ນະຄອນຫຼວງວຽງຈັນ, ພາຍໃຕ້ການເປັນປະທານ ຂອງ ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ແລະ ໄດ້ຮັບກຽດກ່າວເປີດໂດຍ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ແລະ ກອງປະຊຸມຄັ້ງນີ້ຍັງມີ ທ່ານຮອງລັດຖະມົນຕີຈາກ 14 ກະຊວງອ້ອມຂ້າງ, ຮອງເຈົ້າຄອງນະຄອນຫຼວງວຽງຈັນ, ບັນດາຮອງເຈົ້າແຂວງທົ່ວປະເທດ ທີ່ປະກອບເຂົ້າໃນຄະນະກໍາມະການຊີ້ນໍາລວມ; ນອກນັ້ນ, ຍັງມີບັນດາຮອງຫົວໜ້າຫ້ອງການ, ຮອງຫົວໜ້າກົມ, ຮອງຫົວໜ້າສະຖາບັນ ຈາກພາຍໃນກະຊວງການຕ່າງປະເທດ ແລະ ຂະ
ແໜງການອ້ອມຂ້າງທີ່ບັນຈຸໃນຄະນະວິຊາການ ແລະ ກອງເລຂາຂອງຄະນະກຳມະການຊີ້ນຳລວມ ເພື່ອຈັດຕັ້ງປະຕິບັດວຽກງານການທູດເສດຖະກິດ ຂອງ ສປປ ລາວ ແລະ ພາກສ່ວນກ່ຽວຂ້ອງອື່ນໆ ຊຶ່ງລວມມີຜູ້ເຂົ້າຮ່ວມທັງໝົດ ປະມານ 170 ກວ່າທ່ານ.
ໃນໂອກາດກ່າວເປີດກອງປະຊຸມ, ທ່ານ ສະເຫຼີມໄຊ ກົມມະສິດ ໄດ້ຍົກໃຫ້ເຫັນເຖິງຄວາມໝາຍຄວາມສໍາຄັນ ແລະ ຈຸດປະສົງຂອງການທູດເສດຖະກິດ ແມ່ນເພື່ອສ້າງຄວາມເຂັ້ມແຂງໃຫ້ແກ່ລະບົບເສດຖະກິດ-ການເງິນ ຂອງຊາດ ແລະ ປະກອບສ່ວນໃຫ້ແກ່ການຮ່ວມມື ເພື່ອການພັດທະນາ ເສດຖະກິດ-ການເງິນ ໃນລະດັບພາກພື້ນ ແລະ ສາກົນໃຫ້ນັບມື້ນັບຫຼາຍຂຶ້ນ, ແນໃສ່ສົ່ງເສີມ ແລະ ຍົກລະດັບການຮ່ວມມືດ້ານການຄ້າ, ການລົງທຶນ ແລະ ການເຊື່ອມໂຍງ-ເຊື່ອມຈອດ ພາກພື້ນ ແລະ ສາກົນ ຂຶ້ນສູ່ມິຕິໃໝ່, ພ້ອມທັງສົ່ງເສີມການພັດທະນາເສດຖະກິດ-ສັງຄົມ ແຫ່ງຊາດ ແບບຍືນຍົງ ແລະ ໄປຕາມທິດສີຂຽວ, ສົ່ງເສີມການຮ່ວມມືດ້ານເຕັກນິກວິຊາການ ແລະ ຍົກລະດັບຄຸນນະພາບຊີວິດການເປັນຢູ່ຂອງປະຊາຊົນ ແລະ ຫຼຸດຜ່ອນຄວາມທຸກຍາກເທື່ອລະກ້າວ.
ຈຸດປະສົງການຈັດກອງປະຊຸມຄັ້ງນີ້ ແມ່ນເພື່ອລຸລ່ວງໜ້າທີ່ຮັບຜິດຊອບຕາມກົນໄກປະສານງານຂອງຄະນະຮັບຜິດຊອບແຕ່ລະຂັ້ນ ໃຫ້ຮັບຊາບ ແລະ ເປັນເອກະພາບກັນລະຫວ່າງ ບັນດາຂະແໜງການທີ່ກ່ຽວຂ້ອງ ຂັ້ນສູງກາງ ແລະ ທ້ອງຖິ່ນ, ໂດຍແນໃສ່ເພີ່ມທະວີການຮ່ວມມືກັນໃນການຈັດຕັ້ງປະຕິບັດວຽກງານການທູດເສດຖະກິດຂອງ ສປປ ລາວ ໃຫ້ປະກົດຜົນເປັນຈິງ ແລະ ມີລະບົບກົນໄກທີ່ສາມາດຈັດຕັ້ງປະຕິບັດໄດ້ຢ່າງມີປະສິດທິພາບ ແລະ ປະສິດທິຜົນຍິ່ງຂຶ້ນ.
