 |
ໃນກອງປະຊຸມ, ທ່ານລັດຖະມົນຕີ ສາມກະຊວງ ໄດ້ຜັດປ່ຽນກັນຂຶ້ນນຳສະເໜີສະພາບການຂອງໂລກ, ພາກພື້ນ ແລະ ພາຍໃນປະເທດຂອງຕົນ; ພ້ອມທັງເຫັນດີໃນການສືບຕໍ່ຮັດແໜ້ນສາຍພົວພັນ ແລະ ການຮ່ວມມືຂອງສາມກະຊວງ ໃຫ້ນັບມື້ເພີ່ມທະວີຂຶ້ນໄປເລື້ອຍໆ; ກອງປະຊຸມຄັ້ງນີ້, ມີຄວາມໝາຍ-ຄວາມສຳຄັນຢ່າງຍິ່ງ ຊຶ່ງຈະໄດ້ຮ່ວມມືກັນໃນຫຼາຍດ້ານ ເປັນຕົ້ນ ການເພີ່ມທະວີກຳແໜ້ນສະພາບການແລກປ່ຽນຂໍ້ມູນຂ່າວສານ ທີ່ພົວພັນ ເຖິງຄວາມສະຫງົບ, ຄວາມບໍ່ເປັນລະບຽບຮຽບຮ້ອຍຂອງສັງຄົມ, ຮ່ວມມືກັນສະກັດກັ້ນຕ້ານອາຊະຍາກຳຄ້າມະນຸດ, ການປະສານສົມທົບສະກັດກັ້ນ ແລະ ຕ້ານຢາເສບຕິດ ແລະ ອາຊະຍາກຳທາງອອນລາຍ, ຍົກສູງໝາກຜົນການຮ່ວມມືໃນຂົງເຂດສັນຕິບານ ປະກອບສ່ວນໃນການປ້ອງກັນຄວາມສະຫງົບແຫ່ງຊາດ ໃນສະພາບການໃໝ່ ແລະ ຮັກສາຄວາມສະຫງົບບໍລິເວນຊາຍແດນຕິດຈອດ ໂດຍສະເພາະ ປະສານສົມທົບ ແລະ ຮ່ວມມືກັນລົງກວດກາລາດຕະເວນຕາມບໍລິເວນຊາຍແດນຂອງສາມປະເທດ ແນໃສ່ຊອກຮູ້ ແລະ ແກ້ໄຂບັນຫາທີ່ເກີດຂຶ້ນຢ່າງທັນການ.
 |
ໂອກາດນີ້, ທ່ານ ພົນໂທ ວັນທອງ ກອງມະນີ ໄດ້ຕາງໜ້າໃຫ້ຄະນະຜູ້ແທນຂັ້ນສູງ ກະຊວງ ປກສ ລາວ ຝາກຄວາມຢື້ຢາມຖາມຂ່າວອັນອົບອຸ່ນ ຄວາມສາມັກຄີຮັກແພງຈາກຄະນະນໍາກະຊວງ ແລະ ພະນັກງານນັກຮົບ ໃນທົ່ວກໍາລັງ ປກສ ລາວ ມາຍັງ-ບັນດາທ່ານໃນທົ່ວກໍາລັງ ປກສ-ຄະນະນໍາ, ກະຊວງພາຍໃນກຳປູເຈຍ ແລະ ຫວຽດນາມ. ພ້ອມນັ້ນ, ກໍໄດ້ສະແດງຄວາມສະໜັບສະໜູນ ແລະ ສະແດງຄວາມຍ້ອງຍໍຊົມເຊີຍມາຍັງກະຊວງພາຍໃນ ແຫ່ງຣາຊະອານາຈັກກຳປູເຈຍທີ່ໄດ້ທຸ່ມເທ ແລະ ກະກຽມຄວາມພ້ອມດ້ານຕ່າງໆ ໃນການເປັນເຈົ້າພາບຈັດກອງປະຊຸມໃນຄັ້ງນີ້; ຊຶ່ງນອກຈາກຈະເປັນການສະແດງໃຫ້ເຫັນເຖິງຄວາມເປັນເອກະພາບ ແລະ ຄວາມເອົາໃຈໃສ່ຂອງສາມກະຊວງໃນການຈັດຕັ້ງຜັນຂະຫຍາຍຖະແຫຼງການຮ່ວມຂອງສາມລັດຖະບານ ໃຫ້ກາຍເປັນຮູບປະທໍາແລ້ວຍັງເປັນໂອກາດອັນດີໃຫ້ຄະນະຜູ້ແທນຂອງສາມກະຊວງ ກໍຄື ເຈົ້າໜ້າທີ່ບັນດາແຂວງ ທີ່ມີຊາຍແດນຮ່ວມຂອງສາມປະເທດ ໄດ້ພົບປະແລກປ່ຽນບົດຮຽນນໍາກັນ, ທັງນີ້ເພື່ອຮ່ວມກັນສະກັດກັ້ນ ແລະ ຕ້ານການເຄື່ອນໄຫວການກໍ່ອາຊະຍາກຳທຸກຮູບແບບ ເພື່ອຜົນປະໂຫຍດລວມຂອງສາມປະເທດ ກຳປູເຈຍ-ລາວ-ຫວຽດນາມ.
