ກອງປະຊຸມຄົບຄະນະ ກໍາມາທິການແຜນການ ການເງິນ ແລະ ການກວດສອບ

ທ່ານ ລີເບີ ລີບົວປາວ ກ່າວວ່າ: ກອງປະຊຸມຄົບຄະນະ ຂອງກໍາມາທິການແຜນການ ການເງິນ ແລະ ການກວດສອບຄັ້ງນີ້ ຈະໄດ້ພ້ອມກັນຄົ້ນຄວ້າ ພິຈາລະນາບັນຫາຕ່າງໆ ກ່ຽວກັບການເຄື່ອນໄຫວວຽກງານ ຂອງກໍາມາທິການ ແລະ ຄົ້ນຄວ້າປະກອບຄໍາເຫັນໃສ່ເອກະສານທີ່ສໍາຄັນຕ່າງໆ ທີ່ຈະເປັນເນື້ອໃນ ແລະ ບັນຫາທີ່ຈະບັນຈຸເຂົ້າໃນວາລະກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ IX ຊຶ່ງຫົວຂໍ້ເນື້ອໃນທີ່ພາກສ່ວນກ່ຽວຂ້ອງ ຂອງລັດຖະບານທີ່ຈະນໍາມາລາຍງານ ໃນກອງປະຊຸມ ລ້ວນແຕ່ຕິດພັນກັບບັນຫາສໍາຄັນ ທີ່ໄດ້ຍົກຂຶ້ນໃນກອງປະຊຸມຮ່ວມ ລະຫວ່າງ ຄະນະປະຈໍາ ກັບ ຄະນະລັດຖະບານ ແລະ ກອງປະຊຸມຮ່ວມ ລະຫວ່າງ ຄະນະປະຈໍາ ກັບອົງການກວດສອບ ແລະ ອົງການກວດກາແຫ່ງລັດ ເປັນຕົ້ນ ການຈັດຕັ້ງປະຕິບັດ ວາລະແຫ່ງຊາດ, ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ, ບັນຫາຂອງການກວດສອບ ແລະ ການກວດກາ.
ເນື້ອໃນທີ່ສະເໜີໃຫ້ຄົ້ນຄວ້າຕົກລົງແມ່ນມີຫຼາຍບັນຫາເປັນຕົ້ນແມ່ນຈະໄດ້ສະເໜີຜ່ານບົດສະຫຼຸບ ການຈັດຕັ້ງປະຕິບັດ ວຽກງານຂອງກຳມາທິການແຜນການ, ການເງິນ ແລະ ການກວດສອບຕະຫຼອດ 1 ປີ (2025) ພ້ອມກັນນັ້ນ ກໍຈະໄດ້ຮັບຟັງການລາຍງານບັນຫາສໍາຄັນຂອງຊາດທີ່ລັດຖະບານ ໄດ້ຈັດຕັ້ງປະຕິບັດຜ່ານມາຕາມມະຕິຂອງສະພາແຫ່ງຊາດໂດຍສະເພາະແມ່ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາ, ວຽກງານກວດສອບ ແລະ ກວດກາລັດ 5 ປີ ຄັ້ງທີ IX (2021-2025), ຊຶ່ງຈະລາຍງານໂດຍກະ ຊວງການເງິນ, ທະນາຄານແຫ່ງ ສປປ ລາວ, ອົງການກວດສອບແຫ່ງລັດ, ອົງການກວດກາແຫ່ງລັດ ນອກຈາກນີ້ ພວກເຮົາຈະໄດ້ມີເວລາຄົ້ນຄິດຊ່ວຍປະກອບຄໍາເຫັນ ເພື່ອຫາວິທີການແກ້ໄຂບັນຫາຮ່ວມກັນ ແລະ ສາມາດເຮັດສໍາເລັດຕາມແຜນການ.
ທ່ານ ລີເບີ ລີບົວປາວ ກ່າວຕື່ມວ່າ: ໃນກອງປະຊຸມ ທີ່ມີຄວາມໝາຍສຳຄັນນີ້ ຮຽກຮ້ອງມາຍັງບັນດາທ່ານ ທີ່ເຂົ້າຮ່ວມ ຈົ່ງໄດ້ສຸມສະຕິປັນຍາ ເຂົ້າໃນການຄົ້ນຄວ້າ, ສົນທະນາ ແລກປ່ຽນຄຳຄິດຄຳເຫັນ ໃຫ້ເລິກເຊິ່ງ ແລະ ກວ້າງຂວາງ ເພື່ອຊອກໃຫ້ເຫັນສາເຫດທີ່ເກີດຂຶ້ນຕົວຈິງທັງດ້ານດີ ແລະ ຂໍ້ຄົງຄ້າງ ເພື່ອຄົ້ນຄວ້ານໍາສະເໜີ ວິທີແກ້ໄຂ ໃຫ້ສາມາດປະຕິບັດໄດ້ໃນສະເພາະໜ້າ ແລະ ຍາວນານ ແນໃສ່ຮັບປະກັນໃຫ້ແກ່ການແກ້ໄຂ ສະພາບເສດ ຖະກິດ-ສັງຄົມ ແລະ ຄວາມມີສະຖຽນລະພາບທາງດ້ານການເງິນ, ເງິນຕາ ໃຫ້ໝັ້ນຄົງ ແລະ ເຊື່ອໝັ້ນວ່າ ກອງປະຊຸມຄັ້ງນີ້ ຈະຊ່ວຍໃຫ້ບັນດາທ່ານ ກໍາມະການ ຂອງກຳມາທິການ ແລະ ບັນດາທ່ານ ຕາງໜ້າຂະແໜງການ ຈະໄດ້ມີໂອກາດແລກປ່ຽນຄວາມຄິດຄວາມເຫັນກ່ຽວກັບສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງ ຄົມ, ແຜນງົບປະມານແຫ່ງລັດ, ແຜນເງິນຕາ, ວຽກງານກວດສອບ ແລະ ກວດກາໃນແຕ່ລະປີ ຊຶ່ງແມ່ນບັນຫາທີ່ຕິດພັນກັບ ພາລະບົດບາດ, ສິດ, ໜ້າທີ່ ແລະ ຄວາມຮັບຜິດຊອບຂອງກໍາມາທິການ ແຜນການການເງິນ ແລະ ກວດສອບ ຊຶ່ງຈະຕ້ອງໄດ້ຕີລາຄາສົມທຽບກັບ ການລົງຕິດຕາມກວດກາຕົວຈິງ ຂອງບັນດາທ່ານ ສະມາຊິກສະພາແຫ່ງຊາດ ຢູ່ບັນດາເຂດເລືຶອກຕັ້ງຂອງຕົນ ຊຶ່ງຜົນຂອງການສະແດງຄວາມຄິດຄວາມເຫັນ ຂອງບັນດາທ່ານຈະເປັນ ປະໂຫຍດຢ່າງຫຼວງຫຼາຍ ໃນການເສີມຂະຫຍາຍ ແລະ ເປີດກວ້າງແນວຄວາມຄິດທີ່ດີ ໃຫ້ແກ່ສະມາຊິກສະພາແຫ່ງຊາດ ແລະ ພາກສ່ວນທີ່ກ່ຽວຂ້ອງຂອງລັດຖະບານ ເພື່ອພ້ອມກັນປະຕິບັດໜ້າທີ່ ເປັນຕົວແທນຂອງປະຊາຊົນໃຫ້ມີຄຸນນະພາບ ແລະ ປະສິດທິຜົນກວ່າເກົ່າ.
(ຂ່າວ: ແສງຈັນ)