ສານປະຊາຊົນສູງສຸດ ແຫ່ງ ສປປ ລາວ ແລະ ສານປະຊາຊົນຂັ້ນສູງ ເຂດປົກຄອງຕົນເອງ ເຜົ່າຈ້ວງກວາງຊີ ສປ ຈີນ ໄດ້ມີການປະຊຸມ ພົບປະແລກປ່ຽນບົດຮຽນດ້ານວິຊາການ ຂຶ້ນໃນວັນທີ 27 ພະຈິກ ນີ້ ທີ່ ສານປະຊາຊົນສູງສູດ, ນຳພາພະນັກງານຂອງສານປະຊາຊົນສູງສຸດ ແຫ່ງ ສປປ ລາວ ໂດຍທ່ານ ອານົງ ຍອຍສາຍຄໍາ ຮອງປະທານສານປະຊາຊົນສູງສຸດ ແຫ່ງ ສປປ ລາວ ແລະ ນຳພາ ສານປະຊາຊົນຂັ້ນສູງ ເຂດປົກຄອງຕົນເອງ ເຜົ່າຈ້ວງກວາງຊີ ສປ ຈີນ ໂດຍ ທ່ານ ຈ່າວ ຈື່ ຈຸ່ນ (Zhao Zhijun)ຮອງປະທານສານປະຊາຊົນຂັ້ນສູງເຂດປົກຄອງຕົນເອງ ເຜົ່າຈ້ວງກວາງຊີ ສປ ຈີນ.
ໃນການພົບປະໃນຄັ້ງນີ້: ເພື່ອເປັນການເສີມຂະຫຍາຍສາຍພົວພັນ ແລະ ການຮ່ວມມື ອັນມີມູນເຊື້ອດີງາມຂອງສອງພັກ, ສອງລັດ, ປະຊາຊົນສອງຊາດ ລາວ-ຈີນ ເວົ້າລວມ, ເວົ້າສະເພາະ ການຮັດແໜ້ນການຮ່ວມມືລະຫວ່າງ 2 ອົງການຕຸລາການຂອງ 2 ປະເທດ ໃຫ້ມີຄວາມສະໜິດສະໜົມ ແລະ ມີບາດກ້າວຂະຫຍາຍຕົວຖານເປັນປະເທດທີ່ມີອຸດົມການສັງຄົມນິຍົມຄືກັນ, ທັງເປັນການຈັດຕັ້ງປະຕິບົດບັນທຶກຄວາມເຂົ້າໃຈກ່ຽວກັບ ການຮ່ວມມືທາງດ້ານຕຸລາການລະຫວ່າງສານປະຊາຊົນສອງປະເທດ ທີ່ສານປະຊາຊົນສູງສຸດ ແຫ່ງ ສປປ ລາວ ແລະ ສານປະຊາຊົນສູງສຸດ ແຫ່ງ ສປ ຈີນ ໄດ້ລົງນາມຮ່ວມກັນໃນວັນທີ 7 ມິຖຸນາ 2017 ຜ່ານມາ ໃຫ້ເຂົ້າສູ່ລວງເລິກ ແລະ ໃຫ້ເກີດດອກອອກຜົນຍິ່ງໆຂຶ້ນ ແລະ ເປັນການຜັນຂະຫາຍາຍບົດບັນທຶກຮ່ວມມືສອງຝ່າຍລະຫວ່າງສານປະຊາຊົນສູງສຸດ ແຫ່ງ ສປປ ລາວ ແລະ ສານປະຊາຊົນສູງສຸດ ແຫ່ງ ສປ ຈີນ ແລະ ເປັນການເພີ່ມທະວີຍົກລະດັບສາຍພົວພັນຮ່ວມມືລະຫວ່າງສານປະຊາຊົນແຕ່ຂັ້ນສູນກາງລົງຮອດທ້ອງຖິ່ນໃຫ້ແໜ້ນແຟ້ນ ແລະ ເລິກເຊິ່ງເຖິງຖອງ ພ້ອມທັງຊຸກຍູ້ໃຫ້ສານປະຊາຊົນທ້ອງຖິ່ນບ່ອນທີ່ມີຊາຍແດນ ແລະ ບໍ່ມີຊາຍແດນຕິດຈອດກັນໃຫ້ໄດ້ມີການຮ່ວມມື ເພື່ອການແລກປ່ຽນບົດຮຽນ ຕາມການຕົກລົງກັນຂອງສອງຝ່າຍ.ພ້ອມນັ້ນສອງຝ່າຍກໍໄດ້ຜັດປ່ຽນກັນລາຍງານສະພາບການຈັດຕັ້ງປະຕິບັດໜ້າທີວຽກງານຂອງແຕ່ລະຝ່າຍໃຫ້ຊາບ.
ໃນວັນດຽວກັນ ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ ໄດ້ຕ້ອນຮັບ ທ່ານ ຈ່າວ ຈື່ ຈຸ່ນ ພ້ອມດ້ວຍຄະນະເຂົ້າຢ້ຽມຂໍ່ານັບພ້ອມທັງຕີລາຄາສູງ ຕໍ່ການເດີນທາງມາຢ້ຽມຢາມ ແລະ ເຮັດວຽກຮ່ວມກັບ ສານປະຊາຊົນສູງສຸດ ໃນຄັ້ງນີ້ ຊຶ່ງເປັນການປະກອບສວ່ນເສີມສ້າງຮັດແໜ້ນ ສາຍພົວພັນ ມິດຕະພາບ ແລະ ການຮ່ວມມືທີ່ມີມູນເຊື້ອດີງາມຂອງສອງພັກ, ສອງລັດ, ປະຊາຊົນສອງຊາດ ລາວ-ຈີນ ເວົ້າລວມ, ເວົ້າສະເພາະ ການຮັດແໜ້ນການຮ່ວມມືລະຫວ່າງ 2 ອົງການຕຸລາການຂອງ 2 ປະເທດ ໃຫ້ນັບມື້ເຕີບໃຫຍ່ຂະຫຍາຍຕົວຂຶ້ນເລື້ອຍໆ ແລະ ອວຍພອນໃຫ້ ທ່ານ ຈ່າວ ຈື່ ຈຸ່ນ ພ້ອມຄະນະ ຈົ່ງປະສົບຜົນສຳເລັດຢ່າງຈົບງາມໃນການຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້.
(ຂ່າວ-ພາບ:ອານຸພົນ)
ຄໍາເຫັນ