ກອງປະຊຸມຄັ້ງນີ້ ຄະນະຜູ້ແທນ ໄດ້ຮັບຟັງການລາຍງານສະພາບລວມຄວາມເປັນມາໂດຍ ທ່ານ ສົມບູນ ສີຫານາດ ຫົວໜ້າກົມເສດຖະກິດ ກະຊວງການຕ່າງປະເທດ ແລະ ທັງເປັນຫົວໜ້າຄະນະວິຊາການ ແລະ ກອງເລຂາ ຂອງຄະນະກຳມະການຊີ້ນຳລວມ ເພື່ອຈັດຕັ້ງປະຕິບັດການທູດເສດຖະກິດ ຂອງ ສປປ ລາວ, ເພື່ອສ້າງກົນໄກການຈັດຕັ້ງປະຕິບັດການທູດເສດຖະກິດ, ການເຜີຍແຜ່ນິຕິກໍາຕ່າງໆທີ່ເປັນບ່ອນອີງ ໂດຍສະເພາະ ບັນດາກົນໄກ ແລະ ຈຸດປະສານງານທີ່ທຸກພາກສ່ວນມີສ່ວນຮ່ວມ, ລວມທັງຄວາມຄືບໜ້າການຈັດຕັ້ງປະຕິບັດຜ່ານມາ ແລະ ແຜນວຽກໃນຕໍ່ໜ້າ, ພ້ອມທັງກອງປະຊຸມຍັງໄດ້ຮັບຟັງລາຍງານກ່ຽວກັບດ້ານທ່າແຮງຂອງ ສປປ ລາວ ແລະ ສິ່ງອຳນວຍຄວາມສະດວກ ເພື່ອກະກຽມຄວາມພ້ອມໃຫ້ແກ່ການຄ້າ, ການລົງທຶນ, ການທ່ອງທ່ຽວ, ກະສິກຳ ແລະ ພະລັງງານ ຂອງ ສປປ ລາວ ເຮົາ ໃຫ້ແກ່ບັນດາຜູ້ເຂົ້າຮ່ວມ ໂດຍສະເພາະ ສຳນັກງານຜູ້ຕາງໜ້າຂອງ ສປປ ລາວ ປະຈຳຕ່າງປະເທດ ທີ່ເປັນຜູ້ມີບົດບາດສຳຄັນ ແລະ ເປັນປ້ອມດ້ານໜ້າໃຫ້ແກ່ການຈັດຕັ້ງປະຕິບັດວຽກງານການທູດເສດຖະກິດ ແລະ ໝູນໃຊ້ຂໍ້ມູນເຫຼົ່ານັ້ນເຂົ້າໃນວຽກງານຕົວຈິງຂອງຕົນ.
ກອງປະຊຸມຄັ້ງນີ້ ຄະນະຜູ້ແທນ ໄດ້ ແລກປ່ຽນຄໍາຄິດຄໍາເຫັນ ແລະ ມີຫຼາຍຂໍ້ສະເໜີທີ່ມີລັກສະນະສ້າງສັນ, ກົງໄປກົງມາ ເພື່ອປະກອບສ່ວນເຂົ້າໃນການຈັດຕັ້ງປະຕິບັດວຽກງານການທູດເສດຖະກິດໃນຕໍ່ໜ້າໃຫ້ມີບາດກ້າວຂະຫຍາຍຕົວຍິ່ງຂຶ້ນ ແລະ ເປັນກໍາລັງແຮງໜຶ່ງໃນການພັດທະນາ ເສດຖະກິດ-ສັງຄົມ ແຫ່ງຊາດ ໃຫ້ນັບມື້ມີທ່າອ່ຽງທີ່ດີຂຶ້ນ.
ຂ່າວ: ກະຊວງການຕ່າງປະເທດ
ຄໍາເຫັນ