ກອງປະຊຸມແນະນຳດ້ານວິຊາການ ການຈັດຕັ້ງປະຕິບັດວາລະແຫ່ງຊາດ

ທ່ານ ກິແກ້ວ ສິງນາວົງ ກ່າວວ່າ: ກອງປະຊຸມຄັ້ງນີ້ ຖືເປັນເວທີທີ່ມີຄວາມໝາຍສຳຄັນຢ່າງຍິ່ງ ໃນການເຜີຍແຜ່-ເຊື່ອມຊຶມ, ແນະນຳວິທີການຈັດຕັ້ງປະຕິບັດ ແລະ ປຶກສາຫາລືແລກປ່ຽນບົດຮຽນ ຮ່ວມກັບບັນດາຜູ້ທີ່ຈະປະຕິບັດຕົວຈິງ ແລະ ເຮັດໃຫ້ວາລະແຫ່ງຊາດມີຜົນສຳເລັດຕາມເປົ້າໝາຍທີ່ວາງໄວ້. ພ້ອມກັນນັ້ນ, ພາຍໃນກອງປະຊຸມ ການຄົ້ນຄວ້າ ແລະ ປຶກສາຫາລືແລກປ່ຽນໃນຫົວຂໍ້ທີ່ສຳຄັນ ເປັນຕົ້ນ: ການກຳນົດເປົ້າໝາຍ ຄອບຄົວ, ບ້ານ, ຕາແສງ, ເມືອງ ໃຫ້ສອດຄ່ອງຈະແຈ້ງ, ການນຳໃຊ້ຂໍ້ມູນຈາກຜົນຂອງການປະເມີນສະພາບພົ້ນທຸກ ແລະ ພັດທະນາ ທ້າຍສະໄໝ ປີ 2025, ການສ້າງແຜນງານ, ໂຄງການ, ກິດຈະກຳ ແລະ ການປະເມີນຜົນໂຄງການກ່ອນການສ້າງແຜນ, ຂຶ້ນແຜນງົບປະມານ ແລະ ການກຳນົດແຫຼ່ງທຶນຕ່າງໆ ງົບປະມານຂອງລັດ, ການຊ່ວຍເຫຼືອທາງການເພື່ອການພັດທະນາ ODA, ໂຄງການລົງທຶນພາຍໃນ ແລະ ຕ່າງປະເທດ FDI ແລະ ອື່ນໆ) ໃຫ້ຖືກຕ້ອງ ແລະ ທັນກັບເວລາ ທີ່ໄດ້ກຳນົດໄວ້ໃນວາລະແຫ່ງຊາດ.

ກອງປະຊຸມໄດ້ຮັບຟັງການສະເໜີບົດແນະນຳ ຈາກບັນດາຄະນະຮັບຜິດຊອບ ແລະ ວິທະຍາກອນຂັ້ນສູນກາງ ພ້ອມທັງເປີດໂອກາດໃຫ້ບັນດາຜູ້ເຂົ້າຮ່ວມໄດ້ຍົກຄໍາຖາມ, ປະກອບຄຳເຫັນ ແລະ ແລກປ່ຽນບົດຮຽນ ຮ່ວມກັນຢ່າງກົງໄປກົງມາ ແລະ ມີລັກສະນະສ້າງສັນ ເພື່ອຮັບປະກັນໃຫ້ການຈັດຕັ້ງປະຕິບັດໃນຕໍ່ໜ້າ ສາມາດດໍາເນີນ ແລະ ມີຄວາມເຂົ້າໃຈໄປໃນລວງດຽວກັນ, ໃຫ້ມີຄວາມເອກະພາບສູງ ແລະ ສາມາດນໍາໄປແນະນໍາ ຢູ່ຂັ້ນຄຸ້ມຄອງຂອງຕົນ, ໃນການຈັດຕັ້ງປະຕິບັດວຽກງານຕົວຈິງ.

(ຂ່າວ-ພາບ: ບຸນອູ້ມ)