 |
ທ່ານ ອຸເດດ ສຸວັນນະວົງ ປະທານ ສຄອຊ ພ້ອມດ້ວຍຄະນະປະທານ ສຄອຊ ໄດ້ໃຫ້ການຕ້ອນຮັບຢ່າງອົບອຸ່ນຕໍ່ ທ່ານ Maxim Ryzhenkov ລັດຖະມົນຕີກະຊວງການຕ່າງປະເທດເບລາຣຸດສ ພ້ອມດ້ວຍຄະນະຜູ້ແທນຈາກພາກລັດ ແລະ ພາກທຸລະກິດຂອງເບລາຣຸດສ ທີ່ມາຢ້ຽມຢາມ ສປປ ລາວ ແລະ ເຂົ້າຮ່ວມກອງປະຊຸມຄັ້ງນີ້. ໂດຍມີຜູ້ເຂົ້າຮ່ວມຫຼາຍກວ່າ 50 ທ່ານ ຈາກຂະແໜງການຕ່າງໆ ເຊັ່ນ: ການຄ້າ, ທະນາຄານ, ຢາ ແລະ ອຸປະກອນການແພດ, ຕັດຫຍິບ, ຍານພາຫະນະ ແລະ ອື່ນໆ.
ກອງປະຊຸມຄັ້ງນີ້ ຈັດຂຶ້ນໂດຍ ສຄອຊ ຮ່ວມກັບ ສະພາການຄ້າ ແລະ ອຸດສາຫະກຳ ແຫ່ງຊາດເບລາຣຸດສ, ມີຈຸດປະສົງເພື່ອເສີມສ້າງສາຍພົວພັນດ້ານການຄ້າ ແລະ ການລົງທຶນ, ພ້ອມທັງຊອກຫາໂອກາດໃໝ່ໆເພື່ອການພັດທະນາເສດຖະກິດຮ່ວມກັນ.
ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດກ່າວເປີດກອງປະຊຸມ. ທ່ານໄດ້ເນັ້ນໜັກເຖິງຂະແໜງການທີ່ມີທ່າແຮງສຳລັບການຮ່ວມມືລະຫວ່າງລາວ ແລະ ເບລາຣຸດສ ລວມມີ: ຂະແໜງກະສິກຳ ແລະ ການປຸງແຕ່ງກະສິກຳ, ຂະແໜງບໍ່ແຮ່ ແລະ ພະລັງງານ, ຂະແໜງອຸດສາຫະກຳການຜະລິດ, ການສ້າງສູນຝຶກອົບຮົມວິຊາຊີບ ແລະ ສະຖາບັນການສຶກສາຮ່ວມກັນ, ລວມເຖິງການພັດທະນາການທ່ອງທ່ຽວຮ່ວມກັນໃນອະນາຄົດ.
ໃນໂອກາດດຽວກັນ, ທ່ານ Maxim Ryzhenkov ລັດຖະມົນຕີກະຊວງການຕ່າງປະເທດເບລາຣຸດສ ໄດ້ກ່າວຕ້ອນຮັບ ແລະ ສະແດງທັດສະນະຂອງຝ່າຍເບລາຣຸດສ ໂດຍເນັ້ນໃສ່ການຮ່ວມມືກັນພັດທະນາອຸດສາຫະກຳ-ເຕັກໂນໂລຊີ, ການພັດທະນາການຮ່ວມມືຂອງພາກທຸລະກິດ, ລວມເຖິງການຮ່ວມກັນນຳໃຊ້ເຕັກໂນໂລຊີໃນຂະແໜງການຢາ ແລະ ກະສິກຳ. ທ່ານຍັງໄດ້ເຊື້ອເຊີນນັກທຸລະກິດລາວໄປຢ້ຽມຢາມເບລາຣຸດສ ເພື່ອເສີມຂະຫຍາຍສາຍພົວພັນລະຫວ່າງລາວ ແລະ ເບລາຣຸດສ ໃຫ້ແໜ້ນແຟ້ນຍິ່ງຂຶ້ນ.
ພິເສດ, ພາຍໃນກອງປະຊຸມ ຍັງໄດ້ມີພິທີເຊັນສັນຍາການຮ່ວມມືກັນລະຫວ່າງສະພາການຄ້າ ແລະ ອຸດສາຫະກຳ ແຫ່ງຊາດລາວກັບສະພາການຄ້າ ແລະ ອຸດສາຫະກຳ ເບລາຣຸດສ. ຝ່າຍລາວລົງນາມໂດຍ ທ່ານ ທະນົງສິນ ກັນລະຍາ ຮອງປະທານ ສຄອຊ, ແລະ ຝ່າຍເບລາຣຸດສລົງນາມໂດຍ ທ່ານນາງ Helen Malinowskaya ຮອງປະທານສະພາການຄ້າ ແລະ ອຸດສາຫະກຳ ເບລາຣຸດສ. ສັນຍາດັ່ງກ່າວມີເນື້ອໃນເວົ້າເຖິງການສົ່ງເສີມການຄ້າ, ການລົງທຶນທາງດ້ານທຸລະກິດຂອງທັງສອງຝ່າຍ, ການແລກປ່ຽນຂໍ້ມູນຂ່າວສານລະຫວ່າງສອງພາກສ່ວນ, ການຮ່ວມກັນຈັດກອງປະຊຸມ, ງານສຳມະນາ ແລະ ງານວາງສະແດງຕ່າງໆ.
ກອງປະຊຸມພົບປະທຸລະກິດລາວ-ເບລາຣຸດສ ຄັ້ງນີ້ ຖືເປັນບາດກ້າວສຳຄັນໃນການເສີມສ້າງຄວາມເຂົ້າໃຈ ແລະ ເປີດໂອກາດໃໝ່ໆໃຫ້ແກ່ການຮ່ວມມືດ້ານເສດຖະກິດ, ເຊິ່ງຄາດວ່າຈະນຳມາຊຶ່ງຜົນປະໂຫຍດຮ່ວມກັນຢ່າງຍືນຍົງຕໍ່ປະຊາຊົນຂອງທັງສອງຊາດ.
(ຂ່າວ: ສະພາການຄ້າ, ພາບ: ແສງຈັນ)
ຄໍາເຫັນ