 |
ສະຫາຍນາງ ວັນເພັງ ຂຸນບໍໄລ ຮອງປະທານສະຫະພັນແມ່ຍິງ ສຊປລ ໄດ້ຂຶ້ນລາຍງານການຈັດຕັ້ງປະຕິບັດມະຕິກອງປະຊຸມໃຫຍ່ສະມາຊິກສະຫະພັນແມ່ຍິງ ສຊປລ ຄັ້ງທີ XII ໃນ 5 ປີຜ່ານມາ (2021-2025) ວ່າ: ຄະນະບໍລິຫານງານສະຫະພັນແມ່ຍິງ ສຊປລ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ສະມາຊິກສະຫະພັນແມ່ຍິງພາຍໃນ ສຊປລ ດ້ວຍການປຸກລະດົມເຂົ້າຮ່ວມຄົ້ນຄວ້າເຊື່ອມຊຶມແນວທາງ, ນະໂຍບາຍຂອງພັກ, ມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກ ສຊປລ, ລັດຖະທໍາມະນູນ, ກົດໝາຍ, ມູນເຊື້ອຂອງຊາດ, ຂອງພັກ, ວັນສໍາຄັນຕ່າງໆທາງປະຫວັດ ສາດ, ສະພາບການທີ່ພົ້ນເດັ່ນທັງພາຍໃນ ແລະ ຕ່າງປະເທດທີ່ຄະນະບໍລິຫານງານພັກ, ຄະນະນໍາ ສຊປລ ຈັດຂຶ້ນໄດ້ 22 ຄັ້ງ, ມີຜູ້ເຂົ້າຮ່ວມ 2,400 ເທື່ອຄົນ ຍິງ 1,600 ເທື່ອຄົນ, ຊາຍ 359 ເທື່ອຄົນ; ໄດ້ໂຄສະ ນາເຜີຍແຜ່ມະຕິກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VIII, ມູນເຊື້ອວັດທະນະທໍາອັນດີງາມຂອງຊາດ, ຄຸນລັກສະນະທີ່ເປັນມູນເຊຶ້ອຂອງແມ່ຍິງລາວ, ການສົ່ງເສີມຄວາມກ້າວໜ້າຂອງແມ່ຍິງ, ການສົ່ງເສີມຄວາມສະເໝີພາບຍິງ-ຊາຍ, ຈັດປາຖະກະຖາເລົ່າມູນເຊື້ອວັນແມ່ຍິງລາວ, ວັນແມ່ຍິງສາກົນ, ເຂົ້າຮ່ວມໂຮມຊຸມນຸມ ແລະ ຂະບວນການອື່ນໆ. ຜ່ານການສຶກສາອົບຮົມການເມືອງ-ແນວຄິດດ້ວຍຫຼາຍວິທີ ເຮັດໃຫ້ສະມາຊິກສະຫະພັນແມ່ຍິງ ສຊປລ ມີຄວາມຮັບຮູ້ເຖິງມູນເຊື້ອອັນສະຫງ່າລາສີຂອງແມ່ຍິງທີ່ຍາມໃດກໍໄດ້ຄຽງບ່າຄຽງໄຫຼ່ກັບເພດຊາຍໃນການຕໍ່ສູ້ກູ້ຊາດຍາດເອົາເອກະລາດ ອໍານາດອະທິປະໄຕ ແລະ ປະກອບສ່ວນສ້າງໜ້າປະຫວັດສາດອັນສະຫວ່າງສະໄຫວຂອງຊາດລາວນັບແຕ່ຫົວທີ ທີ່ພັກປະຊາຊົນລາວໄດ້ຮັບການສ້າງ ຕັ້ງຂຶ້ນ ເຮັດໃຫ້ເອື້ອຍນ້ອງແມ່ຍິງມີແນວຄິດອຸ່ນອ່ຽນທຸ່ນທ່ຽງ ເຊື່ອໝັ້ນຕໍ່ການນຳພາຂອງພັກ ແລະ ລັດ ສືບຕໍ່ປະຕິບັດໜ້າທີ່ ທີ່ໄດ້ຮັບການມອບໝາຍເປັນຢ່າງດີ. ພ້ອມນັ້ນ, ຍັງຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ ແລະ ທິດທາງວຽກງານສະຫະພັນແມ່ຍິງ ສຊປລ ໃນ 5 ປີ ຕໍ່ໜ້າ (2025-2030).
