ກອງປະຊຸມລະດັບພາກພື້ນສ້າງຄວາມເຂັ້ມແຂງໃຫ້ສື່ມວນຊົນລາວໃນການລາຍງານຂ່າວສີຂຽວ

ກອງປະຊຸມຄັ້ງນີ້, ຈັດຂຶ້ນເພື່ອເພີ່ມທັກສະໃຫ້ສື່ມວນຊົນໄດ້ເຂົ້າໃຈຢ່າງເລິກເຊິ່ງໃນການຂຽນຂ່າວ, ລາຍງານຂ່າວການພັດທະນາສີຂຽວຍືນຍົງ ເປັນຕົ້ນທ່າອ່ຽງພູມອາກາດ, ສະພາບແວດລ້ອມປະຈຳພາກພື້ນ, ນະໂຍບາຍສະພາບແວດລ້ອມ, ການບໍລິຫານ ແລະ ຄວາມຮັບຜິດຊອບ, ເຕັກນິກການເລົ່າເລື່ອງສໍາລັບຜົນກະທົບຕໍ່ສິ່ງແວດລ້ອມ, ການນຳໃຊ້ເຄື່ອງມືດີຈີຕອນ ແລະ ນະວັດຕະກຳໃໝ່ມາຂຽນຂ່າວດ້ານສິ່ງແລດລ້ອມ ແລະ ທັດສະນະຂອງເພດຕໍ່ໄວໜຸ່ມ, ຊາວໜຸ່ມ ແລະ ຊຸມຊົນ.

ໂອກາດນີ້, ທ່ານ ສາຄອນ ພົມມະລາດ ໄດ້ກ່າວວ່າ: ສື່ມວນຊົນມີບົດບາດສໍາຄັນຫຼາຍໃນການກະຈາຍຂໍ້ມູນຂ່າວສານສູ່ສັງຄົມ ຊຶ່ງສະທ້ອນໃຫ້ເຫັນທັງໃນດ້ານບວກ ແລະ ດ້ານລົບຕໍ່ການດໍາລົງຊີວິດປະຈໍາວັນຂອງຄົນໃນຍຸກດີຈີຕອນ ແລະ ຍຸກປັນຍາປະດິດ ທີ່ມີການແຂ່ງຂັນກັນພັດທະນາຢ່າງບໍ່ມີພົມແດນ ແລະ ຂອບເຂດຈໍາກັດນີ້, ສື່ມວນຊົນຍິ່ງຈະຕ້ອງໄດ້ເອົາໃຈໃສ່ເປັນພິເສດ ເພາະການຊອກຫາຂໍ້ມູນ ແລະ ກະຈາຍຂໍ້ມູນຂ່າວສານແມ່ນງ່າຍ, ສະດວກສະບາຍ, ວ່ອງໄວທັນກັບເວລາ ແລະ ໄປເຖິງຫຼາຍໆກຸ່ມເປົ້າໝາຍ ໂດຍສະເພາະຜ່ານສື່ສັງຄົມອອນລາຍ.

ສະນັ້ນ, ສື່ມວນຊົນຕ້ອງຢຶດໝັ້ນຈັນຍາບັນໃນວິຊາຊີບສື່ຢ່າງຈິງຈັງ ແລະ ເຂັ້ມງວດ ເມື່ອໄດ້ຂໍ້ມູນມາຕ້ອງໄດ້ຮິ່ນຕອງຢ່າງຮອບຄອບ ກ່ອນຈະເຜີຍແຜ່ສູ່ສາທາລະນະຊົນ.

ທ່ານ ສາຄອນ ພົມມະລາດ ໄດ້ກ່າວຕື່ມວ່າ: ໂຄງການສ້າງຄວາມເຂັ້ມແຂງໃຫ້ສື່ມວນຊົນລາວໂດຍການມີສ່ວນຮ່ວມຂອງອົງການຈັດຕັັ້ງມະຫາຊົນ ແລະ ອົງການຈັດຕັັ້ງທາງສັງຄົມ ເພື່ອການພັດທະນາສີຂຽວໃນລາວ ສະໜັບສະໜູນໂດຍສະຫະພາບເອີຣົບ ຊຶ່ງໄດ້ຮັບຮອງຈາກລັດຖະບານ ແລະ ຈະໄດ້ຈັດຕັ້ງປະຕິບັດເປັນເວລາ 4 ປີ ແລະ ປີນີ້ເປັນປີສຸດທ້າຍ.

ໃນ 3 ປີຜ່ານມາ, ໂຄງການໄດ້ຈັດຝຶກອົບຮົມຍົກລະດັບໃຫ້ສື່ມວນຊົນທັງໝົດ 16 ຄັ້ງ, ມີນັກຂ່າວເຂົ້າຮ່ວມ 409 ຄົນ, ໃນນີ້ມີທັງນັກຂ່າວຈາກພາກລັດນັບແຕ່ຂັ້ນເມືອງຮອດສູນກາງ, ອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມໂດຍສະເພາະຜູ້ໃຊ້ສື່ອອນລາຍທົ່ວໄປທີ່ມີຊື່ສຽງ. ໂຄງການຍັງໄດ້ຈັດຝຶກອົບຮົມໃຫ້ສື່ມວນຊົນອົງການສື່ລັດກາຍເປັນຄູຝຶກເພື່ອສືບຕໍ່ສົ່ງຄວາມຮູ້ດ້ານສື່ມວນຊົນຢູ່ອົງການສື່ຂອງຕົນໂດຍນໍາໃຊ້ວິທີການສົ່ງຄວາມຮູ້ ແລະ ຫຼັກສູດການສິດສອບແບບໃໝ່.

ຂ່າວ: ພູວັນ