 |
ກອງປະຊຸມປຶກສາຫາລືລະຫວ່າງສະຖານເອກອັກຄະລັດຖະທູດ ແລະ ບັນດາກົງສູນກິດຕິມະສັກແຫ່ງ ສປປ ລາວ ປະຈຳປະເທດຍີ່ປຸ່ນຄັ້ງນີ້ ເປັນຄັ້ງທີ 3 ເພື່ອກວດກາ ແລະ ປະເມີນການປະຕິບັດໜ້າທີ່ຂອງບັນດາກົງສູນກິດຕິມະສັກ. ກອງປະຊຸມໄດ້ຮັບຟັງການລາຍງານຈາກບັນດາກົງສູນກິດຕິມທະສັກກ່ຽວກັບຜົນການເຄື່ອນໄຫວຂອງຕົນໃນໄລຍະທີ່ຜ່ານມາ ແລະ ແຜນການເຄື່ອນໄຫວໃນຕໍ່ໜ້າ. ບັນດາກົງສູນກິດຕິມະສັກໄດ້ຕັ້ງໜ້າເຄື່ອນໄຫວປະກອບສ່ວນເຂົ້າໃນການຮັດແໜ້ນການພົວພັນຮ່ວມມືລະຫວ່າງ ສປປ ລາວ ແລະ ຍີ່ປຸ່ນ, ເປັນຕົ້ນໂຄງການຂະຫຍາຍພັນຊ້າງອາຊີຢູ່ສວນສັດກຽວໂຕ, ໂຄງການສ້າງຫໍສຽນພະພຸດທະຮູບມິດຕະພາບ ແລະ ໄມຕີຈິດ ລາວ-ຍີ່ປຸ່ນ ຢູ່ແຂວງຈຳປາສັກ, ໂຄງການຜ່າຕັດປາກແວ່ງ-ເພດານໂວ່ໂດຍບໍ່ໄດ້ເສຍຄ່າ, ໂຄງການຜະລິດເຫຼົ້າລາວຢູ່ແຂວງອັດຕະປືເພື່ອໄປຂາຍຢູ່ຍີ່ປຸ່ນ, ໂຄງການທັດສະນະສຶກສາສຳລັບນັກຮຽນສາມັນ ແລະ ອື່ນໆ. ພ້ອມນັ້ນ, ບັນດາກົງສູນກິດຕິມະສັກຍັງໄດ້ເອົາໃຈໃສ່ເຄື່ອນໄຫວສົ່ງເສີມການພົວພັນຮ່ວມມືໃນຫຼາຍຂະແໜງການເປັນ ຕົ້ນແມ່ນການພັດທະນາຊັບພະຍາກອນມະນຸດ, ກະສິກຳ ແລະ ສາທາລະນະສຸກ ຊຶ່ງລວມທັງການຊ່ວຍເຫຼືອ ແລະ ໂຄງການການພັດທະນາເສດຖະກິດ-ສັງຄົມຮ່ວມກັບທ້ອງຖິ່ນໃນ ສປປ ລາວ. ນອກນັ້ນ, ບັນດາກົງສູນກິດຕິມະສັກຍັງມີແຜນຈະເຄື່ອນໄຫວເພີ່ມທະວີການຮ່ວມມືໃນຫຼາຍຂົງເຂດຕື່ມອີກໃນຊຸມປີຕໍ່ໜ້າ.
ໃນໂອກາດດັ່ງກ່າວ, ທ່ານ ອຳໄພ ກິນດາວົງ ໄດ້ສະແດງຄວາມຂອບໃຈຕໍ່ການສະໜັບສະໜູນ ແລະ ປະກອບສ່ວນຂອງບັນດາກົງສູນກິດຕິມະສັກເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ລວມທັງການປະກອບສ່ວນຈັດງານບຸນລາວປະຈຳປີຢູ່ນະຄອນຫຼວງໂຕກຽວ ແລະ ບັນດາກິດຈະກໍາອື່ນໆຂອງສະຖານທູດກໍຄືການຈັດບັນດາກິດຈະກຳເພື່ອຮັດແໜ້ນການພົວພັນມິດຕະພາບລະ ຫວ່າງສອງປະເທດ ແລະ ໃນໂອກາດຄົບຮອບ 70 ປີ ແຫ່ງການສ້າງຕັ້ງສາຍພົວພັນການທູດລາວ-ຍີ່ປຸ່ນ. ທ່ານ ອຳໄພ ກິນດາວົງ ໄດ້ຢ້ຳຄືນໃຫ້ບັນດາກົງສູນກິດຕິມະສັກທົບທວນຄືນພາລະບົດບາດ, ໜ້າທີ່ ແລະ ຂໍ້ກຳນົດຂອງກົງສູນກິດຕິມະສັກ ແລະ ຊຸກຍູ້ໃຫ້ບັນດາກົງສູນກິດຕິມະສັກສືບຕໍ່ເຄື່ອນໄຫວຕາມພາລະບົດບາດຂອງຕົນຢ່າງຕັ້ງໜ້າ, ພ້ອມທັງໄດ້ສະເໜີໃຫ້ບັນດາກົງສູນກິດຕິມະສັກສົ່ງບົດລາຍງານປະຈຳໄຕມາດກ່ຽວກັບການເຄື່ອນໄຫວຂອງຕົນໃຫ້ສະຖານທູດຢ່າງເປັນປົກກະຕິ.
ພ້ອມນີ້, ທ່ານ ອຳໄພ ກິນດາວົງ ໄດ້ສະເໜີໃຫ້ບັນດາກົງສູນກິດຕິມະສັກເອົາໃຈໃສ່ເຄື່ອນໄຫວສົ່ງເສີມການຄ້າ, ການລົງທຶນ, ການແລກປ່ຽນວັດທະນະທຳ ແລະ ການໄປມາຫາສູ່ລະຫວ່າງປະຊາ ຊົນສອງຊາດໃຫ້ຫຼາຍຂຶ້ນໃນອະນາຄົດບົນພື້ນຖານການເປັນຄູ່ຮ່ວມມືຍຸດທະສາດຮອບດ້ານລະຫວ່າງ ສປປ ລາວ ແລະ ຍີ່ປຸ່ນ.
(ຂ່າວ: ກຕທ)
ຄໍາເຫັນ