ກອງປະຊຸມລັດຖະມົນຕີແຮງງານ ແລະ ສະຫວັດດີການສັງຄົມ ລາວ-ຫວຽດນາມ ຄັ້ງທີ VIII ເປີດຂຶ້ນຢ່າງເປັນທາງການ

ກອງປະຊຸມລັດຖະມົນຕີແຮງງານ ແລະ ສະຫວັດດີການສັງຄົມ ລາວ-ຫວຽດນາມ ຄັ້ງທີ VIII ໄດ້ເປີດຂຶ້ນໃນລະຫວ່າງວັນທີ 4-5 ທັນວານີ້ທີ່ນະຄອນ-ຫຼວງພະບາງແຂວງຫຼວງພະບາງສປປ ລາວ ພາຍໃຕ້ການເປັນປະທານຮ່ວມຂອງສະຫາຍນາງ ໃບຄຳ ຂັດທິຍະ ກຳມະການສູນກາງພັກລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ສປປ ລາວ ແລະ ສະຫາຍ ດາວ ຫງັອກ ຢຸງ ກຳມະການສູນກາງພັກກອມມູນິດຫວຽດນາມລັດຖະມົນຕີກະຊວງແຮງງານ-ເສຍອົງຄະ ແລະ ສັງຄົມແຫ່ງ ສສ ຫວຽດນາມ (ຮສຄ)ໂດຍມີບັນດາຮອງລັດຖະມົນຕີສອງກະຊວງ, ຕາງໜ້າກົງສູນໃຫຍ່ແຫ່ງ ສສ ຫວຽດນາມປະຈໍາແຂວງຫຼວງພະບາງພ້ອມດ້ວຍພາກສ່ວນກ່ຽວຂ້ອງຈາກສູນກາງ-ແຂວງເຂົ້າຮ່ວມ.
    ສະຫາຍນາງ ໃບຄຳ ຂັດທິຍະກ່າວວ່າ: “ກອງປະຊຸມຄັ້ງນີ້ໄດ້ຕີລາຄາສູງຕໍ່ຜົນສຳເລັດທີ່ຍາດມາໄດ້ໃນການຜັນຂະຫຍາຍຈັດຕັ້ງປະຕິບັດບົດບັນທຶກກອງປະຊຸມລັດຖະມົນຕີແຮງງານ ແລະ ສະຫວັດດີການສັງຄົມຄັ້ງທີ VII ປີ 2021 ແລະ ສະພາບການຮ່ວມມືໃນຂົງເຂດແຮງງານ ແລະ ສະຫວັດດີການສັງຄົມໄລຍະ 2021-2023,  ປຶກສາຫາລື, ແລກປ່ຽນຄໍາຄິດເຫັນ ແລະ ກໍານົດທິດທາງແຜນການຮ່ວມມືໄລຍະ 2023-2025ແນໃສ່ປະກອບສ່ວນຈັດຕັ້ງຜັນຂະຫຍາຍເນື້ອໃນຂໍ້ຕົກລົງວ່າດ້ວຍຍຸດທະສາດການຮ່ວມມືໄລຍະ 10 ປີ (2021-2030) ແລະ ສັນຍາວ່າດ້ວຍການຮ່ວມມືທະວິພາຄີໄລຍະ 5 ປີ (2021-2025) ລະຫວ່າງສອງລັດຖະບານແຫ່ງ ສປປ ລາວ ແລະ ລັດຖະບານ ສສ ຫວຽດນາມ, ບົດບັນທຶກກອງປະຊຸມຂອງຄະນະກໍາມະການຮ່ວມມືທະວິພາຄີລະຫວ່າງ ລັດຖະບານ ສປປ ລາວ ແລະ ລັດຖະບານ ສສ ຫວຽດນາມຄັ້ງທີ 46 ໃຫ້ມີປະສິດທິຜົນໃນຕໍ່ໜ້າ.