 |
ທ່ານ ກິແກ້ວ ໄຂຄໍາພິທູນ ໄດ້ກ່າວວ່າ: ຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ໃນຖານະທີ່ເປັນເສນາທິການໃຫ້ລັດຖະບານໃນການຈັດຕັ້ງປະຕິບັດການສົ່ງເສີມຄວາມກ້າວໜ້າຂອງແມ່ຍິງ, ຄວາມສະເໝີພາບຍິງ-ຊາຍ ການລຶບລ້າງຄວາມຮຸນແຮງຕໍ່ແມ່ຍິງ, ຄວາມຮຸນແຮງຕໍ່ເດັກ, ການສົ່ງເສີມ ແລະ ປົກປ້ອງສິດທິເດັກກຳລັງສຸມໃສ່ການສະຫຼຸບຕີລາຄາການຈັດຕັ້ງປະຕິບັດແຜນດໍາເນີນງານແຫ່ງຊາດໄລຍະ (2021-2025) ໄປຄຽງຄູ່ກັບການສ້າງແຜນໄລຍະໃໝ່ (2026-2030). ໃນປີ 2024 ເປັນປີທີ່ພວກເຮົາປະເຊີນກັບສິ່ງທ້າທາຍຫຼາຍດ້ານບໍ່ວ່າຈະເປັນດ້ານເສດຖະກິດ, ໄພທຳມະຊາດ ໄດ້ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ, ພະນັກງານກໍຄືການເຄື່ອນໄຫວວຽກງານຂອງ ຄຊກມດ. ຢ່າງໃດກໍຕາມ ຄະນະກຳມາທິການແຫ່ງຊາດເພື່ອຄວາມກ້າວໜ້າແມ່ຍິງ, ແມ່ ແລະ ເດັກ, ຄະນະກຳມາທິການເພື່ອຄວາມກ້າວໜ້າແມ່ຍິງ ກະຊວງ, ອົງການ, ແຂວງ ແລະ ນະຄອນຫຼວງ ໄດ້ມີຄວາມພະຍາຍາມເອົາໃຈໃສ່ໃນການນໍາພາ-ຊີ້ນໍາ, ຕິດຕາມຊຸກຍູ້ການສົ່ງເສີມຄວາມກ້າວໜ້າຂອງແມ່ຍິງ, ຄວາມສະເໝີພາບຍິງ-ຊາຍ, ການລຶບລ້າງທຸກຮູບການຈໍາແນກຕໍ່ແມ່ຍິງ ແລະ ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ, ການສົ່ງເສີມ, ການພັດທະນາ, ການປົກປ້ອງສິດ ແລະ ຜົນປະໂຫຍດຂອງເດັກ ແລະ ການມີສ່ວນຮ່ວມຂອງເດັກ ລວມທັງການສ້າງຍຸດທະສາດ, ນິຕິກຳ, ແຜນດໍາເນີນງານແຫ່ງຊາດໃນໄລຍະ 2026-2030; ຄຽງຄູ່ກັນນັ້ນ, ກໍໄດ້ປະຕິບັດພັນທະຂອງລັດຖະບານໃນເວທີສາກົນ ພາກພື້ນ ແລະ ອາຊຽນ.
ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງການລາຍງານຄວາມຄືບໜ້າ, ຂໍ້ຄົງຄ້າງ ແລະ ສິ່ງທ້າຍໃນການຈັດຕັ້ງປະຕິບັດວຽກ ຄຊກມດ ໄລຍະຜ່ານມາໃນການຈັດຕັ້ງປະຕິບັດວຽກສົ່ງເສີມຄວາມກ້າວໜ້າຂອງແມ່ຍິງ, ຄວາມສະເໝີພາບຍິງ-ຊາຍ ແລະ ການສົ່ງເສີມ ແລະ ປົກປ້ອງເດັກຢູ່ ສປປ ລາວ ໂດຍສັງເຂບ ແລະ ຄວາມຄືບໜ້າຂອງ ຄກມດ ແຕ່ລະຂະແໜງການໃນການຈັດຕັ້ງປະຕິບັດວຽກງານດັ່ງກ່າວ ທີ່ຕິດພັນກັບຂົງເຂດ ແລະ ຄວາມຮັບຜິດຊອບຂອງພາກສ່ວນຕົນ. ພ້ອມກັນນີ້, ຍັງໄດ້ປຶກສາຫາລືແລກປ່ຽນຄໍາຄິດຄໍາເຫັນຮ່ວມກັນໃນການເຄື່ອນໄຫວ ແລະ ຈັດຕັ້ງປະຕິບັດວຽກງານເພື່ອຊອກໃຫ້ເຫັນບັນຫາອຸປະສັກ ແລະ ສິ່ງທ້າທາຍທີ່ກີດຂວາງໃນການຈັດຕັ້ງປະຕິບັດວຽກງານ ແລະ ຮ່ວມກັນຊອກຫາວິທີແກ້ໄຂໃນຕໍ່ໜ້າລວມເຖິງການແລກປ່ຽນບົດຮຽນໃນການພົວພັນ ແລະ ການປະສານງານລະຫວ່າງຂັ້ນສູນກາງ ແລະ ທ້ອງຖິ່ນເປັນເອກະພາບຮ່ວມກັນໃນການກຳນົດແຜນວຽກຈຸດສຸມສໍາລັບປີ 2025.
ຂ່າວ-ພາບ: ຍຸພິນທອງ+ບຸນອູ້ມ
ຄໍາເຫັນ