ກອງປະຊຸມສຳມະນາທິດສະດີສອງພັກລາວ-ຈີນຄັ້ງທີ XI ໄດ້ປະສົບຜົນສຳເລັດຢ່າງຈົບງາມ

ໃນວັນທີ 10 ມັງກອນ ນີ້ ທີ່ນະຄອນຫຼວງວຽງຈັນ, ກອງປະຊຸມສໍາມະນາທິດສະດີ ລະຫວ່າງ ພັກປະຊາຊົນປະຕິວັດລາວ ແລະ ພັກກອມມູນິດຈີນ ຄັ້ງທີ XI ພາຍໃຕ້ຫົວຂໍ້:  “ບົດຮຽນ ແລະ ພຶດຕິກໍາໃນການເພີ່ມທະວີປົກປັກຮັກສາລະບົບນິເວດ ແລະ ສິ່ງແວດລ້ອມໃນການກໍ່ສ້າງຫັນເປັນທັນສະໄໝຢູ່ ສປປລາວ ແລະ ສປຈີນ” ທີ່ໄດ້ເປີດຂຶ້ນໃນວັນທີ 9 ມັງກອນ ຜ່ານມາ ຊຶ່ງກອງປະຊຸມໄດ້ໄດ້ດຳເນີນດ້ວຍບັນຍາກາດທີ່ຟົດຟື້ນ, ມີຄວາມຮັບຜິດຊອບສູງ, ມີເນື້ອໃນອຸດົມສົມບູນ ແລະ ໄດ້ປະສົບຜົນສຳເລັດຢ່າງຈົບງາມ.
    ພາຍຫຼັງພິທີເປີດກອງປະຊຸມຢ່າງເປັນທາງການ ໂດຍມີ ສະຫາຍ ກິແກ້ວ ໄຂຄໍາພິທູນ ກຳມະການກົມການເມືອງສູນກາງພັກປະຊາຊົນປະຕິວັດລາວ ຮອງນາຍົກລັດຖະມັນຕີ ແຫ່ງ ສປປ ລາວ ແລະ ສະຫາຍ ຫຼີ ຊູ ເຫຼີຍ ກຳມະການກົມການເມືອງສູນກາງພັກ ເລຂາທິການສູນກາງພັກ ຫົວໜ້າຄະນະໂຄສະນາສູນກາງພັກກອມມູນິດຈີນເຂົ້າຮ່ວມເປັນຄະນະປະທານ; ກອງປະຊຸມ ໄດ້ເລີ່ມດຳເນີນໂດຍແບ່ງອອກເປັນ 2 ວາລະ ຄື: ວາລະທີ 1ພາຍໃຕ້ການຄວບຄຸມວາລະໂດຍ ສະຫາຍ ສອນທະນູ ທໍາມະວົງ ກຳມະການສູນກາງພັກ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຮອງປະທານຜູ້ປະຈໍາການສະພາທິດສະດີສູນກາງພັກປະຊາຊົນປະຕິວັດລາວ ແລະ ສະຫາຍ ນາງ ສູ ຊົງແຢ້ນ ຫົວໜ້າສູນຄົ້ນຄວ້າອາລິຍະທໍາສັງຄົມ ແລະ ນິເວດວິທະຍາ ໂຮງຮຽນພັກ ສູນກາງພັກກອມມູນິດຈີນ, ວາລະທີ2 ພາຍໃຕ້ການຄວບຄຸມວາລະໂດຍ ສະຫາຍ ພູວົງ ອຸ່ນຄໍາແສນ ກຳມະການສູນກາງພັກ ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ຮອງປະທານສະພາທິດສະດີສູນກາງພັກປະຊາຊົນປະຕິວັດລາວ ແລະ ສະຫາຍ ນາງ ສູ ຊົງແຢ້ນ ຊຶ່ງທັງ 2 ວາລະການດຳເນີນກອງປະຊຸມ ໄດ້ເປັນໄປຢ່າງມີບັນຍາກາດທີ່ຟົດຟື້ນ, ມີຄວາມຮັບຜິດຊອບສູງ ແລະ ມີເນື້ອໃນອຸດົມສົມບູນ. ບັນດານັກວິທະຍາສາດທັງສອງປະເທດ ທີ່ເຂົ້າຮ່ວມກອງປະຊຸມໄດ້ສຸມຈິດສຸມໃຈຮັບຟັງ ບັນດາບົດສະເໜີ ທັງ 9 ບົດ ໂດຍຝ່າຍລາວມີ 4 ບົດ, ຝ່າຍຈີນ ມີ 5 ບົດ ແລະ ພ້ອມກັນປະກອບຄຳຄິດຄຳເຫັນ, ສົນທະນາກັນ, ແລກປ່ຽນບົດຮຽນ ໃນແຕ່ລະບັນຫາ ດ້ວຍຄວາມຈິງໃຈ ແລະ ກົງໄປກົງມາ ຊຶ່ງມີຄວາມກະຈ່າງແຈ້ງທັງໃນແງ່ທິດສະດີວິທະຍາສາດ ແລະ ພຶດຕິກຳທີ່ມີຊີວິດຊີວາ, ມີຄວາມໝາຍສໍາຄັນໃຫ້ແກ່ການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວແລະ ກອງປະຊຸມໃຫຍ່ຄັ້ງທີ XX ຂອງພັກກອມມູນິດຈີນ.
