ທ່ານ ເຈິ່ນແທັງເໝີ້ນ ທ່ານປະທານສະພາແຫ່ງຊາດ ໄດ້ກ່າວຄຳເຫັນເປີດກອງປະຊຸມວ່າ: ການເລືອກຕັ້ງສະມາຊິກສະພາແຫ່ງຊາດຊຸດທີ 16 ແລະ ສະມາຊິກສະພາປະຊາຊົນທຸກຂັ້ນ ອາຍຸການ 2026 – 2031 ຜ່ານມາບັນລຸຜົນສຳເລັດຢ່າງຈົບງາມ. ໝາກຜົນການເລືອກຕັ້ງສືບຕໍ່ຢືນຢັນຄວາມໄວ້ເນື້ອເຊື່ອໃຈຂອງປະຊາຊົນທີ່ມີຕໍ່ພັກ, ລັດ. ເມື່ອກ່າວເຖິງບັນດາເນື້ອໃນຕົ້ນຕໍຂອງກອງປະຊຸມຄັ້ງນີ້, ທ່ານປະທານສະພາແຫ່ງຊາດໃຫ້ຮູ້ວ່າ: ສະພາແຫ່ງຊາດຈະພິຈາລະນາ, ຕົກລົງສ້າງໂຄງປະກອບການຈັດຕັ້ງ ແລະ ໃຫ້ສັດຕະຍາບັນບຸກຄະລາກອນຂັ້ນສູງຂອງກົງຈັກລັດ. ນີ້ແມ່ນເນື້ອໃນຈຸດສຸມຂອງກອງປະຊຸມ, ມີຄວາມໝາຍສຳຄັນ, ຕັດສິນໂດຍກົງເຖິງຄຸນນະພາບ, ປະສິດທິຜົນການເຄື່ອນໄຫວຂອງກົງຈັກລັດໃນທັງອາຍຸການ. ສະພາແຫ່ງຊາດຈະໄດ້ພິຈາລະນາ, ຮັບຮອງເອົາກົດໝາຍ 8 ສະບັບ ແລະ ມະຕິກຳນົດກົດໝາຍ 1 ສະບັບ, ມະຕິກ່ຽວກັບໂຄງການຕິດຕາມກວດກາຂອງສະພາແຫ່ງຊາດປີ 2027, ມະຕິກ່ຽວກັບການຕິດຕາມຫົວເລື່ອງສະເພາະຂອງສະພາແຫ່ງຊາດ ແລະ ມະຕິລວມຂອງກອງປະຊຸມຄັ້ງປະຖົມມະລືກ, ສະພາແຫ່ງຊາດ ຫວຽດນາມ ຊຸດທີ 16.

ຫຼັງຈາກນັ້ນ, ທ່ານ ໂຕເລິມ ໄດ້ກ່າວຄຳປາໄສຕໍ່ໜ້າສະພາແຫ່ງຊາດ, ປະຊາຊົນ ແລະ ຜູ້ມີສິດເລືອກຕັ້ງໃນທົ່ວປະເທດ ວ່າ: ນີ້ແມ່ນກອງປະຊຸມບູລະນະການຈັດຕັ້ງກົງຈັກລັດຕາມລັດຖະທຳມະນູນ; ພ້ອມກັນນັ້ນ ກອງປະຊຸມກໍສຸມໃສ່ຫັນມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 14 ຂອງພັກກອມມູນິດ ຫວຽດນາມ ເປັນລະບອບລະບຽບການ; ສ້າງພື້ນຖານນິຕິກຳ, ລະບອບ ແລະ ກຳລັງໜູນນະໂຍບາຍ ເພື່ອໃຫ້ປະເທດຊາດກ້າວເຂົ້າສູ່ໄລຍະພັດທະນາໃໝ່.

ໃນຕອນເຊົ້າວັນທີ 6 ເມສາ ນີ້, ສະພາແຫ່ງຊາດໄດ້ເລືອກຕັ້ງປະທານສະພາແຫ່ງຊາດຊຸດທີ 16 ແລະ ໃນກອງປະຊຸມຄັ້ງນີ້, ສະພາແຫ່ງຊາດ ຈະພິຈາລະນາ, ຕົກລົງວຽກງານຈັດຕັ້ງກົງຈັກ, ບຸກຄະລາກອນ; ຮ່າງກົດໝາຍ 8 ສະບັບ, ມະຕິກຳນົດກົດໝາຍ 1 ສະບັບ… ຄາດວ່າ, ເວລາເຮັດວຽກຂອງກອງປະຊຸມຄັ້ງປະຖົມມະລືກ, ສະພາແຫ່ງຊາດ ຫວຽດນາມ ແມ່ນປະມານ 11 ວັນ.