການ ແລະ ຂົນສົ່ງແຂວງ.
ທ່ານ ພູວົງ ບຸນຊູ ໄດ້ເນັ້ນຕໍ່ກອງປະຊຸມອີກວ່າ: ບັນດາເນື້ອໃນທີ່ນຳມາຄົ້ນຄວ້າໃນກອງປະຊຸມຄັ້ງນີ້ ລ້ວນແຕ່ແມ່ນວຽກງານທີ່ມີຄວາມສໍາຄັນ, ເຄັ່ງຮ້ອນ ແລະ ເປັນພື້ນຖານຢ່າງຍິ່ງ ເພື່ອສຸມໃສ່ການກຽມຄວາມພ້ອມດ້ານເນື້ອໃນ ທີ່ຈະນຳສະເໜີຕໍ່ ກອງປະຊຸມສະໄໝສາມັນ ເທື່ອທີ 2 ຂອງສະພາປະຊາຊົນແຂວງ ຊຸດທີ V (ຊຶ່ງຈະຈັດຂຶ້ນໃນກາງເດືອນຕຸລາ 2026 ນີ້). ດັ່ງນັ້ນ, ທ່ານປະທານກອງປະຊຸມ ຈຶ່ງໄດ້ຮຽກຮ້ອງໃຫ້ບັນດາທ່ານຜູ້ເຂົ້າຮ່ວມ ຈົ່ງເພີ່ມທະວີຄວາມຮັບຊອບສູງ, ສຸມສະຕິປັນຍາ, ແລກປ່ຽນບົດຮຽນ-ຄຳຄິດຄຳເຫັນຢ່າງກົງໄປກົງມາ ແລະ ເປັນເອກະພາບ ເພື່ອເຮັດໃຫ້ການດຳເນີນກອງປະຊຸມ ບັນລຸຜົນສໍາເລັດຕາມຄາດໝາຍທີ່ວາງໄວ້. (ຂ່າວ: ແຂວງວຽງຈັນ)
ຄໍາເຫັນ