ກອງປະຊຸມຄົບຄະນະບໍລິຫານງານ ສະຫະພັນແມ່ຍິງເມືອງເງິນ ຄັ້ງທີ 5 ສະໄໜທີ V

ທ້າຍອາທິດຜ່ານມານີ້ ຢູ່ທີ່ຫ້ອງປະຊຸມຫ້ອງວ່າການເມືອງເງິນ ແຂວງໄຊຍະບູລີ ໄດ້ຈັດກອງປະຊຸມຄົບຄະນະບໍລິຫານງານ ສະຫະພັນແມ່ຍິງເມືອງ ຄັ້ງທີ 5 ສະໄໜທີ V ຂຶ້ນ, ພາຍໃຕ້ການເປັນທານຂອງສະຫາຍ ນາງ ວຽງທອງ ສີຫາວົງ ກໍາມະການພັກເມືອງ ຄະນະບໍລິຫານງານສະຫະພັນແມ່ຍິງແຂວງ ປະທານສະຫະພັນແມ່ຍິງເມືອງ, ມີສະຫາຍ ອິນເນດ ຂຽວສີຟ້າ ຄະນະປະຈໍາພັກເມືອງ ປະທານແນວລາວສ້າງຊາດເມືອງ ຜູ້ຊີ້ນໍາອົງການຈັດຕັ້ງມະຫາຊົນ, ມີພາກສ່ວນກ່ຽວຂ້ອງທົ່ວເມືອງເຂົ້າຮ່ວມ.
    ກອງປະຊຸມ ສະຫາຍ ນາງ ວຽງຈິດ ພົມມະຈິດ ຮອງປະທານສະຫະພັນແມ່ຍິງເມືອງ ໄດ້ຜ່ານບົດສະຫຼູບ ການຈັດຕັ້ງປະຕິບັດວຽກງານຂອງສະຫະພັນແມ່ຍິງປະຈໍາປີ 2023 ແລະ ທິດທາງແຜນການ ປີ 2024. ໃນໄລຍະ 1 ປີ ຜ່ານມາຄະນະບໍລິຫານງານສະຫະພັນແມ່ຍິງເມືອງເງິນ ໄດ້ນໍາພາສະມາຊິກເອື້ອຍນ້ອງແມ່ຍິງບັນດາເຜົ່າ ໃນທົ່ວເມືອງ ເຂົ້າຮ່ວມເຊື່ອມຊືມ ແນວທາງນະໂຍບາຍຂອງພັກ-ລັດ, ລັດຖະທໍາມະນູນ, ກົດໜາຍ, ແຜນພັດທະນາເສດຖະກິດ-ສັງຄົມ ທີ່ຄະນະພັກອົງການປົກຄອງເມືອງຈັດຂຶ້ນ 11 ຄັ້ງ, ມີຜູ້ເຂົ້າຮ່ວມທັງໜົດ 1.825 ເທື່ອຄົນ ຍິງ 744 ເທື່ອຄົນ, ພ້ອມທັງຈັດພິທີເລົ່າຄືນມູນເຊື້ອ ວັນສໍາຄັນຂອງຊາດ ຂອງພັກ, ຂອງແມ່ຍິງ, ວັນສ້າງຕັ້ງສະຫະພັນແມ່ຍິງລາວຄົບຮອບ 68 ປີ, ວັນເດັກນ້ອຍສາກົນ, ວັນສາກົນຢຸດຕິການໃຊ້ແຮງງານເດັກ,  ແລະ ວັນສາກົນຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ.  ທົ່ວເມືອງ ມີ 40 ໜ່ວຍ, ໃນນີ້ໜ່ວຍອ້ອມຂ້າງ 18 ໜ່ວຍ ແລະ ຮາກຖານບ້ານ 22 ຮາກຖານ, ມີ 187 ຈຸຮ່ວມຊີວິດ, ມີສະມາຊິກທັງໜົດ 2.363 ສະຫາຍ, ໄດ້ສໍາເລັດການປັບປຸງການຈັດຕັ້ງ ແລະ ເປີດກອງໃຫຍ່ແມ່ຍິງຢູ່ສໍານັກງານ-ອົງການ ແລະ ຮາກຖານບ້ານ 22 ບ້ານໃນທົ່ວເມືອງ. ໃນກອງປະຊຸມ, ກໍ່ໄດ້ຮັບຟັງບົດສໍາຫຼວດການນໍາພາລວມ, ຜ່ານແຜນໂຄງການດໍາເນີນງານປີ 2024 ແລະ ຜ່ານລະບຽບກອງທືນຊ່ວຍເຫຼືອເອື້ອຍນ້ອງແມ່ຍິງ.
(ຂ່າວ: ສຸລິຍາ ແສງເດືອນ)