 |
ກອງປະຊຸມຄັ້ງນີ້ ໄດ້ສະແດງຄວາມເພິ່ງພໍໃຈ ຕໍ່ຜົນສຳເລັດຂອງການຈັດຕັ້ງປະຕິບັດ ແຜນປະຕິບັດງານການຮ່ວມມືດ້ານການທ່ອງທ່ຽວ CLV, CLMV, ACMECS ໃນຊຸມປີຜ່າມາ ຊຶ່ງໄດ້ຮ່ວມກັບ ຮັບຮອງ ບັນດາເອກະສານ ທີ່ສຳຄັນ ດັ່ງນີ້:
1.ຮັບຮອງຜົນກອງປະຊຸມເຈົ້າໜ້າທີ່ອາວຸໂສການທ່ອງທ່ຽວລາວ-ກຳປູເຈຍ-ຫວຽດນາມ ຄັ້ງທີ 3 ແລະ ຮັບຊາບ ຮ່າງຂອບເຂດສິດ, ໜ້າທີ່ (TOR) ການຮ່ວມມື ກຳປູເຈຍ-ລາວ-ຫວຽດນາມ.
2.ຮັບຮອງຖະແຫຼງການ ກອງປະຊຸມ ລັດຖະມົນຕີ ກຳປູເຈຍ-ລາວ-ຫວຽດນາມ ຄັ້ງທີ 1, ຄັ້ງວັນທີ 26 ສິງຫາ 2026.
3.ຮັບຮອງ ແຜນປະຕິບັດງານຂອບການຮ່ວມມື ກຳປູເຈຍ-ລາວ-ຫວຽດນາມ ສົກປີ 2026-2028.
4.ຮັບຮອງ ຖະແຫຼງການ ກອງປະຊຸມລັດຖະມົນຕີ ACMECS ຄັ້ງທີ 7, ຄັ້ງວັນທີ 27 ສິງຫາ 2026.
5.ຮັບຮອງ ແຜນປະຕິບັດງານການຮ່ວມມື ACMECS ສົກປີ 2026-2028.
6.ຮັບຮອງ ຖະແຫຼງການ ກອງປະຊຸມລັດຖະມົນຕີ ກຳປູເຈຍ-ລາວ-ມຽນມາ-ຫວຽດນາມ ຄັ້ງທີ 8, ຄັ້ງວັນທີ 27 ສິງຫາ 2026.
7.ຮັບຮອງ ແຜນປະຕິບັດງານການຮ່ວມມື ກຳປູເຈຍ-ລາວ-ມຽນມາ-ຫວຽດນາມ ສົກປີ 2026-2028.
ເພື່ອເປັນການຜັນຂະຫຍາຍ ຄຳໝາຍໝັ້ນຂອງບັນດາ ທ່ານລັດຖະມົນຕີ ໃນຄັ້ງນີ້, ກອງປະຊຸມ ໄດ້ມອບໝາຍໃຫ້ບັນດາເຈົ້າໜ້າທີ່ອາວຸໂສ ກໍຄືບັນດາປະເທດຮັບໜ້າທີ່ປະສານງານ ໄດ້ສືບຕໍ່ສຸມໃສ່ສ້າງຜະລິດ ຕະພັນການ ທ່ອງທ່ຽວທີ່ມີຄວາມຫຼາກຫຼາຍ, ສົ່ງເສີມວຽກງານໂຄສະນາການຕະຫຼາດການທ່ອງທ່ຽວ, ມາດຕະຖານການທ່ອງທ່ຽວ, ການທ່ອງທ່ຽວເຊື່ອມຈອດ, ຫັນການທ່ອງທ່ຽວທາງດ້ານດີຈິຕອນ ເພື່ອໃຫ້ນັກທ່ອງທ່ຽວມີຄວາມສະດວກ ໃນການເຂົ້າເຖິງຂໍ້ມູນຂ່າວສານ, ສືບຕໍ່ເພີ່ມທະວີການຮ່ວມມືພາກລັດ,ພາກເອກະຊົນ ແລະ ພາກສ່ວນທີ່ກ່ຽວຂ້ອງ ແນ່ໃສ່ເຮັດໃຫ້ເກີດຜົນປະໂຫຍດສູງສຸດ ແລະ ພັດທະນາການທ່ອງທ່ຽວແບບຍືນຍົງ ເວົ້າລວມ, ເວົ້າສະເພາະແມ່ນການຜັນຂະຫຍາຍແຜນປະຕິບັດງານດ້ານການ ທ່ອງທ່ຽວ ສົກປີ 2026-2028 ໃຫ້ມີໂຄງການທີ່ເຫັນຜົນໄວ ສະທ້ອນເຖິງການຮ່ວມມືຢ່າງຕັ້ງໜ້າ ໃຫ້ກາຍເປັນໜຶ່ງຈຸດໝາຍປາຍທາງການທ່ອງທ່ຽວ ຂອງອະນຸພາກພື້ນ CLV, CLMV, ACMEC.