 |
ຈາກນັ້ນ, ລັດຖະມົນຕີ ສາມກະຊວງ ກໍໄດ້ອອກຖະແຫຼງການຮ່ວມບັນຫາທີ່ສໍາຄັນ ເພື່ອຮ່ວມມືຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍເພື່ອສະຖຽນລະພາບ ແລະ ການພັດທະນາເສດຖະກິດ-ສັງຄົມ ຂອງແຕ່ລະປະເທດ ກໍຄື ການຮັບມືຢ່າງມີປະສິດທິພາບຕໍ່ສິ່ງທ້າທາຍຕ່າງໆດ້ານຄວາມສະຫງົບ ທີ່ກຳລັງເກີດຂຶ້ນ ລວມທັງອາຊະຍາກຳຂ້າມຊາດຢູ່ພາກພື້ນ ແລະ ສາກົນ ໃນສະພາບການຟື້ນຟູເສດຖະກິດ-ສັງຄົມ.
ໃນໂອກາດເດີນທາງໄປເຂົ້າຮ່ວມກອງປະຊຸມລະດັບສູງ ທີ່ນະຄອນຫຼວງພະນົມເປັນ, ທ່ານ ພົທ ວັນທອງ ກອງມະນີ ພ້ອມດ້ວຍຄະນະຜູ້ແທນຂັ້ນສູງໄດ້ເຂົ້າຢ້ຽມຂໍ່ານັບທ່ານ ສົມເດັດບໍວໍທິບໍດີ ຮຸ່ນ ມາເນັດ ນາຍົກລັດຖະ ມົນຕີ ແຫ່ງຣາຊະອານາຈັກກໍາປູເຈຍຢ່າງເປັນທາງການ ພາຍຫຼັງທີ່ໄດ້ສໍາເລັດການເຂົ້າຮ່ວມກອງປະຊຸມລັດຖະ ມົນຕີ ຄັ້ງທີ 2 ລະຫວ່າງ ສາມກະຊວງ.
 |
ໃນການພົບປະຄັ້ງນີ້, ທ່ານ ພົທ ວັນທອງ ກອງມະນີ ໄດ້ສະແດງຄວາມຂອບໃຈຢ່າງຈິງໃຈຕໍ່ທ່ານນາຍົກລັດຖະມົນຕີ ກໍາປູເຈຍ ທີ່ໄດ້ສະຫຼະເວລາອັນມີຄຸນຄ່າໃຫ້ການຕ້ອນຮັບຢ່າງອົບອຸ່ນ. ພ້ອມນີ້, ທ່ານລັດຖະ ມົນຕີ ຍັງໄດ້ນໍາເອົາຄວາມຢ້ຽມຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດຈາກການນໍາຂັ້ນສູງຂອງ ພັກ-ລັດ ສປປ ລາວ ສົ່ງເຖິງທ່ານ ສົມເດັດບໍວໍທິບໍດີ ຮຸ່ນ ມາເນັດ ພ້ອມດ້ວຍການນໍາ ແລະ ປະຊາຊົນກໍາປູເຈຍທຸກທົ່ວໜ້າ.
ທ່ານ ພົທ ວັນທອງ ກອງມະນີ ໄດ້ລາຍງານໂດຍຫຍໍ້ ກ່ຽວກັບຜົນສໍາເລັດອັນຈົບງາມຂອງກອງປະຊຸມລັດຖະມົນຕີ 3 ຝ່າຍ (ກໍາປູເຈຍ-ລາວ-ຫວຽດນາມ) ຄັ້ງທີ 2 ຊຶ່ງເປັນຂີດໝາຍອັນສໍາຄັນໃນການຮັດແໜ້ນຄວາມຮ່ວມມືດ້ານວຽກງານປ້ອງກັນຄວາມສະຫງົບ, ການສະກັດກັ້ນອາດຊະຍາກໍາຂ້າມຊາດ ແລະ ການຮັກສາສະຖຽນລະພາບ, ຄວາມເປັນລະບຽບຮຽບຮ້ອຍ ຢູ່ຕາມບໍລິເວນຊາຍແດນຂອງສາມປະເທດ ເພື່ອແນໃສ່ສ້າງຊາຍແດນແຫ່ງສັນຕິພາບ, ມິດຕະພາບ ແລະ ການພັດທະນາແບບຍືນຍົງ.
ໂອກາດດຽວກັນ, ທ່ານ ສົມເດັດບໍວໍທິບໍດີ ຮຸ່ນ ມາເນັດ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຊົມເຊີຍຕໍ່ຜົນສໍາເລັດຂອງກອງປະຊຸມ 3 ຝ່າຍໃນຄັ້ງນີ້, ພ້ອມທັງຕີລາຄາສູງຕໍ່ສາຍພົວພັນມິດຕະພາບ ແລະ ຄວາມຮ່ວມມືອັນດີງາມ ລະຫວ່າງ ກໍາປູເຈຍ-ລາວ ທີ່ມີມາແຕ່ດົນນານ ແລະ ຢືນຢັນວ່າ ຈະສືບຕໍ່ສະໜັບສະໜູນວຽກງານປ້ອງກັນຄວາມສະຫງົບ ລະຫວ່າງ ສອງກະຊວງ ກໍຄື ສາມປະເທດ ໃຫ້ມີຄວາມແໜ້ນແຟ້ນຍິ່ງໆຂຶ້ນ ໃນຕໍ່ໜ້າ.
ຂ່າວ-ພາບ: ທົງໄຊ
ຄໍາເຫັນ