ຮອງນາຍົກລັດຖະມົນຕີລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ, ມີບັນດາທ່ານລັດຖະມົນຕີປ້ອງກັນປະເທດອາຊຽນ ແລະ ຕີມໍແລັດສະເຕ, ທ່ານເລຂາທິການໃຫຍ່ອາຊຽນ ພ້ອມດ້ວຍ ບັນດາທ່ານແຂກທີ່ຖືກເຊີນ.
ໃນພິທີ, ທ່ານ ພົນເອກ ຈັນສະໝອນ ຈັນຍາລາດ ຕາງໜ້າ ກະຊວງປ້ອງກັນປະເທດ ແຫ່ງ ສປປ ລາວ ສະແດງຄວາມຍິນດີ, ຕ້ອນຮັບ ແລະ ຂໍ່ານັບຊົມເຊີຍ ບັນດາທ່ານ ທີ່ໄດ້ເດີນທາງເຂົ້າສູ່ນະຄອນຫຼວງວຽງຈັນ, ສປປ ລາວ ເຂົ້າຮ່ວມກອງປະຊຸມລັດຖະມົນຕີປ້ອງກັນປະເທດອາຊຽນ (ADMM) ຄັ້ງທີ 18 ໃນມື້ນີ້ ຊຶ່ງໄດ້ກ່າວວ່າ: ຂ້າພະເຈົ້າໃນນາມລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ຂໍສະແດງຄວາມປິຕິຍິນດີຕໍ່ ທ່ານ ພູມທໍາ ເວດຊະຍະໄຊ ທີ່ໄດ້ຮັບການແຕ່ງຕັ້ງເປັນລັດຖະມົນຕີກະຊວງປ້ອງກັນປະເທດຄົນໃໝ່ ແຫ່ງ ຣາຊະອານາຈັກໄທ. ພ້ອມດຽວກັນນີ້, ກໍຂໍສະແດງຄວາມຊົມເຊີຍຕໍ່ຜົນສໍາເລັດຂອງອິນໂດເນເຊຍ ໃນການເປັນປະທານກອງປະຊຸມ ADMM ຄັ້ງທີ 17 ໃນປີທີ່ຜ່ານມາ ສໍາເລັດຜົນຢ່າງຈົບງາມ.
ກອງປະຊຸມຄັ້ງນີ້,ພວກເຮົາຮູ້ສຶກພາກພູມໃຈ ແລະ ເປັນກຽດຢ່າງຍິ່ງ ທີ່ໄດ້ເປັນປະທານກອງປະຊຸມ ADMM ຄັ້ງທີ 18, ພາຍໃຕ້ຄໍາຂວັນ "ຮ່ວມມືກັນເພື່ອສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງຂອງອາຊຽນ”. ພ້ອມທັງເຊື່ອໝັ້ນວ່າ ບັນດາທ່ານທີ່ເຂົ້າຮ່ວມກອງປະຊຸມລັດຖະມົນຕີປ້ອງກັນປະເທດອາຊຽນ-ວົງແຄບ ແລ້ວ ທີ່ຈັດຂຶ້ນໃນຕົ້ນປີນີ້ ທີ່ຫຼວງພະບາງ. ການເຂົ້າຮ່ວມຂອງບັນດາທ່ານຄັ້ງນີ້ ສະແດງເຖິງການສະໜັບສະໜູນ ແລະ ການປະກອບສ່ວນຢ່າງຕັ້ງໜ້າ ເຂົ້າໃນການເປັນປະທານອາຊຽນຂອງ ສປປ ລາວ ກໍຄືການພົວພັນຮ່ວມມືດ້ານວຽກງານປ້ອງກັນຊາດຂອງພວກເຮົາ.
