 |
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອເຜີຍແຜ່ ແລະ ປຶກສາຫາລືກ່ຽວກັບ 1). ການເຄື່ອນໄຫວວຽກງານການທູດເສດຖະກິດ ຂອງ ສປປ ລາວ ຊຶ່ງເປັນວຽກງານບຸລິມະສິດໜຶ່ງທີ່ສໍາຄັນຂອງກະຊວງການຕ່າງປະເທດ ພາຍໃຕ້ສະພາບການພາກພື້ນ ແລະ ສາກົນ ກຳລັງປະເຊີນໜ້າກັບຄວາມບໍ່ໝັ້ນທ່ຽງທາງດ້ານເສດຖະກິດ-ການເງິນ ແລະ ສິ່ງທ້າທາຍຕ່າງໆ ອັນພາໃຫ້ສົ່ງຜົນກະທົບຕໍ່ການປະຕິບັດມາດຕະການຕ່າງໆທີ່ເປັນອຸປະສັກໃຫ້ແກ່ການຂະຫຍາຍຕົວທາງດ້ານເສດຖະກິດ, ການຄ້າ ແລະ ການລົງທຶນຂອງຫຼາຍປະເທດ ລວມທັງ ສປປ ລາວ, ແຕ່ອີກດ້ານໜຶ່ງ ຫຼາຍປະເທດໃນໂລກ ໄດ້ເພີ່ມທະວີການພົວພັນຮ່ວມມືກັນໃນດ້ານຕ່າງໆນັບມື້ນັບຫຼາຍຂຶ້ນ ໂດຍສະເພາະແມ່ນດ້ານເສດຖະກິດໃນຫຼາຍລະດັບ ທັງໃນລະດັບອະນຸພາກພື້ນ, ພາກພື້ນ ແລະ ສາກົນ ເພື່ອການພັດທະນາແບບຍືນຍົງ ແລະ ພ້ອມກັນຮັບມືກັບ ສະພາບການປ່ຽນແປງຂອງໂລກໃນປັດຈຸບັນ ຊຶ່ງນໍາສະເໜີໂດຍ ກົມເສດຖະກິດ ກະຊວງການຕ່າງປະເທດ; 2). ການກະກຽມດ້ານຕ່າງໆ ແລະ ແຜນຍຸດທະສາດການຂ້າມຜ່ານຂອງ ສປປ ລາວ ເພື່ອອອກຈາກສະຖານະພາບປະເທດດ້ອຍພັດທະນາ (LDC) ນໍາສະເໜີໂດຍ ກົມອົງການຈັດຕັ້ງສາກົນ, ກະຊວງການຕ່າງປະເທດ; ແລະ 3). ການປັບປຸງກົງຈັກການຈັດຕັ້ງວຽກງານບໍລິການປະຕູດຽວດ້ານການລົງທຶນ ລວມທັງ ທ່າແຮງ, ກາລະໂອກາດ ແລະ ຄວາມຕ້ອງການໃນການດຶງດູດການລົງທຶນຈາກຕ່າງປະເທດ ໃນແຕ່ລະຂະແໜງການບຸລິມະສິດຂອງ ສປປ ລາວ ນໍາສະເໜີໂດຍ ຫ້ອງການ ຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ ເພື່ອໃຫ້ບັນດານັກການທູດລາວ ທີ່ກໍາລັງປະຈໍາການ ຢູ່ບັນດາສໍານັກງານຜູ້ຕາງໜ້າ ແຫ່ງ ສປປ ລາວ ທີ່ ຕ່າງປະເທດ ໄດ້ຮັບຮູ້ ແລະ ເຂົ້າໃຈເລິກເຊິ່ງກ່ຽວກັບກົນໄກການປະສານງານວຽກງານສໍາຄັນດັ່ງກ່າວ ໃຫ້ມີຄວາມເປັນເອກະພາບຍິ່ງຂຶ້ນ.