ບັນດາທ່ານ ລັດຖະມົນຕີ ຍັງໄດ້ສະແດງຄວາມເຫັນດີ ເປັນເອກະພາບ ຕໍ່ແນວທາງການຮ່ວມມືກັບບັນປະເທດຄູ່ເຈລະຈາ ແລະ ການຮ່ວມກັບ ບັນດາອົງການຈັດຕັ້ງສາກົນ ແນໃສ່ເຮັດໃຫ້ການທ່ອງທ່ຽວອະນຸພາກພື້ນ ມີຄວາມເຂັ້ມແຂງ ແລະ ສ້າງເງື່ອນໄຂອໍານວຍຄວາມສະດວກ ໃຫ້ແກ່ການເດີນທາງທ່ອງທ່ຽວໄປ-ມາຫາສູ່ກັນ ມີຄວາມສະດວກຫລາຍຂຶ້ນ. ໃນນັ້ນ ໄດ້ຊຸກຍູ້ສະໜັບສະໜູນ ອົງການທ່ອງທ່ຽວໂລກ ປະຈຳພາກພື້ນອາຊີປາຊີຟິກ (UN Tourism), Travelokaແລະ ສະມາຄົມທ່ອງທ່ຽວອາຊີປາຊີຟິກ (PATA) ຕໍ່ບັນດາກິດຈະກຳ ທີ່ໄດ້ສຸມໃສ່ ການທ່ອງທ່ຽວ ດິຈິຕອລ ໂດຍຜ່ານການວິເຄາະວິໄຈ ພຶດຕິກຳ ຂອງນັກທ່ອງທ່ຽວສາກົນ ລວມທັງ ການສ້າງຄວາມເຂັ້ມແຂງດ້ານບຸກຄະລາກອນ ໃຫ້ແກ່ອະນຸພາກພື້ນ.
ສໍາລັບຈໍານວນສະຖິຕິການທ່ອງທ່ຽວ ອະນຸພາກພື້ນ ກຳປູເຈຍ, ລາວ-ມຽນມາ, ໄທ ແລະ ຫວຽດນາມ ໃນປີ 2024 ໄດ້ຕ້ອນຮັບນັກທ່ອງທ່ຽວຕ່າງປະເທດຫຼາຍກວ່າ 65 ລ້ານຄົນ, 65.2 ລ້ານຄົນ ໃນປີ 2025 ຊຶ່ງໃນ 6 ເດືອນຕົ້ນປີ 2026 ມີຈຳນວນນັກທ່ອງທ່ຽວຫຼາຍກວ່າ 33 ລ້ານຄົນ ຄາດວ່າຈະລື່ນຄາດໝາຍ ຖ້າທຽບໃສ່ໄລຍະເວລາດຽວກັນ ຂອງປີ 2025 ສະແດງໃຫ້ເຫັນຢ່າງຊັດເຈນວ່າ ການທ່ອງທ່ຽວ ອະນຸພາກພື້ນ ຂອງພວກເຮົາ ໄດ້ຮັບການຂະຫຍາຍຕົວຢ່າງແຂງແຮງ.
ສປປ ລາວ ໄດ້ສະແດງຄວາມເປັນເອກະພາບ ແລະ ໄດ້ກຳນົດທິດທາງແຜນພັດທະນາການທ່ອງທ່ຽວ ຂອງ ສປປ ລາວ ສົກປີ 2026-2030 ໃຫ້ສອດຄ່ອງກັບແຜນປະຕິບັດງານດ້ານການທ່ອງທ່ຽວ ຂອງອະນຸພາກພື້ນ CLV, CLMV, ACMECS ໄລຍະປີ 2026-2028 ຢ່າງມີຍຸດທະສາດ ແລະ ຕັ້ງໜ້າ. ໂດຍສະເພາະໃນດ້ານການພັດທະນາ ແລະ ການເຊື່ອມໂຍງຜະລິດຕະພັນການທ່ອງທ່ຽວ, ສປປ ລາວ ຍັງໄດ້ສຸມໃສ່ ບູລິມະສິດ ການພັດທະນາຜະລິດຕະພັນການທ່ອງທ່ຽວທີ່ມີຄຸນນະພາບສູງ ແລະ ຍືນຍົງ ເປັນຕົ້ນແມ່ນ ການທ່ອງທ່ຽວແບບອະນຸລັກ, ການທ່ອງທ່ຽວຊີວະນາໆພັນ ແລະ ການທ່ອງທ່ຽວມໍຣະດົກວັດທະນະທຳ. ພ້ອມທັງຊຸກຍູ້ໃຫ້ເຊື່ອມໂຍງລາຍການທ່ອງທ່ຽວຂອງ ສປປ ລາວ ກັບບັນດາປະເທດທີ່ມີຊາຍແດນຕິດຈອດກັນກັບ ສປປ ລາວ.