    ໃນທີ່ປະຊຸມ, ສະຫາຍ ກິແກ້ວ ຈັນທະບູລີ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຂຶ້ນກ່າວສະຫຼຸບ ແລະ ປິດກອງປະຊຸມ ໂດຍກ່າວວ່າ: ກອງປະຊຸມໄດ້ຮັບຟັງການປະກອບຄຳເຫັນຂອງນັກວິທະຍາສາດແລະມີການປະກອບຄຳເຫັນຢ່າງກົງໄປກົງມາ. ເນື້ອໃນບົດປະກອບຄຳເຫັນ ແລະການແລກປ່ຽນບົດຮຽນຊຶ່ງກັນ ແລະກັນ ເຫັນວ່າ ມີຄວາມອຸດົມສົມບູນ, ສ້າງຄວາມກະຈ່າງແຈ້ງໄດ້ໃນຫຼາຍບັນຫາ. ການວິເຄາະ, ວິໄຈແຕ່ລະບັນຫາເຫັນວ່າ ມີວິທີວິທະຍາທີ່ຊັດເຈນ ດ້ວຍການນຳໃຊ້ວິທີປະຊິດໃນຫຼາຍມູມມອງທີ່ສາມາດຢັ້ງຢືນໄດ້ເຖິງຄວາມຖືກຕ້ອງທາງດ້ານທິດສະດີ ແລະ ຄວາມເໝາະສົມໃນການແກ້ໄຂບັນຫາພຶດຕິກຳ ຊຶ່ງຜົນການຄົ້ນຄວ້າ ແລະສຳມະນາ ມີຄຸນຄ່າດ້ານທິດສະດີ ແລະພຶດຕິກຳດັ່ງນີ້:
    ດ້ານທິດສະດີ:ນັກວິທະຍາສາດສາມາດສັງລວມ ແລະໄຈ້ແຍກທິດສະດີຢ່າງເປັນລະບົບ ແລະຢັ້ງຢືນສາຍພົວພັນທີ່ມີລັກສະນະເປັນກົດເກນລະຫວ່າງການເພີ່ມທະວີປົກປັກຮັກສາລະບົບນິເວດ ແລະ ສິ່ງແວດລ້ອມໃນການກໍ່ສ້າງຫັນເປັນທັນສະໄໝ,ໃນນີ້, ເຫັນໄດ້ບົດບາດຂອງການເພີ່ມທະວີປົກປັກຮັກສາລະບົບນິເວດ ແລະ ສິ່ງແວດລ້ອມໃນການກໍ່ສ້າງຫັນເປັນທັນສະໄໝ  ແມ່ນກຳລັງດັນສຳຄັນເພື່ອຕອບສະໜອງການພັດທະນາປະເທດຊາດຕາມທິດສັງຄົມນິຍົມ. ນັກວິທະຍາສາດໄດ້ຢັ້ງຢືນທິດສະດີ ທີ່ໜັກແໜ້ນ, ຊັດເຈນ ແລະແທດຕົວຈິງກ່ຽວກັບການເພີ່ມທະວີປົກປັກຮັກສາລະບົບນິເວດ ແລະ ສິ່ງແວດລ້ອມໃນການກໍ່ສ້າງຫັນເປັນທັນສະໄໝ,ໄດ້ກຳນົດສາຍພົວພັນສັດຈະວິພາກ ລະຫວ່າງພັດທະນາເສດຖະກິດກັບການເສີມຂະຫຍາຍການເຕີບໂຕສີຂຽວ, ການຜະລິດກະສິກໍາສະອາດຕິດພັນກັບລະບົບນິເວດ, ການຂຸດຄົ້ນແລະນໍາໃຊ້ຊັບພະຍາກອນທໍາມະຊາດກັບການປົກປັກຮັກສາສິ່ງແວດລ້ອມຕິດພັນກັບການພັດທະນາຍືນຍົງ ແລະ ການເສີມຂະຫຍາຍຄວາມສໍາຄັນຂອງການຄົ້ນຄວ້ານະວັດຕະກໍາໃໝ່ ແລະນໍາໃຊ້ເຕັກໂນໂລຊີທີ່ຕິດພັນກັບສິ່ງແວດລ້ອມເຂົ້າໃນການພັດທະນາໃຫ້ຕອບສະໜອງໃນເງື່ອນໄຂໃໝ່ຢູ່ລາວ ແລະຈີນ.
