 |
ໃນກອງປະຊຸມ, ສະຫາຍ ພົຈວ ຫຸມພັນ ຜິວເຂັມພອນ ຄະນະພັກກະຊວງ ຮອງເລຂາຄະນະພັກກົມໃຫຍ່ ຮອງຫົວໜ້າກົມໃຫຍ່ການເມືອງ ປກສ ໄດ້ຜ່ານບົດສະຫຼຸບຕີລາຄາການເຄື່ອນໄຫວນຳພາ-ຊີ້ນຳຂອງຄະນະບໍລິຫານງານພັກ ກົມໃຫຍ່ການເມືອງ ປກສ ປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2026 ຍົກໃຫ້ເຫັນຜົນງານດ້ານຕ່າງໆ ເປັນຕົ້ນແມ່ນໄດ້ເປັນເຈົ້າການສຶກສາອົບຮົມການເມືອງ-ແນວຄິດ, ການເຜີຍແຜ່ມະຕິຄຳສັ່ງ ແລະ ມູນເຊື້ອວັນສຳຄັນຕ່າງໆ ລວມ 6 ຄັ້ງ ມີຜູ້ເຂົ້າຮ່ວມ 2,860 ເທື່ອສະຫາຍ, ສຳເລັດການສະເຫຼີມສະຫຼອງວັນສ້າງຕັ້ງກົມໃຫຍ່ການເມືອງ ຄົບຮອບ 61 ປີ.
ພ້ອມນີ້, ກໍໄດ້ຍູ້ແຮງວຽກງານສື່ມວນຊົນ ປກສ ໃນການໂຄສະນາວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ຕອບຕ້ານຖ້ອຍທຳນອງບິດເບືອນຢ່າງທັນການ; ດ້ານວຽກງານກໍ່ສ້າງພັກ-ພະນັກງານ ແລະ ກໍ່ສ້າງກຳລັງ, ໄດ້ຍຶດໝັ້ນຕາມ 5 ຫຼັກການ 3 ທິດນຳຂອງພັກ ແລະ ປະຕິບັດເຂັ້ມງວດຫຼັກການລວມສູນປະຊາທິປະໄຕ ຕິດພັນກັບການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ. ໃນ 6 ເດືອນຜ່ານມາ, ໄດ້ສ້າງ ຕັ້ງໜ່ວຍພັກເພີ່ມ 3 ໜ່ວຍ, ປັບປຸງຮາກຖານພັກ 4 ໜ່ວຍ, ບົ່ງຕົວແຕ່ງຕັ້ງຄະນະພັກ 64 ສະຫາຍ, ອະນຸມັດມະຫາຊົນກ້າວໜ້າຮຽນສະໜັບສະໜູນ 270 ສະຫາຍ, ເຂົ້າພັກສຳຮອງ 87 ສະຫາຍ ແລະ ເລື່ອນຂຶ້ນສົມບູນ 56 ສະຫາຍ. ຄຽງຄູ່ກັນນັ້ນ, ໄດ້ເອົາໃຈໃສ່ປັບປຸງກົງຈັກການຈັດຕັ້ງໃຫ້ກະທັດຮັດ, ຍົກຍ້າຍ-ແຕ່ງຕັ້ງ, ເລື່ອນຊັ້ນໃຫ້ນາຍ ແລະ ພົນຕຳຫຼວດພາຍໃນກົມໃຫຍ່ 271 ສະຫາຍ ແລະ ນຳສົ່ງໄປຍົກລະດັບ 113 ສະຫາຍ, ນຳພາ-ຊີ້ນຳບັນດາສະຖາບັນການສຶກສາ ປກສ ປັບປຸງຄຸນນະພາບການຮຽນ-ການສອນ ໂດຍສະເພາະ ໂຮງຮຽນວັດທະ ນະທຳ ປກສ ທີ່ສາມາດຍາດໄດ້ລາງວັນນັກຮຽນເກັ່ງຂັ້ນເມືອງ, ຂັ້ນແຂວງ ແລະ ຍາດໄດ້ 1 ຫຼຽນເງິນ, 4 ຫຼຽນທອງແດງ ຈາກການແຂ່ງຂັນຫຸ່ນຍົນຢູ່ປະເທດໄທ ພ້ອມທັງເອົາໃຈໃສ່ອອກແຮງງານເພີ່ມພູນຜະລິດຜົນສ້າງລາຍຮັບເຂົ້າກົມກອງຢ່າງຫຼວງຫຼາຍ.
 |
ໂອກາດນີ້, ສະຫາຍ ພົຕ ສຸລິນະ ແກ້ວປະເສີດ ໄດ້ຍ້ອງຍໍຊົມເຊີຍຕໍ່ຜົນງານຂອງຄະນະບໍລິຫານງານກົມໃຫຍ່ການເມືອງ ປກສ ທີ່ຍາດມາໄດ້ ພ້ອມເນັ້ນໃຫ້ຄະນະພັກ-ຄະນະບັນຊາທຸກຂັ້ນ ສຸມໃສ່ວຽກງານຈຸດສຸມ ເປັນ ຕົ້ນຖືເອົາວຽກງານສຶກສາອົບຮົມການເມືອງ-ແນວຄິດເປັນບຸລິມະສິດນຳໜ້າ, ເຮັດເປັນປະຈຳ ແລະ ຖືກເປົ້າໝາຍ; ຕັ້ງໜ້າປັບປຸງກໍ່ສ້າງພັກ-ພະນັກງານ ໂດຍຍຶດໝັ້ນ 5 ຫຼັກການ 3 ທິດນຳ, ປັບປຸງກົງຈັກໃຫ້ກະທັດຮັດ, ມີປະສິດທິຜົນ, ເລັ່ງໃສ່ສ້າງກຳລັງ ແລະ ນັກຮຽນ-ນັກສຶກສາໃຫ້ມີຄຸນນະພາບ ກາຍເປັນມືອາຊີບ ແລະ ຊີ້ນຳອົງການຈັດຕັ້ງມະຫາຊົນຢ່າງໃກ້ຊິດ.
ເພີ່ມທະວີການຈັດຕັ້ງປະຕິບັດນະໂຍບາຍ ແລະ ປະກັນສັງຄົມຕໍ່ພະນັກງານອາວຸໂສ, ຜູ້ປະຕິບັດໜ້າທີ່ເຂດຫ່າງໄກ ແລະ ຜູ້ເສຍສະຫຼະໃຫ້ທົ່ວເຖິງ; ເພີ່ມທະວີການກວດກາພັກ-ລັດ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນກຳລັງໃຫ້ຫຼຸດໜ້ອຍຖອຍລົງ; ເອົາໃຈໃສ່ວຽກງານເສນາທິການສັງລວມ, ຍູ້ແຮງການເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ປັບປຸງແບບແຜນວິທີເຮັດວຽກ ບົນຫຼັກການລວມສູນປະຊາ ທິປະໄຕ, ມີຄວາມສາມັກຄີເປັນເອກະພາບ, ແບ່ງງານ ແບ່ງຄວາມຮັບຜິດຊອບຈະແຈ້ງ ແລະ ສົ່ງເສີມບຸກຄົນໃຫ້ກ້າຄິດ, ກ້າເຮັດ, ກ້າຮັບຜິດຊອບ ເພື່ອເຮັດສຳເລັດໜ້າທີ່ການເມືອງທີ່ໄດ້ຮັບມອບໝາຍ.
ຂ່າວ-ພາບ: ດວງກາມົນ
ຄໍາເຫັນ