 |
ສະຫະພັນແມ່ຍິງ ສຊປລ ໄດ້ນໍາເອົາມະຕິກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VIII, ຄູ່ມືແນະນຳການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ 2016-2020 ມາເຜີຍແຜ່ ແລະ ເຊື່ອມຊຶມໃຫ້ແກ່ສະມາຊິກສະຫະພັນແມ່ຍິງ ສຊປລ ພ້ອມກັນຈັດຕັ້ງປະຕິບັດຂໍ້ແຂ່ງຂັນ 3 ດີ ໂດຍການເປີດຂະບວນການແຂ່ງຂັນຢ່າງຟົດຟື້ນ. ຜ່ານການຈັດຕັ້ງປະຕິບັດຂໍ້ແຂ່ງຂັນ 3 ດີ, 5 ປີ (2021-2025) ເປັນຕົ້ນ ປີ 2021 ສະມາຊິກສະຫະພັນແມ່ຍິງ ສຊປລ ມີທັງໝົດ 79 ສະຫາຍ, ເຂົ້າຮ່ວມແຂ່ງຂັນມີ 76 ສະຫາຍ, ຄັດເລືອກແມ່ຍິງ 3 ດີໄດ້ຈໍານວນ 76 ສະຫາຍ ກວມເອົາ 96.2 %; ປີ 2022 ທັງໝົດ 82 ສະຫາຍ, ເຂົ້າຮ່ວມແຂ່ງຂັນມີ 80 ສະຫາຍ, ຄັດເລືອກແມ່ຍິງ 3 ດີໄດ້ຈໍານວນ 80 ສະຫາຍ, ກວມເອົາ 97.5%; ປີ 2023 ມີທັງໝົດ 128 ສະຫາຍ, ເຂົ້າຮ່ວມແຂ່ງຂັນມີ 99 ສະຫາຍ, ຄັດເລືອກແມ່ຍິງ 3 ດີໄດ້ຈໍານວນ 99 ສະຫາຍ, ກວມເອົາ 77.3%; ປີ 2024 ມີທັງໝົດ 121 ສະຫາຍ, ເຂົ້າຮ່ວມແຂ່ງຂັນມີ 117 ສະຫາຍ, ຄັດເລືອກແມ່ຍິງ 3 ດີໄດ້ຈໍານວນ 117 ສະຫາຍ, ກວມເອົາ 91.4% ຂອງຈໍານວນຜູ້ເຂົ້າຮ່ວມແຂ່ງຂັນ; ສະຫະພັນແມ່ຍິງ ສຊປລ ປະກອບມີທັງໝົດ 5 ຮາກຖານ, 4 ໜ່ວຍ ສາມາດຄັດເລືອກເປັນສະຫະພັນແມ່ຍິງ 3 ດີ ທຸກຮາກຖານ/ໜ່ວຍຕະຫຼອດໄລຍະເວລາ 4 ປີຊ້ອນ. ຈາກນັ້ນ, ສະຫາຍ ມອນໄຊ ລາວມົວຊົ່ງ ໄດ້ສະແດງຄວາມຍ້ອງຍໍ ແລະ ຊົມເຊີຍຜົນງານຂອງແມ່ຍິງ ສຊປລ ຍາດມາໄດ້ໃນໄລຍະຜ່ານມາ ພ້ອມມີຄໍາເຫັນເນັ້ນໃຫ້ສະມາຊິກສະຫະພັນແມ່ຍິງໃນການປ່ອນບັດຄັດເລືອກເອົາຄະນະບໍລິຫານງານສະຫະພັນແມ່ຍິງ ສຊປລ ຊຸດໃໝ່.
ກອງປະຊຸມໄດ້ປ່ອນບັດຄັດເລືອກເອົາຄະນະບໍລິຫານງານສະຫະພັນແມ່ຍິງ ສຊປລ ຊຸດໃໝ່ ຊຶ່ງມີຜູ້ ສະໝັກຮັບເລືອກຕັ້ງ 11 ສະຫາຍ, ເລືອກເອົາ 9 ສະຫາຍ. ກອງປະຊຸມຄັ້ງປະຖົມມະລືກໄດ້ເປັນເອກະພາບເລືອກເອົາສະຫາຍນາງ ມີນາ ສີວິໄລ ເປັນປະທານ, ສະຫາຍນາງ ວິໄລວັນ ວົງພັກດີ ເປັນຮອງປະທານ ທັງເປັນປະທານກວດກາ, ສະຫາຍນາງ ສີໄຄເພັດ ແສງມະນີ ເປັນຮອງປະທານ, ສະຫາຍນາງ ພິດສະໄໝ ອວນສີຊົມພູ ເປັນຮອງປະທານກວດກາ. ໃນນັ້ນ, ໄດ້ເປັນເອກະພາບເລືອກເອົາຜູ້ແທນສົມບູນໄປຮ່ວມກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ IX ຈຳນວນ 3 ສະຫາຍ, ຜູ້ແທນສຳຮອງ 1 ສະຫາຍ.
