 |
ກອງປະຊຸມຄັ້ງນີ້: ເພື່ອທົບທວນຄວາມຄືບໜ້າກ່ຽວກັບການຄ້າຂາຍຜະລິດຕະພັນປ່າໄມ້, ການຮັບ ຮອງໄມ້ຖືກກົດໝາຍ ແລະ ມາດຕະຖານພາຍໃນອາຊຽນ, ໃນນັ້ນ ກອງປະຊຸມໄດ້ລົງເລິກຫົວຂໍ້ສຳຄັນ ຄື: ຄວາມຄືບໜ້າຂອງ ASEAN C&I ສຳລັບການຮັບຮອງໄມ້, ການປັບປຸງແນວທາງການຕິດຕາມໄມ້ (Chain of Custody), ການຄ້າຂາຍເຄື່ອງປ່າຂອງດົງໃນຂົງເຂດອາຊຽນ ແລະ ການຮ່ວມມືກັບອົງການ EFI, AFoCO, ITTO, EU-TAF GTEI ແລະ ອື່ນໆ.
ທ່ານ ທຸມທອນ ວົງວີສຸກ ກ່າວວ່າ: ກອງປະຊຸມຄັ້ງນີ້ຈະໄດ້ປຶກສາຫາລືໃນຫຼາຍຫົວຂໍ້ທີ່ສຳຄັນ ປະກອບມີ: ເສີມສ້າງການຈັດຕັ້ງປະຕິບັດບັນດາເງື່ອນໄຂ ແລະ ຕົວຊີ້ວັດຂອງອາຊຽນ ASEAN Criteria and Indicators (C&I) ສຳລັບການຄຸ້ມຄອງທີ່ຖືກກົດໝາຍ ແລະ ການຢັ້ງຢືນການຄຸ້ມ ຄອງປ່າໄມ້, ສ້າງລະບົບການຢັ້ງຢືນຄວາມຖືກຕ້ອງທາງດ້ານກົດໝາຍຂອງໄມ້ ແລະ ລະບຽບການຕິດ ຕາມການຄຸ້ມຄອງໄມ້, ສົ່ງເສີມການຄ້າ ແລະ ການພັດທະນາຜະລິດຕະພັນປ່າໄມ້ທີ່ບໍ່ແມ່ນໄມ້ non-timber forest products (NTFPs), ລວມທັງພືດທີ່ນຳໃຊ້ເຂົ້າໃນການປິ່ນປົວ ແລະ ພືດສະໝຸນໄພ ແລະ ການຂະຫຍາຍເວທີໃນພາກພື້ນເພື່ອແລກປ່ຽນຄວາມຮູ້, ສ້າງນະວັດຕະກຳ ແລະ ສ້າງຄວາມ ສາມາດ.
ທ່ານກ່າວຕື່ມວ່າ: ການປຶກສາຫາລືກັນໃນຄັ້ງນີ້ ບໍ່ພຽງແຕ່ເປັນເລື່ອງດ້ານວິຊາການເທົ່ານັ້ນ, ແຕ່ ມັນຍັງມີຄວາມສຳພັນໂດຍກົງກັບບຸລິມະສິດທີ່ກວ້າງຂວາງຂອງອາຊຽນເຊັ່ນ: ຄວາມທົນທານຕໍ່ສະພາບດິນ ຟ້າອາກາດ, ການອະນຸລັກຊີວະນາໆພັນ ແລະ ການເຊື່ອມໂຍງເສດຖະກິດແບບຍືນຍົງພາຍໃຕ້ປະຊາຄົມ ເສດຖະກິດອາຊຽນASEAN Economic Community (AEC), ສ່ວນໜຶ່ງຂອງຄຳໝັ້ນສັນຍາຂອງ ພວກເຮົາຕໍ່ກັບການຄຸ້ມຄອງປ່າໄມ້ແບບຍືນຍົງ, ປະເທດສະມາຊິກອາຊຽນຈຳເປັນຕ້ອງຮ່ວມມືກັນ ເພື່ອຕ້ານການຄ້າສັດ ແລະ ພືດຜິດກົດໝາຍ, ໂດຍສະເພາະສາຍພັນທີ່ຖືກຂຶ້ນບັນຊີຫວງ ຫ້າມໃນອານຸສັນຍາ ວ່າດ້ວຍການຄ້າສາກົນຊຶ່ງປະເພດສັດປ່າ ແລະ ພືດປ່າທີ່ໃກ້ຈະສູນພັນ, ການຄ້າຜິດກົດໝາຍ ທຳລາຍຄວາມພະຍາຍາມໃນການອະນຸລັກ ແລະ ເຮັດໃຫ້ຊື່ສຽງຂອງພາກພື້ນຂອງພວກເຮົາອ່ອນແອລົງໃນຕະຫຼາດສາກົນ, ພ້ອມດຽວກັນນີ້, ບັນດາປະເທດອາຊຽນຄວນສະໜັບສະໜູນ ຊຶ່ງກັນ ແລະ ກັນ ເພື່ອປົດລ໋ອກ ທ່າແຮງໃນການຄ້າທີ່ຖືກຕ້ອງຕາມກົດໝາຍຂອງຊະນິດພັນທີ່ຖືກຂຶ້ນບັນຊີ CITES, ໃຫ້ສອດຄ່ອງກັບກົດ ໝາຍພາຍໃນ ແລະ ລະບຽບການຂອງ CITES ຢ່າງຄົບຖ້ວນ, ລວມທັງການພັດທະນາ ແລະ ການອະນຸມັດຜົນການກວດສອບວ່າດ້ວຍການບໍ່ເປັນຜົນຮ້າຍ (NDFs) ໂດຍຄະນະກຳມະການພືດ ແລະ ສັດ. ການຮ່ວມມືແບບນີ້ຈະຊ່ວຍໃຫ້ການຄ້າປະກອບສ່ວນໃນທາງບວກຕໍ່ການອະນຸລັກ ແລະ ການດຳລົງ ຊີວິດແບບຍືນຍົງ.
(ຂ່າວ-ພາບ: ສຳນານ)
ຄໍາເຫັນ