ກອງປະຊຸມ ຄັ້ງນີ້ ໄດ້ຮັບຟັງບົດລາຍງານການຈັດຕັ້ງປະຕິບັດວຽກງານ ຂອງສະພາການຄ້າ ແລະ ອຸດສາຫະກໍາ ແຂວງຫຼວງພະບາງ ໃນໄລຍະ 5 ປີຜ່ານມາ, ສະເໜີໂດຍ ທ່ານ ບຸນທ່ຽງ ສຸລິວັນ ປະທານສະພາການຄ້າ ແລ ະອຸດສາຫະກໍາ ແຂວງ ສະໄໝທີ່ VI, ເຊິ່ງຍົກໃຫ້ເຫັນສະພາບການປະກອບສ່ວນ ການພັດທະນາເສດຖະກິດ-ສັງຄົມ ແຂວງຫຼວງພະບາງ ຂອງບັນດາສະມາຊິກ, ພ້ອມນັ້ນ ໄດ້ມີການຜ່ານທິດທາງແຜນການ 5 ປີຕໍ່ໜ້າ ແລະ ໄດ້ມີການປະກອບຄຳເຫັນຈາກບາງຕົວແບບ. ໂອກາດດຽວກັນບັນດາສະມາຊິກ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະບໍລິຫານງານ ຊຸດທີ VII ຈຳນວນ 31 ທ່ານ, ຍິງ 6 ທ່ານ, ເພື່ອເປັນຫຼັກແຫຼ່ງ ເຕົ້າໂຮມຄວາມສາມັກຄີປອງດອງ ພັດທະນາວຽກງານໃຫ້ເປັນປຶກແຜ່ນ, ສ້າງບາດລ້ຽວໃໝ່ ໃນການປະກອບສ່ວນພັດທະນາແຂວງຫຼວງພະບາງ ໃຫ້ເກີດຜົນປະໂຫຍດຕົວຈິງ, ກໍຄືການພັດທະນາປະເທດຊາດ ກ້າວຂຶ້ນຢ່າງໜັກແໜ້ນ.
ຜ່ານການດຳເນີນກອງປະຊຸມຄັ້ງປະຖົມມະລຶກ ຂອງຄະນະບໍລິຫານງານ ສະພາການຄ້າ ແລະ ອຸດສາຫະກໍາ ແຂວງຫຼວງພະບາງ ຊຸດທີ VII ໄດ້ເປັນເອກະສັນກັນຢ່າງສົມບູນ ເລືອກເອົາຄະນະປະຈໍາ ຈຳນວນ 11 ທ່ານ, ຍິງ 2 ທ່ານ, ໃນນັ້ນ ໄດ້ເລືອກເອົາ ທ່ານ ຄັດຕະພອນ ພົມມະປັນຍາ ເປັນປະທານ, ເລືອກເອົາ ທ່ານ ກົງຈັກກີ ພັນທະສົມບັດ, ທ່ານ ຄຳສິງ ຈັນທະວົງ, ທ່ານ ອາຄົມ ພົມມະຫານ, ທ່ານ ອິນແຫຼງ ວົງສຸວັນ, ທ່ານ ພະນົມໄຊ ພະການ, ທ່ານ ນາງ ດາວລຸນີ ຊະນະແກ້ວ ແລະ ທ່ານ ໂດລາ ຈັນທະຫົງ ເປັນຮອງປະທານ, ທັງໄດ້ເລືອກເອົາເປັນປະທານ-ຮອງປະທານຄະນະກວດກາ ຕື່ມອີກ.
ກອງປະຊຸມຄັ້ງນີ້ ໄດ້ມີການມອບໃບຍ້ອງຍໍ ແລະ ໂລລາງວັນຄຳ, ໂລ່ລາງວັນເງິນ ຂອງສະພາການຄ້າ ແລະ ອຸດສາຫະກຳ ແຫ່ງຊາດລາວ, ມອບໃບຍ້ອງຍໍຂອງຄະນະກຳມະການປົກຄອງແຂວງ ແລະ ຂອງສະພາການຄ້າແຂວງ ໃຫ້ຜູ້ມີຜົນງານດີເດັ່ນ ໃນການປະກອບສ່ວນພັດທະນາປະເທດຊາດ ກໍຄືພັດທະນາແຂວງຫຼວງພະບາງ, ພ້ອມນັ້ນ ໄດ້ຮັບກຽດຮັບຟັງການໂອ້ລົມຈາກ ທ່ານ ບຸນເຫລືອ ສິນໄຊວໍຣະວົງ ແລະ ທ່ານ ອຸເດດ ສຸວັນນະວົງ ເພື່ອເປັນທິດເຍືອງທາງແກ່ ການປະຕິບັດວຽກງານຂອງ ຄະນະບໍລິຫານງານ ສະພາການຄ້າ ແລະ ອຸດສາຫະກໍາ ແຂວງຫຼວງພະບາງ ຊຸດທີ VII ໃຫ້ປະກົດຜົນເປັນຈິງ.
ພາບ-ຂ່າວ: ອາພຸດເດດ ບຸບຜາ
ຄໍາເຫັນ