ໂອກາດນີ້, ສະຫາຍນາງ ອາລີ ວົງໜໍ່ບຸນທໍາ ໄດ້ໃຫ້ກຽດໂອ້ລົມກ່ອນອື່ນໄດ້ສະແດງຄວາມຍ້ອງຍໍ ແລະ ຊົມເຊີຍຜົນງານຂອງແມ່ຍິງ ສຊປລ ຍາດມາໄດ້ໃນໄລຍະຜ່ານມາ ແລະ ສະເໜີສະຫະພັນແມ່ຍິງ ສຊປລ ເພີ່ມທະວີການສຶກສາອົບຮົມການເມືອງແນວຄິດ, ຊຸກຍູ້, ລະດົມໃຫ້ສະມາຊິກແມ່ຍິງເຂົ້າຮ່ວມຟັງປາຖະ ກະຖາມູນເຊື້ອວັນສຳຄັນຂອງຊາດ, ຂອງພັກ, ມູນເຊື້ອຂອງແມ່ຍິງລາວ ແລະ ຂອງຄະນະຊາວໜຸ່ມໂດຍຜ່ານການຈັດສຳມະນາ, ຝຶກອົບຮົມຈັດເວທີແລກປ່ຽນຄໍາຄິດຄໍາເຫັນຂອງ 3 ອົງການຈັດຕັ້ງມະຫາຊົນ ກໍຄືແມ່ຍິງ, ກໍາມະບານ ແລະ ຊາວໜຸ່ມໃຫ້ຫຼາຍຂຶ້ນ; ເພີ່ມທະວີຄວາມເປັນແບບຢ່າງນຳໜ້າ, ຄວາມສາມັກຄີພາຍໃນໝູ່ຄະນະໃຫ້ແໜ້ນແຟ້ນ, ເປັນເຈົ້າການປະຕິບັດລະບຽບ, ກົດໝາຍ, ມະຕິ, ຄຳສັ່ງຂອງພັກ-ຂອງລັດ ມີແບບ ແຜນການປະຊຸມ, ຮ່ວມຊີວິດການເມືອງເປັນປົກກະຕິ ແລະ ຕໍ່ເນື່ອງ; ເພື່ອຮັດແໜ້ນຄວາມສາມັກຄີກັບພາຍນອກ ຕ້ອງໄດ້ເພີ່ມທະວີການພົວພັນປະສານງານ ແລກປ່ຽນບົດຮຽນກັບພາກສ່ວນຕ່າງໆເພື່ອເຄື່ອນໄຫວກິດ ຈະກຳຮ່ວມກັນໃຫ້ເປັນຂະບວນຟົດຟື້ນ. ພ້ອມນັ້ນ, ສະເໜີໃຫ້ຄະນະບໍລິຫານງານພັກ ສຊປລ ຊຸກຍູ້ສົ່ງເສີມ, ກໍ່ສ້າງໃຫ້ໂອກາດ ແລະ ອຳນວຍຄວາມສະດວກໃຫ້ແກ່ເອື້ອຍນ້ອງສະຫະພັນແມ່ຍິງ ສຊປລ ໄດ້ໄປຍົກລະດັບທິດສະດີການເມືອງ, ຍົກລະດັບວິຊາສະເພາະ, ວຸດທິການສຶກສາ, ເຄື່ອນໄຫວທັງພາຍໃນ ແລະ ຕ່າງປະເທດເພື່ອນຳມາພັດທະນາການຈັດຕັ້ງ, ສະມາຊິກແມ່ຍິງໃຫ້ມີການເຕີບໃຫຍ່ໃຫ້ໄດ້ຕິດໃນຄະນະພັກ ເພື່ອເປັນກໍາລັງແຮງທີ່ເຂັ້ມແຂງໃຫ້ແກ່ຄະນະບໍລິຫານງານພັກ ສຊປລ.
(ຂ່າວ-ພາບ: ວັນເພັງ)
ຄໍາເຫັນ