ໃນໂອກາດກ່າວເປີດກອງປະຊຸມ, ທ່ານ ປະທານກອງປະຊຸມ ໄດ້ຍົກໃຫ້ເຫັນເຖິງຄວາມໝາຍຄວາມສໍາຄັນ ແລະ ຈຸດປະສົງຂອງການທູດເສດຖະກິດ ເພື່ອສ້າງຄວາມເຂັ້ມແຂງໃຫ້ແກ່ລະບົບເສດຖະກິດ-ການເງິນ ຂອງຊາດ ກໍຄື ຂອງພາກພື້ນ ແລະ ສາກົນ ໂດຍແນໃສ່ຍົກລະດັບການຮ່ວມມືດ້ານການຄ້າ, ການລົງທຶນ ແລະ ການເຊື່ອມໂຍງສາກົນ ຂຶ້ນສູ່ມິຕິໃໝ່, ພ້ອມທັງສົ່ງເສີມການພັດທະນາເສດຖະກິດ-ສັງຄົມ ພາຍໃນປະເທດ, ຍົກລະດັບຄຸນນະພາບຊີວິດການເປັນຢູ່ຂອງປະຊາຊົນ ແລະ ຫຼຸດຜ່ອນຄວາມທຸກຍາກເທື່ອລະກ້າວ. ພ້ອມດຽວກັນນີ້, ຍັງໄດ້ເນັ້ນເຖິງຄວາມສຳຄັນ ແລະ ຄວາມພ້ອມດ້ານຕ່າງໆຂອງການກະກຽມໃຫ້ແກ່ການອອກຈາກສະຖານະພາບດ້ອຍພັດທະນາ ຂອງ ສປປ ລາວ; ນອກນີ້, ກໍໄດ້ເນັ້ນໜັກໃຫ້ບັນດານັກການທູດ ເອົາໃຈໃສ່ ແລະ ກຳໄດ້ຂໍ້ມູນພາຍໃນປະເທດໃຫ້ເລິກເຊິ່ງ ໂດຍສະເພາະ ຂໍ້ມູນລະບຽບການ ແລະ ຂັ້ນຕອນການບໍລິການປະຕູດຽວດ້ານການດຶງດູດການລົງທຶນຈາກຕ່າງປະເທດອີກຕື່ມ.
ໃນໂອກາດນີ້, ທ່ານ ສົມບູນ ສີຫານາດ, ຫົວໜ້າກົມເສດຖະກິດ ກໍໄດ້ຍົກໃຫ້ເຫັນເຖິງໝາກຜົນຂອງການຈັດຕັ້ງປະຕິບັດວຽກງານການທູດເສດຖະກິດຂອງ ສປປ ລາວ ໃນໄລຍະຜ່ານມາ ແລະ ທິດທາງແຜນການເຄື່ອນໄຫວໃນຕໍ່ໜ້າຂອງວຽກງານດັ່ງກ່າວ ໂດຍສະເພາະ ໄດ້ຍົກໃຫ້ເຫັນພາລະບົດບາດ ແລະ ໜ້າທີ່ ທີ່ສໍາຄັນຂອງບັນດາສໍານັກງານຜູ້ຕາງໜ້າ ແຫ່ງ ສປປ ລາວ ປະຈໍາຢູ່ຕ່າງ ປະເທດ ໃນການຂັບເຄື່ອນວຽກງານການທູດເສດຖະກິດ ເພື່ອດຶງດູດການລົງທຶນ, ສົ່ງເສີມການຄ້າ ແລະ ການທ່ອງທ່ຽວ ໃຫ້ນໍາມາສູ່ໝາກຜົນຕົວຈິງ ເພື່ອພັດທະນາເສດຖະກິດ-ສັງຄົມຂອງ ສປປ ລາວ.
