ກອງປະຊຸມປິດທ້າຍໂຄງການໂອກາດ ສຳລັບຄົນທີ່ມີຄວາມພິການໃນລາວ

ກະຊວງແຮງງານ ແລະ ສະຫວັດດີການສັງຄົມ (ຮສສ) ຮ່ວມກັບຄູ່ຮ່ວມພັດທະນາໄດ້ຈັດກອງປະຊຸມ ປິດທ້າຍໂຄງການໂອກາດໄລຍະທີ I ຂຶ້ນໃນວັນທີ 11 ຕຸລາ ນີ້ ທີ່ໂຮງແຮມຄຣາວພາຊາ ນະຄອນຫຼວງວຽງຈັນ ໂດຍການເຂົ້າຮ່ວມ ແລະ ກ່າວເປີດງານຂອງ ທ່ານ ແສງອາລຸນ ຫຼວງຣາຊ ຮັກສາການຫົວໜ້າກົມນະໂຍບາຍຕໍ່ຜູ້ມີຜົນງານ, ພິການ ແລະ ຜູ້ອາຍຸສູງ ກະຊວງ ຮສສ ທັງເປັນຮັກສາການຮອງຫົວໜ້າກອງເລຂາຄະນະກຳມະ ການແຫ່ງຊາດເພື່ອຄົນພິການ, ມີທ່ານ ເຄວິນ ສະມິດ ຕາງໜ້າຈາກອົງການພັດທະນາສາກົນ ປະເທດສະຫະລັດອາເມຣິກາ (USAID) ປະຈໍາ ສປປ ລາວ, ມີບັນດາຄະນະກຳມະການຮັບຜິດຊອບໂຄງການໂອກາດ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.    
    ທ່ານ ແສງອາລຸນ ຫຼວງຣາຊ ກ່າວວ່າ: ກອງປະຊຸມຄັ້ງນີ້ ຈັດຂຶ້ນເພື່ອສະເຫຼີມສະຫຼອງຜົນສໍາເລັດຂອງວຽກງານໂຄງການໂອກາດ ໂດຍໄດ້ຈັດຕັ້ງປະຕິບັດຮ່ວມກັບອົງການຈັດຕັ້ງສາກົນ ເປົ້າໝາຍແມ່ນການສ້າງໂອ ກາດໃນການມີສ່ວນຮ່ວມການພັດທະນາຄົນພິການໃນ ສປປ ລາວ ໂດຍສະເພາະແມ່ນຢູ່ສອງແຂວງຂອງສອງເມືອງເປົ້າໝາຍຂອງໂຄງການຄື: ແຂວງສະຫວັນນະເຂດ ແມ່ນເມືອງໄຊພູທອງ ແລະ ແຂວງຊຽງຂວາງ ແມ່ນເມືອງຄໍາ; ທັງເປັນຜົນງານໃນການຮ່ວມມືກັນຂອງອົງການຈັດຕັ້ງທ້ອງຖິ່ນ, ຊຸມຊົນ, ຄອບຄົວ ແລະ ຄົນພິການໃນການຈັດຕັ້ງປະຕິບັດໂຄງການ.
ປັດຈຸບັນ, ລັດຖະບານ ສປປ ລາວ ກຳລັງຮ່າງແຜນງານແຫ່ງຊາດສຳລັບການຈັດຕັ້ງປະຕິບັດຄຳແນະນຳ ຂອງຄະນະກຳມະການສົນທິສັນຍາ ວ່າດ້ວຍສິດທິຂອງຄົນພິການ ແລະ ຮັບປະກັນວ່າ ຄົນທີ່ມີຄວາມພິການຜ່ານອົງການຕົວແທນແມ່ນໄດ້ປຶກສາຫາລື ແລະ ມີສ່ວນຮ່ວມໃນການພັດທະນານະໂຍບາຍແບບມີສ່ວນຮ່ວມສຳລັບຄົນພິການ. ໜຶ່ງໃນຜົນສຳເລັດທີ່ສຳຄັນຂອງໂຄງການໂອກາດ ແມ່ນການສ້າງຂີດຄວາມສາມາດໃຫ້ແກ່ອົງການຈັດ ຕັ້ງທາງສັງຄົມຂອງຄົນພິການໃນການບໍລິຫານງານ ແລະ ສົ່ງເສີມສິດທິໃນດ້ານຕ່າງໆພາຍໃຕ້ກົດໝາຍວ່າດ້ວຍຄົນພິການ ແລະ ສົນທິສັນຍາວ່າດ້ວຍສິດທິຄົນພິການ ທີ່ທາງລັດຖະບານແຫ່ງ ສປປ ລາວ ໄດ້ໃຫ້ສັດຕະຍາບັນໄວ້.  ພ້ອມດຽວກັນນັ້ນໃນໄລຍະຜ່ານມາ, ໂຄງການໂອກາດໄດ້ສ້າງຄວາມເຂັ້ມແຂງໃຫ້ແກ່ຂະແໜງການແພດຟື້ນຟູໜ້າທີ່ການ ໂດຍການຍົກລະດັບຂີດຄວາມສາມາດຂອງບຸກຄະລາກອນທາງດ້ານການແພດ ເພື່ອຕອບສະ ໜອງການບໍລິການ ດ້ານວຽກງານການແພດຟື້ນຟູໜ້າທີ່ການອີກດ້ວຍ. 
ຂ່າວ-ພາບ: ຍຸພິນທອງ