ຄືພວກເຮົາຮູ້ນໍາກັນແລ້ວວ່າ: ສະພາບການຢູ່ໃນຂົງເຂດພາກພື້ນ ແລະ ສາກົນ ຍັງສືບຕໍ່ຜັນແປຢ່າງສັບສົນ, ສະຫຼັບສັບຊ້ອນ ຊຶ່ງເປັນໄພຂົ່ມຂູ່ ແລະ ສິ່ງທ້າທາຍຕໍ່ສັນຕິພາບ, ຄວາມໝັ້ນຄົງແລະ ການຮ່ວມມື ເພື່ອການ ພັດທະນາເສດຖະກິດ-ສັງຄົມຢູ່ຂົງເຂດພາກພື້ນ ແລະ ສາກົນ, ລວມທັງທາງການທະຫານ ແລະ ບໍ່ແມ່ນທາງການ ທະຫານ, ໂດຍສະເພາະການຫັນປ່ຽນທາງດ້ານພູມສາດການເມືອງ, ການແຂ່ງຂັນຂອງປະເທດມະຫາອຳນາດ, ການແຂ່ງຂັນທາງອາວຸດ, ໄພພິບັດທາງທຳມະຊາດ ແລະ ອື່ນໆ.ຕໍ່ກັບບັນຫາດັ່ງກ່າວ, ມັນຮຽກຮ້ອງໃຫ້ພວກເຮົາຈະຕ້ອງໄດ້ສືບຕໍ່ປຶກສາຫາລື ແລະ ຊອກຫາວິທີທາງ ເພື່ອເຮັດໃຫ້ ພາກພື້ນອາຊຽນ ມີຄວາມເຂັ້ມແຂງ ແລະ ສາມາດຮັບມືກັບສິ່ງທ້າທາຍດັ່ງກ່າວຢ່າງມີຍຸດທະສາດ.
ໃນເວລາດຽວກັນນັ້ນ, ອາຊຽນພວກເຮົາຍັງສືບຕໍ່ເຮັດວຽກຮ່ວມກັນຢ່າງໃກ້ຊິດ ແລະ ຮັກສາໄດ້ຄວາມສາມັກຄີ ແລະ ຄວາມເປັນແກນກາງຂອງອາຊຽນ ເພື່ອເປັນພະລັງຂັບເຄື່ອນໃຫ້ແກ່ການພົວພັນຮ່ວມມືກັບພາຍນອກ ແລະ ມີວິທີການແກ້ໄຂບັນຫາສິ່ງທ້າທາຍຕ່າງໆ.
ທ່ານ ພົນເອກ ຈັນສະໝອນ ຈັນຍາລາດ ກ່າວຕື່ມວ່າ: ກອງປະຊຸມມຈະໄດ້ພ້ອມກັນພິຈາລະນາ ແລະ ຮັບຮອງເອົາຫຼາຍເອກະສານທີ່ສໍາຄັນ ແລະ ບັນຫາອື່ນໆທີ່ກ່ຽວຂ້ອງ ແລະ ຫວັງວ່າ ບັນດາທ່ານທີ່ເຂົ້າຮ່ວມກອງປະຊຸມ ຈະປະກອບຄໍາຄິດຄຳເຫັນເຂົ້າໃສ່ໃນເນື້ອໃນຈິດໃຈຂອງກອງປະຊຸມຄັ້ງນີ້ ດ້ວຍຄວາມສ້າງສັນ, ມີບັນຍາກາດ ແລະ ມີຄວາມເປັນເອກະພາບ, ເພື່ອເຮັດໃຫ້ກອງປະຊຸມຄັ້ງນີ້ ສໍາເລັດຜົນຕາມລະດັບຄາດໝາຍທີ່ວາງໄວ້, ເພື່ອເປັນພື້ນຖານໃຫ້ແກ່ການສືບຕໍ່ການຮ່ວມມືດ້ານວຽກງານປ້ອງກັນຊາດຂອງອາຊຽນ ແລະ ການຮັບມືສະກັດກັ້ນ ແລະ ຕ້ານກັບສິ່ງທ້າທາຍຕໍ່ຄວາມໝັ້ນຄົງໃນປັດຈຸບັນ ແລະ ອະນາຄົດ.
(ຂ່າວ-ພາບ: ແສງຈັນ, ບຸນຕອມ)
ຄໍາເຫັນ