ຈຸດປະສົງໃນກອງປະຊຸມຄັ້ງນີ້ແມ່ນເພື່ອປຶກສາຫາລືວິທີການແກ້ໄຂສຸກເສີນ ແລະ ຟື້ນຟູໄພພິບັດຈາກພະຍຸໝາກເຫັບຕົກຢູ່ນະຄອນຫຼວງວຽງຈັນ, ໃນໂອກກາດນີ້ ທ່ານ ອິນປອງ ທຸມມາ ເລຂາພັກເມືອງເຈົ້າເມືອງສີໂຄດຕະບອງ ໄດ້ລາຍງານວ່າ: ການເຄື່ອນໄຫວວຽກງານຕົວຈິງ ຄັ້ງວັນທີ 26 ມີນາ 2026, ຄະນະກຳມະການປົກຄອງ ນະຄອນຫຼວງວຽງຈັນ ຊາບວ່າ: ໃນວັນທີ 22 ມີນາ 2026 ໄດ້ມີພາຍຸລະດູຮ້ອນເກີດຂຶ້ນ ຊຶ່ງມີພາຍຸລົມແຮງ, ຝົນຕົກໜັກ ແລະ ເກີດມີໝາກເຫັບຕົກເປັນຈຳນວນຫຼາຍ ຢູ່ເມືອງສີໂຄດຕະບອງ ໂດຍສະເພາະແມ່ນຢູ່ເຂດກຸ່ມບ້ານໃໝ່ ແລະ ກຸ່ມໜອງໜ່ຽວ ລວມມີ ຈໍານວນ 10 ບ້ານ, ທີ່ໄດ້ຮັບຜົນກະທົບ ຊຶ່ງເຮັດໃຫ້ເຮືອນຊານບ້ານສ່ອງ ແລະ ຊັບສິນຕ່າງໆຂອງປະຊາຊົນໄດ້ຮັບຄວາມເສຍຫາຍເປັນຈໍານວນຫຼວງຫຼາຍ ຜ່ານການເກັບກຳຂໍ້ມູນເບື້ອງຕົ້ນສາມາດສັງລວມໄດ້ໂດຍຫຍໍ້ ດັ່ງນີ້: ມີຈຳນວນຫຼັງຄາເຮືອນທັງໝົດ 11,060 ຫຼັງ, ຫຼັງຄາເຮືອນໄດ້ຮັບຜົນກະທົບຈຳນວນ 5,516 ຫຼັງ, ລົດໃຫຍ່ 54 ຄັນ, ລົດຈັກ 2 ຄັນ, ອາຄານ-ຫ້ອງການ 5 ຫຼັງ, ໂຮງຮຽນ 11 ຫຼັງ ແລະ ວັດ 2 ແຫ່ງ.
ທ່ານ ບຸນຊູ ພະວິເສດ ຮອງເລຂາພັກເມືອງ ປະທານຄະນະກຳມະການປົກຄອງເມືອງ ນາຊາຍທອງ ໄດ້ລາຍງານວ່າ: ເມືອງນາຊາຍທອງໄດ້ຮັບຜົນກະທົບຈາກພາຍຸໝາກເຫັບຕົກຢູ່ນະຄອນຫຼວງວຽງຈັນມີ ຈຳນວນ 8 ບ້ານ, 816 ຄອບຄົວ.
ໃນໂອກາດນີ້, ທ່ານ ອາດສະພັງທອງ ສີພັນດອນ ກໍໄດ້ເນັ້ນໜັກວ່າ: ໃຫ້ບັນດາຄະນະກຳມະການທີ່ກ່ຽວຂ້ອງຕ້ອງເລັ່ງລັດເກັບຂໍ້ມູນຜົນການເສຍຫາຍຂອງປະຊາຊົນຜູ້ທີ່ໄດ້ຮັບກະທົບຈາກພາຍຸລະດູຮ້ອນທີ່ເກີດຂຶ້ນ ແລະ ເລັ່ງສ້ອມແປງເຮືອນຊານບ້ານຊ່ອງ ແລະ ຊ່ວຍເຫຼືອປະຊາຊົນຜູ້ທີ່ໄດ້ຮັບຜົນກະທົບຈາກພາຍຸດັ່ງກ່າວ ໃຫ້ກັບຄືນສູ່ສະພາບປົກກະຕິໂດຍໄວ.
ຂ່າວ-ພາບ: ບຸນອູ້ມ
ຄໍາເຫັນ