ພ້ອມດຽວກັນນີ້, ທ່ານ ວັນທະນາ ນໍລິນທາ ຫົວໜ້າຫ້ອງການຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ ໄດ້ຍົກໃຫ້ເຫັນສະພາບລວມໃນການຈັດຕັ້ງປະຕິບັດວຽກງານການສົ່ງເສີມ ແລະ ດຶງດູດການລົງທຶນຈາກຕ່າງປະເທດ ຢູ່ ສປປ ລາວ ແລະ ການປັບປຸງກົນໄກການອະນຸມັດການລົງທຶນ ໃນໄລຍະໃໝ່ ລວມທັງນະໂຍບາຍສົ່ງເສີມການລົງທຶນ, ແລະ ການປັບປຸງກົນໄກການອະນຸມັດການລົງທຶນໃນໄລະຍະໃໝ່ ເພື່ອໃຫ້ແທດເໝາະກັບສະພາບການປັດຈຸບັນ. ນອກນັ້ນ, ຜູ້ຕາງໜ້າຈາກກົມອົງການຈັດຕັ້ງສາກົນ, ກະຊວງການຕ່າງປະເທດ ກໍໄດ້ຍົກໃຫ້ເຫັນບັນດາໜ້າວຽກສໍາຄັນທີ່ຕິດພັນກັບການອອກຈາກສະຖານະພາບ LDC ແລະ ທິດທາງໃນຕໍ່ໜ້າ ພາຍຫຼັງສໍາເລັດບົດປະເມີນຄວາມພ້ອມການອອກຈາກສະຖານະພາບ LDC (Lao PDR’s LDC Graduation Readiness Assessment).
ໃນຕອນທ້າຍ, ບັນດາຜູ້ເຂົ້າຮ່ວມກອງປະຊຸມ ໄດ້ແລກປ່ຽນຄໍາຄິດເຫັນ, ຂໍ້ມູນ, ບົດຮຽນ ແລະ ປະສົບການໃນການເຄື່ອນໄຫວວຽກງານການທູດເສດຖະກິດ ຢູ່ປະເທດທີ່ຕົນຮັບຜິດຊອບ ລວມທັງວຽກງານການສົ່ງເສີມການລົງທຶນ, ການຄ້າ ແລະ ການທ່ອງທ່ຽວ ຢ່າງກົງໄປກົງມາ ເພື່ອປະກອບສ່ວນເຂົ້າໃນການກຳນົດນະໂຍບາຍ, ມາດຕະການ ແລະ ທິດທາງໃນຕໍ່ໜ້າ ເພື່ອສົ່ງເສີມການທູດເສດຖະກິດໃຫ້ມີປະສິດທິຜົນຫຼາຍຂຶ້ນ, ທັງນີ້ກໍເພື່ອເຮັດໃຫ້ການປະສານງານ, ການແລກປ່ຽນ, ການຕອບສະໜອງຂໍ້ມູນຂ່າວສານ ໃຫ້ມີຄວາມກົມກຽວ, ໂລ່ງລ່ຽນ ແລະ ທັນການ ກໍຄື ການໝູນໃຊ້ກາລະໂອກາດ ແລະ ທ່າແຮງຂອງການຮ່ວມມືກັບປະເທດທີ່ມີສໍານັກງານຜູ້ຕາງໜ້າຕັ້ງຢູ່ ແລະ ການຮ່ວມມືພາກພື້ນ ແລະ ສາກົນ ເຂົ້າໃນການພັດທະນາເສດຖະກິດ-ສັງຄົມແຫ່ງຊາດ. ການເຄື່ອນໄຫວວຽກງານການທູດເສດຖະກິດຂອງ ສປປ ລາວ ຖືເປັນວຽກບຸລິມະສິດຂອງທຸກຂະແໜງການ ທີ່ຈະຕ້ອງໄດ້ເອົາໃຈໃສ່ສືບຕໍ່ຈັດຕັ້ງປະຕິບັດຮ່ວມກັນໃຫ້ວ່ອງໄວ, ມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າໃນຕໍ່ໜ້າ.
ກອງປະຊຸມຄັ້ງນີ້ ໄດ້ດໍາເນີນໄປດ້ວຍບັນຍາກາດຟົດຟື້ນ, ມີການແລກປ່ຽນຄໍາຄິດເຫັນຢ່າງສ້າງສັນ ແລະ ຈົບລົງດ້ວຍຜົນສໍາເລັດຢ່າງຈົບງາມ.
(ຂ່າວ: ກຕທ)
ຄໍາເຫັນ