ໂດຍການເປັນປະທານ ຂອງທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ແຫ່ງ ສປປ ລາວ, ທ່ານ ກາວ ກິມ ຮຸນ ເລຂາທິການໃຫຍ່ອາຊຽນ, ທ່ານ ອຸເດດ ສຸວັນນະວົງປະທານສະພາທີ່ປຶກສາທຸລະກິດ ອາຊຽນ ປີ 2024 ພ້ອມດ້ວຍຄະນະ ແລະບັນດາທ່ານລັດຖະມົນຕີເສດຖະກິດອາຊຽນ, ທ່ານລັດຖະມົນຕີກະຊວງການຄ້າ ແລະ ອຸດສາຫະກໍາ ຕິມໍແລັດສະເຕ ພ້ອມດ້ວຍຄະນະຜູ້ແທນຂອງປະເທດສະມາຊິກອາຊຽນເຂົ້າຮ່ວມ.
ກອງປະຊຸມຄັ້ງນີ້ ແມ່ນເປັນຄັ້ງທີສອງພາຍຫຼັງກອງປະຊຸມລັດຖະມົນຕີເສດຖະກິດອາຊຽນແບບວົງແຄບ ຄັ້ງທີ 30 ທີ່ຫຼວງພະບາງ ໃນເດືອນມີນາຂອງປີນີ້, ໃນກອງປະຊຸມຄັ້ງຜ່ານມາ, ສະພາທີ່ປຶກສາທຸລະກິດອາຊຽນ ກໍໄດ້ໃຫ້ຄໍາຄິດເຫັນ ແລະ ຄໍາແນະນໍາທີ່ ເປັນປະໂຫຍດແກ່ກອງປະຊຸມລັດຖະມົນຕີເສດຖະກິດອາຊຽນ ໃນການສືບຕໍ່ສົ່ງເສີມການເຊື່ອມໂຍງທາງດ້ານເສດຖະກິດ ກໍຄືການຈັດຕັ້ງປະຕິບັດແຜນແມ່ບົດປະຊາຄົມເສດຖະກິດອາຊຽນ ປິ 2025 ໃຫ້ບັນລຸຜົນສໍາເລັດ.
ທ່ານ ມະໄລທອງ ກົມມະສິດ ໄດ້ກ່າວວ່າ: ກອງປະຊຸມໃນປີຜ່ານມາ ແລະ ປີນີ້ ພວກເຮົາໄດ້ປຶກສາຫາລືຫຼາຍບັນຫາທີ່ຕິດພັນກັບການຮ່ວມມື ລະຫວ່າງ ລັດຖະມົນຕີເສດຖະກິດອາຊຽນ ແລະ ສະພາທີ່ປຶກສາທຸລະກດິອາຊຽນ ຊຶ່ງໃນນັ້ນ ໄດ້ເນັ້ນໃສ່ວຽກງານການພັດທະນາແບບຍືນຍົງ ແລະ ການຫັນເປັນດີຈີຕອນ ເປັນຕົ້ນການນໍາໃຊ້ລະບົບ QR Code ໃນອາຊຽນ, ການຄໍ້າປະກັນສະບຽງອາຫານ, ຄວາມເຂັ້ມແຂງດ້ານສາທາລະນະສຸກ, ການອໍານວຍຄວາມສະດວກດ້ານການຄ້າ ແລະ ການລົງທຶນ ແລະ ການເຂົ້າເຖິງແຫຼ່ງທຶນ ຂອງ MSMEs; ເພື່ອສືບຕໍ່ ການຮ່ວມມືດັ່ງກ່າວ, ກອງປະຊຸມຄັ້ງນີ້ ຈະໄດ້ເນັ້ນໃສ່ແລກປ່ຽນທັດສະນະກ່ຽວກັບບັນດາແຜນວຽກບຸລິມະສິດຂອງສະພາທີ່ປຶກສາທຸລະກິດ ອາຊຽນ ສະບັບປັບປຸງຄັ້ງວັນທີ 14 ກັນຍາ 2024 ພາຍໃຕ້ການເປັນປະທານຂອງ ສປປ ລາວ ເປັນຕົ້ນແມ່ນ ການສົ່ງເສີມ MSMEs ໃນການຫັນເປັນດີຈີຕອນ, ການເຂົ້າເຖິງພະລັງງານສະອາດ, ການຄົ້ນຄວ້າ ແລະ ການພັດທະນາວັກຊິນ, ການຮັບປະກັນດ້ານສະບຽງອາຫານ, ການຫຼຸດຜ່ອນສິ່ງກີດຂວາງດ້ານການຄ້າ ແລະ ການຫັນປ່ຽນຈາກປະເທດທີ່ບໍ່ມີຊາຍແດນຕິດກັບທະເລ ມາເປັນປະເທດເຊື່ອມຕໍ່ທາງບົກ.
(ຂ່າວ: ຍຸພິນທອງພາບ: ແສງຈັນ)
ຄໍາເຫັນ