 |
ໂດຍພາຍໃຕ້ການເປັນປະທານຂອງ ທ່ານ ນາງ ລີວົງ ລາວລີ ກໍາມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ (ອອປສ) ໃນນາມຜູ້ປະຈໍາການ ຊຶ່ງມີຄະນະກໍາມະການອະໄພຍະໂທດລະດັບຊາດ, ປະທານຄະນະກຳມະການອະໄພຍະໂທດ ລະດັບກະຊວງ, ລະດັບແຂວງ, ນະຄອນຫຼວງວຽງຈັນ, ກອງບັນຊາການປ້ອງກັນຄວາມສະຫງົບແຂວງ, ນະຄອນຫຼວງວຽງຈັນ ແລະ ອົງການໄອຍະການປະຊາຊົນນະຄອນຫຼວງວຽງຈັນ, ອົງການໄອຍະການປະຊາຊົນແຂວງເຂົ້າຮ່ວມ.
ໃນວາລະກອງປະຊຸມ, ທ່ານ ບຸນທັນ ບຸນທະວິໄລ ຮອງຫົວໜ້າອົງການໄອຍະການປະຊາຊົນສູງສຸດ ຄະນະກໍາມະການອະໄພຍະໂທດລະດັບຊາດ ທັງເປັນຫົວໜ້າກອງເລຂາຄະນະກໍາມະການອະໄພຍະໂທດ ລະດັບຊາດ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດວຽກງານອະໄພຍະໂທດ ປະຈໍາປີ 2025 ແລະ ທິດທາງວຽກງານຈຸດສຸມ ປະຈໍາປີ 2026 ໂດຍຍົກໃຫ້ເຫັນດ້ານດີ, ຜົນສຳເລັດ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ຊຶ່ງໜຶ່ງປີຜ່ານມາມີນັກໂທດທີ່ໄດ້ຮັບການໃຫ້ອະໄພຍະໂທດ ປະຈໍາປີ 2025 ຕາມລັດຖະດໍາລັດ ຂອງປະທານປະເທດ ສະບັບເລກທີ 304/ປປທ, ລົງວັນທີ 20 ພະຈິກ 2025 ທັງໝົດ 2,858 ຄົນ ຍິງ 362 ຄົນ; ຕ່າງປະເທດ 59 ຄົນ ຍິງ 7 ຄົນ. ໃນນີ້ ໄດ້ຮັບການຫຼຸດຜ່ອນໂທດທັງໝົດ 2,622 ຄົນ ຍິງ 329 ຄົນ, ຕ່າງປະເທດ 57 ຄົນ ຍິງ 6 ຄົນ; ນັກໂທດຕະຫຼອດຊີວິດໄດ້ຮັບອະໄພຍະໂທດມາເປັນໂທດ 20 ປີ 42 ຄົນ ຍິງ 3 ຄົນ, ຕ່າງປະເທດ 4 ຄົນ; ນັກໂທດທີ່ໄດ້ເງື່ອນໄຂປ່ອຍຕົວທັງໝົດ 236 ຄົນ ຍິງ 33 ຄົນ, ຕ່າງປະເທດ 2 ຄົນ ຍິງ 1 ຄົນ; ນັກໂທດທີ່ຖືກສານຕັດສິນປະຫານຊີວິດໄດ້ຮັບອະໄພຍະໂທດມາເປັນໂທດຕັດອິດສະຫຼະພາບຕະຫຼອດຊີວິດ ຕາມລັດຖະດໍາລັດ ຂອງປະທານປະເທດ ສະບັບເລກທີ 305/ປປທ, ລົງວັນທີ 20 ພະຈິກ 2025 ມີຈໍານວນ 40 ຄົນ ຍິງ 5 ຄົນ. ນອກຈາກນີ້, ເນື່ອງໃນວັນສະຖາປະນາ ຄົບຮອບ 50 ປີ ຍັງໄດ້ມີການອະໄພຍະໂທດ ໃຫ້ແກ່ນັກໂທດທີ່ມີອາຍຸ 70 ປີ ຂຶ້ນໄປ ຊຶ່ງໄດ້ຮັບອະໄພຍະໂທດ ຕາມດໍາລັດ ຂອງປະທານປະເທດ ສະບັບເລກທີ 332/ປປທ, ລົງວັນທີ 5 ທັນວາ 2025 ມີຈໍານວນ 28 ຄົນ ຍິງ 8 ຄົນ. ພ້ອມກັນນີ້ ຍັງໄດ້ຊຸກຍູ້ພາກສ່ວນປະຕິບັດຄໍາຕັດສິນຂອງສານ ເກັບຄ່າປັບໃໝ ແລະ ຄ່າເສຍຫາຍທາງແພ່ງ ທີ່ນັກໂທດຊໍາລະໃນການຄົ້ນຄວ້າສະເໜີໃຫ້ອະໄພຍະໂທດ ປະຈຳປີ 2025 ທັງໝົດ 13,358,712,126 ກີບ, ເປັນເງິນໃຊ້ແທນຄ່າເສຍຫາຍທາງແພ່ງ ຈໍານວນ 3,133,719,286 ກີບ ແລະ ໂທດປັບໃໝທາງອາຍາໄດ້ທັງໝົດ 10,224,992,840 ກີບ; ຈາກນັ້ນ, ຜູ້ແທນກອງປະຊຸມ ໄດ້ສຸມໃສ່ໃນການຄົ້ນຄວ້າ, ປະກອບຄໍາເຫັນຕໍ່ເນື້ອໃນຕ່າງໆ ຢ່າງກົງໄປກົງມາ ແລະ ມີຄວາມເປັນເອກະພາບສູງ ຊຶ່ງໄດ້ຍົກໃຫ້ເຫັນຜົນງານທີ່ໄດ້ເຮັດສຳເລັດ, ບັນດາຈຸດອ່ອນທີ່ຍັງຄົງຄ້າງ, ພ້ອມທັງກຳນົດວິທີການແກ້ໄຂ ແລະ ເປັນເອກະພາບຕໍ່ທິດທາງແຜນການທີ່ຈະສຸມໃສ່ນຳພາ, ຊີ້ນໍາໃນປີ 2026.
ພ້ອມນີ້, ທ່ານ ນາງ ລີວົງ ລາວລີ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດທີ່ຈັດຕັ້ງປະຕິບັດ ໃນປີຜ່ານມາ ບົນຈິດໃຈເຊີດຊູຄວາມຮັບຜິດຊອບຂອງບັນດາທ່ານຄະນະກຳມະການອະໄພຍະໂທດລະດັບຕ່າງໆ ໄດ້ປະຕິບັດໜ້າທີ່ໄດ້ສໍາເລັດຕາມຈຸດປະສົງ ແລະ ຄາດໝາຍ, ບັນດາຜົນສໍາເລັດລວມ ແມ່ນຄວາມຮັບຜິດຊອບການເມືອງ ຂອງຄະນະກຳມະການແຕ່ລະຂັ້ນ ແມ່ນການປະກອບສ່ວນຂອງຂະແໜງການ, ອົງການກ່ຽວຂ້ອງ ຊຶ່ງໄດ້ພ້ອມກັນທຸ້ມເທເຫື່ອແຮງ, ຄວາມຮູ້, ຄວາມສາມາດຂອງຕົນເຂົ້າໃນການເຄື່ອນໄຫວຈັດຕັ້ງປະຕິບັດໜ້າທີ່ວຽກງານປິ່ນອ້ອມຈົນໄດ້ຮັບຜົນສໍາເລັດ.
ຂ່າວ-ພາບ:ຕຸໄລເພັດ
ຄໍາເຫັນ