ຄຽງຄູ່ກັນນັ້ນ, ການທ່ອງທ່ຽວ ຫັນເປັນດິຈິຕອລ ກໍເປັນໜຶ່ງໃນວຽກງານບູລິມະສິດ ເພື່ອສ້າງໃຫ້ເປັນການທ່ອງທ່ຽວທັນສະໄໝ ຫຼື Smart Tourism ເພື່ອບັນລຸຕົວເລກຄາດໝາຍ ຕ້ອນຮັບນັກທ່ອງທ່ຽວ ສາກົນ ມາທ່ຽວ ສປປ ລາວ ໃຫ້ໄດ້ 22 ລ້ານຄົນ ແຕ່ນີ້ ຮອດປີ 2030.
 |
ກອງປະຊຸມລັດຖະມົນຕີ ດ້ານການທ່ອງທ່ຽວ ກຳປູເຈຍ-ລາວ-ຫວຽດນາມ (CLV) ຄັ້ງທີ 1, ກຳປູເຈຍ-ລາວ-ມຽນມາ-ຫວຽດນາມ (CLMV) ຄັ້ງທີ 8 ແລະ ຂອບການຮ່ວມມືແອັກແມັກ (ACMECS) ຄັ້ງທີ 7 ແລະ ກິດຈະກຳປິ່ນອ້ອມ ໄດ້ຈັດຂຶ້ນໃນໄລຍະ ງານວາງສະແດງການທ່ອງທ່ຽວ ສາກົນ ໂຮ່ຈິມິນ ຄັ້ງທີ 20 ຊຶ່ງເປັນງານມະຫະກໍາທ່ອງທ່ຽວສາກົນ ເພື່ອເພີ່ມທະວີການໂຄສະນາຜະລິດຕະພັນການທ່ອງທ່ຽວ, ຂະຫຍາຍຕະຫຼາດການທ່ອງທ່ຽວ ແລະ ພາກທຸລະກິດປິ່ນອ້ອມເພື່ອເຊື່ອມໂຍງເຊື່ອມຈອດກັບຕະຫຼາດທ່ອງທ່ຽວພາກພື້ນ ແລະ ສາກົນ. ຊຶ່ງໄດ້ຮັບການຍອມຮັບວ່າເປັນສະຖານທີ່ຈັດງານວາງສະແດງການທ່ອງທ່ຽວ ຫຼື MICE ອັນດັບຕົ້ນໃນອາຊີ, ມີບັນດາອົງການທ່ອງທ່ຽວບັນເທດພາກພື້ນ, ສາກົນ, ບັນດາປະ ຜູ້ປະກອບການທຸລະກິດການທ່ອງທ່ຽວ, ສາຍການບິນ, ສະຖານທີ່ພັກແຮມ, ຮ້ານອາຫານ, ຜູ້ສະໜອງການບໍລິການອູດສາຫະກໍາການວາງສະແດງ MICE, ຜູ້ສະໜອງເຕັກໂນໂລຊີ, ສື່ມວນຊົນທັງພາຍໃນ ແລະ ຕ່າງປະເທດ ແລະ ຜູ້ຊື້-ຂາຍຜະລິດຕະພັນການທ່ອງທ່ຽວລະດັບສາກົນ ທີ່ໄດ້ຮັບການຄັດເລືອກ ເພື່ອສ້າງການເຊື່ອມໂຍງທຸລະກິດທີ່ມີຄຸນຄ່າສູງ ໃນທົ່ວຫວຽດນາມ, ອະນຸພາກພື້ນແມ່ຂອງ, ພາກພື້ນສາກົນ ແລະ ທົ່ວໂລກ.
ງານວາງສະແດງສາກົນ ITE HCMC 2026 ຄັ້ງນີ້ ຈັດຂຶ້ນເພື່ອສະເຫຼີມສະຫຼອງ ຄົບຮອບ 20 ປີ ພາຍໃຕ້ຫົວຂໍ້ “ການເຊື່ອມໂຍງທີ່ສົດໃສ ຈຸດໝາຍປາຍທາງການທ່ອງທ່ຽວຂອງທົ່ວໂລກ” (Vibrant Connections – Global Destinations), ມີຜູ້ເຂົ້າຮ່ວມຈາກຕ່າງປະເທດປະມານ 600 ຄົນ, ມີຜູ້ແທນລະດັບສູງຫຼາຍກວ່າຈາກພາກລັດ 50 ທ່ານ, ຜູ້ຊື້ຈາກຕ່າງປະເທດ (Buyers) 280 ຄົນ, ບັນດາບໍລິສັດທ່ອງທ່ຽວ ແລະທຸລະກິດທີ່ກ່ຽວຂ້ອງ(Sellers) ຫຼາຍກວ່າ 500 ພາກສ່ວນ ແລະ ຜູ້ມາທ່ຽວຊົມງານວາງສະແດງການທ່ອງທ່ຽວສາກົນ (ITE) ຫລາຍກວ່າ 1,000 ຄົນ.(ຂ່າວ-ພາບ: ກົມສົ່ງເສີມຕະຫຼາດການທ່ອງທ່ຽວ ກະຊວງ ວທ)
ຄໍາເຫັນ