ພ້ອມນັ້ນ, ກອງປະຊຸມໄດ້ເປັນເອກະພາບ ແລະ ຮ່ວມລົງນາມບົດບັນທຶກກອງປະຊຸມລັດຖະມົນຕີແຮງງານ ແລະ ສະຫວັດດີການສັງຄົມຄັ້ງທີ VIII ປີ 2023 ຮ່ວມກັນຊຶ່ງໄດ້ສຸມໃສ່ບາງເນື້ອໃນຕົ້ນຕໍຄື: ສືບຕໍ່ຜັນຂະຫຍາຍ ແລະ ທົບທວນຄືນເນື້ອໃນຂອງສັນຍາວ່າດ້ວຍການຮ່ວມມືດ້ານແຮງງານລາວ-ຫວຽດນາມ ສະບັບເຊັນປີ 2013 ໃຫ້ມີປະສິດທິຜົນ ແລະ ສອດຄ່ອງກັບສະພາບການຈັດຕັ້ງປະຕິບັດໃນປັດຈຸບັນ; ສົ່ງເສີມການຮ່ວມມືແລກປ່ຽນບົດຮຽນ ດ້ານວິຊາການ ແລະ ຂໍ້ມູນຂ່າວສານກ່ຽວກັບວຽກພັດທະນາສີມືແຮງງານ, ການຈັດຫາງານ ແລະ ການຄຸ້ມຄອງແຮງງານ, ການຮ່ວມມືແຮກສ່ຽວ, ຍົກລະດັບດ້ານເຕັກນິກວິຊາການລະຫວ່າງບັນດາສະຖານທີ່ການຝຶກວິຊາຊີບ; ຊ່ວຍເຫຼືອອຸປະກອນ, ສ້າງບັນດາຫຼັກສູດກ່ຽວກັບການພັດທະນາສີມື ແລະ ຝຶກວິຊາຊີບ; ຍາດແຍ່ງການຮ່ວມມືຝຶກອົມຮົມໄລຍະສັ້ນຈາກແຫຼ່ງທຶນຊ່ວຍເຫຼືອ (ODA) ຂອງສອງລັດຖະບານລາວ-ຫວຽດນາມໃນແຕ່ລະປີ; ສົ່ງເສີມການຮ່ວມມືແລກປ່ຽນບົດຮຽນດ້ານວິຊາການ ແລະ ຂໍ້ມູນຂ່າວສານຜູ້ອາຍຸສູງ, ຜູ້ພິການ, ເດັກດ້ອຍໂອກາດ, ການສ້າງກອງທຶນສໍາລັບເດັກ, ການສ້າງລະບົບຖານຂໍ້ມູນປົກປ້ອງເດັກ ແລະ ການຊ່ວຍເຫຼືອຜູ້ຖືກເຄາະຮ້າຍຈາກການຄ້າມະນຸດ; ແລກປ່ຽນຂໍ້ມູນຂ່າວສານວຽກງານປ້ອງກັນ ແລະ ຕອບໂຕ້ໄພພິບັດທໍາມະຊາດ; ການຫັນເປັນທັນສະໄໝ (ດີຈີຕອນ) ໃນຂົງເຂດວຽກແຮງງານ ແລະ ສະຫວັດດີການສັງຄົມ. 
ນອກນັ້ນ, ສອງຝ່າຍຍັງເຫັນດີສືບຕໍ່ການສະໜັບສະໜູນຄຳຄິດເຫັນຊຶ່ງກັນ ແລະ ກັນໃນເວທີກອງປະຊຸມຂົງເຂດພາກພື້ນ ແລະ ສາກົນ ແລະ ກອງປະຊຸມ ໄດ້ເປັນເອກະພາບກ່ຽວກັບການຈັດກອງປະຊຸມລັດຖະມົນຕີແຮງງານ ແລະ ສະຫວັດດີການສັງຄົມລາວ-ຫວຽດນາມຄັ້ງທີ IX ຈະໄດ້ຈັດຂຶ້ນຢູ່ທີ່ ສສ ຫວຽດນາມໃນປີ 2025.
ຂ່າວ-ພາບ: ກະຊວງ ຮສສ