 |
ສະຫາຍ ພັນໂທ ສີແພງ ອິນທະກຸມມານ ປະທານສະຫະພັນນັກຮົບເກົ່າເມືອງ ໄດ້ກ່າວເປີດກອງປະຊຸມ. ຈາກນັ້ນ, ສະຫາຍ ສຸກວິໄລ ແດງສະຫວ່າງ ຫົວໜ້າໜ່ວຍງານບໍລິຫານສະຫະພັນນັກຮົບເກົ່າເມືອງ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານໃນໄລຍະ 1 ປີຜ່ານມາ (2025) ແລະ ວາງທິດທາງປີ 2026 ວ່າ: ໃນ 1 ປີຜ່ານມາ, ສະຫະພັນນັກຮົບເກົ່າເມືອງ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ສະມາຊິກນັກຮົບເກົ່າຢ່າງເປັນປົກກະຕິ ໂດຍໄດ້ຈັດຕັ້ງເຊື່ອມຊຶມມະຕິ, ຄຳສັ່ງ, ບົດແນະນຳ ແລະ ເອກະສານສຳຄັນຂອງພັກ-ລັດໄດ້ທັງໝົດ 5 ຄັ້ງ, ມີຜູ້ເຂົ້າຮ່ວມ 248 ເທື່ອຄົນ ຍິງ 48 ເທື່ອຄົນ. ເອົາໃຈໃສ່ຊຸກຍູ້ຂະບວນການແຂ່ງຂັນ “3 ດີ 6 ຮັກສາ” ຢ່າງກວ້າງຂວາງ ໂດຍໄດ້ລົງປະເມີນ ແລະ ປະກາດບ້ານແບບຢ່າງສະຫະພັນນັກຮົບເກົ່າເຂັ້ມແຂງໄດ້ 10 ບ້ານ ສົ່ງໃຫ້ສະຫະພັນນັກຮົບເກົ່າແຂວງຮັບຮອງສຳເລັດ. ປັດຈຸບັນ, ທົ່ວເມືອງປາກຊ່ອງມີສະມາຊິກສະຫະພັນນັກຮົບເກົ່າທັງໝົດ 768 ທ່ານ ຍິງ 147 ທ່ານ (ໃນນັ້ນເປັນນາຍ ແລະ ພົນທະຫານ 687 ທ່ານ, ນາຍ ແລະ ພົນຕຳຫຼວດ 81 ທ່ານ). ຄະນະບໍລິຫານງານສະຫະພັນນັກຮົບເກົ່າເມືອງມີທັງໝົດ 15 ທ່ານ, ປະຈຳຢູ່ຫ້ອງການສະຫະພັນນັກຮົບເກົ່າເມືອງ 3 ທ່ານ, ປະຈຳຢູ່ໜ່ວຍຮາກຖານກຸ່ມບ້ານ 12 ທ່ານ, ເອົາໃຈໃສ່ປະຕິບັດນະໂຍບາຍຕ່າງໆ ເປັນຕົ້ນ ນະໂຍບາຍປິ່ນປົວສຸຂະພາບ, ນະໂຍບາຍຊ່ວຍເຫຼືອໃນຍາມເຈັບເປັນ ແລະ ເສຍຊີວິດ, ພ້ອມທັງຊຸກຍູ້ການສ້າງເສດຖະກິດຄອບຄົວ ເຮັດໃຫ້ຊີວິດການເປັນຢູ່ຂອງນັກຮົບເກົ່າດີຂຶ້ນເລື້ອຍໆ ໂດຍມີຄອບຄົວຕົວແບບໃນການປູກຝັງ-ລ້ຽງສັດ ແລະ ບໍລິການເຖິງ 664 ຄອບຄົວ. ກອງປະຊຸມຍັງໄດ້ຮ່ວມກັນຄົ້ນຄວ້າບັນດານິຕິກຳ, ກົດລະບຽບຕ່າງໆ ທີ່ຍັງບໍ່ທັນເລິກເຊິ່ງ, ການສະຫຼຸບລາຍງານ ແລະ ການຄຸ້ມຄອງງົບປະ ມານໃນບາງດ້ານທີ່ຍັງຈຳກັດ ເພື່ອພ້ອມກັນຊອກຫາວິທີການແກ້ໄຂໃນຕໍ່ໜ້າ.
 |
ກອງປະຊຸມຍັງໄດ້ຮັບຟັງການເຜີຍແຜ່ເອກະສານ ແລະ ມະຕິຄຳສັ່ງທີ່ສຳຄັນຕ່າງໆ ໂດຍສະຫາຍ ພັນໂທ ຄຳເຜີຍ ພິລາວົງໄຊ ຮອງປະທານສະຫະພັນນັກຮົບເກົ່າເມືອງ ເປັນຕົ້ນ ຜົນສຳເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ V; ບົດແນະນຳກ່ຽວກັບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີ 6 ຮັກສາ; ຄຳສັ່ງຂອງປະທານສະຫະພັນນັກຮົບເກົ່າແຫ່ງຊາດ ວ່າດ້ວຍການຈັດຕັ້ງ, ເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຜູ້ແທນນັກຮົບເກົ່າທົ່ວປະເທດ ຄັ້ງທີ V; ແຜນດຳເນີນງານຂອງຄະນະບໍລິຫານງານສະຫະພັນນັກຮົບເກົ່າລາວ ສະໄໝທີ V ແຕ່ປີ 2026-2030; ຂໍ້ຕົກລົງວ່າດ້ວຍການແບ່ງຄວາມຮັບຜິດຊອບ ແລະ ຄຳແນະນຳຂອງປະທານກວດກາສະຫະພັນນັກຮົບເກົ່າລາວ ສະໄໝທີ V. ໃນພິທີໄດ້ມອບໃບຍ້ອງຍໍໃຫ້ກົມກອງລວມໝູ່ ແລະ ບຸກຄົນທີ່ມີຜົນງານດີເດັ່ນໃນໄລຍະຜ່ານມາ.
ຕອນທ້າຍພິທີ, ສະຫາຍ ແສງເດືອນ ສົມສະຫວັນ ໄດ້ມີຄຳເຫັນໂອ້ລົມເນັ້ນໜັກ ໃຫ້ຄະນະບໍລິຫານງານສະຫະພັນນັກຮົບເກົ່າເມືອງປາກຊ່ອງແຕ່ລະຂັ້ນ ເພີ່ມທະວີຄວາມສາມັກຄີເປັນເອກະພາບ, ສືບຕໍ່ສຶກສາອົບຮົມການເມືອງ-ແນວຄິດໃຫ້ເລິກເຊິ່ງ, ປັບປຸງກົນໄກການຈັດຕັ້ງໃຫ້ເຂັ້ມແຂງ, ຕັ້ງໜ້າຜັນຂະຫຍາຍຂໍ້ແຂ່ງຂັນ "3 ດີ 6 ຮັກ" ໃຫ້ຮອດຮາກຖານກຸ່ມບ້ານ ແລະ ສຸມໃສ່ພັດທະນາເສດຖະກິດຄອບຄົວຂອງສະມາຊິກໃຫ້ມີຄວາມເຂັ້ມ ແຂງ ເພື່ອຮັກສາມູນເຊື້ອອັນດີງາມ ປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາເມືອງປາກຊ່ອງໃຫ້ຈະເລີນກ້າວໜ້າຢ່າງບໍ່ຢຸດຢັ້ງ. ຂ່າວ: ສອນໄຊ ຈັນທະວີ
ຄໍາເຫັນ