    ດ້ານພຶດຕິກຳ: ຜົນການຄົ້ນຄວ້າໄດ້ນຳສະເໜີຂໍ້ມູນທີ່ອຸດົມສົມບູນ ດ້ວຍການວິເຄາະ, ໄຈ້ແຍກ ໃຫ້ເຫັນແຈ້ງແຕ່ລະເນື້ອໃນພຶດຕິກຳເປັນຕົ້ນ ແມ່ນເນື້ອໃນການເພີ່ມທະວີປົກປັກຮັກສາລະບົບນິເວດ ແລະ ສິ່ງແວດລ້ອມໃນການກໍ່ສ້າງຫັນເປັນທັນສະໄໝໃນຂະບວນວິວັດການພັດທະນາປະເທດຊາດຕາມທິດສັງຄົມນິຍົມ. ພົ້ນເດັ່ນແມ່ນສາມາດວິເຄາະ, ໄຈ້ແຍກ, ສະໜອງຂໍ້ມູນໃນການເສີມຂະຫຍາຍການເຕີບໂຕສີຂຽວ, ການຜະລິດກະສິກໍາສະອາດຕິດພັນກັບລະບົບນິເວດ, ການຂຸດຄົ້ນແລະນໍາໃຊ້ຊັບພະຍາກອນທໍາມະຊາດກັບການປົກປັກຮັກສາສິ່ງແວດລ້ອມຕິດພັນກັບການພັດທະນາຍືນຍົງ ແລະ ການເສີມຂະຫຍາຍຄວາມສໍາຄັນຂອງການຄົ້ນຄວ້ານະວັດຕະກໍາໃໝ່ ແລະນໍາໃຊ້ເຕັກໂນໂລຊີທີ່ຕິດພັນກັບສິ່ງແວດລ້ອມເຂົ້າໃນການພັດທະນາ, ຢັ້ງຢືນພຶດຕິກຳການພົວພັນລະຫວ່າງເສດຖະກິດກັບການຂຸດຄົ້ນແລະນໍາໃຊ້ຊັບພະຍາກອນທໍາມະຊາດກັບການປົກປັກຮັກສາສິ່ງແວດລ້ອມຕິດພັນກັບການພັດທະນາຍືນຍົງ,ນຳສະເໜີຂໍ້ມູນຕົວຈິງໃນການການເສີມຂະຫຍາຍຄວາມສໍາຄັນຂອງການຄົ້ນຄວ້ານະວັດຕະກໍາໃໝ່ ແລະນໍາໃຊ້ເຕັກໂນໂລຊີທີ່ຕິດພັນກັບສິ່ງແວດລ້ອມເຂົ້າໃນການພັດທະນາ.  ຜົນສຳເລັດທັງໝົດ, ໄດ້ເປັນຂໍ້ມູນສຳຄັນໃນການສືບຕໍ່ຄົ້ນຄວ້າພຶດຕິກຳໃຫ້ສົມບູນຍິ່ງຂຶ້ນ.ບົນພື້ນຖານຜົນງານການນຳພາຂອງພັກໃນການເພີ່ມທະວີປົກປັກຮັກສາລະບົບນິເວດ ແລະ ສິ່ງແວດລ້ອມໃນການກໍ່ສ້າງຫັນເປັນທັນສະໄໝນັ້ນ ນັກວິທະຍາສາດ ຍັງໄດ້ວິເຄາະໃຫ້ເຫັນເຖິງຂໍ້ບົກພ່ອງໃນແງ່ມູມຕ່າງໆ ສາມາດສ່ອງແສງໄດ້ຄວາມເປັນຈິງ ແລະ ເປັນພື້ນຖານສຳຄັນໃນການນຳສະເໜີວິທີການທີ່ສອດຄ່ອງ ຕອບສະໜອງການປົກປັກຮັກສາລະບົບນິເວດ ແລະ ສິ່ງແວດລ້ອມ ຢູ່ລາວ ແລະຈີນ.
    ກອງປະຊຸມສຳມະນາທິດສະດີໃນຄັ້ງນີ້, ມີຄວາມໝາຍສຳຄັນຢ່າງຍິ່ງ ນອກຈາກເປັນການຄົ້ນຄວ້າແລກປ່ຽນບົດຮຽນທາງດ້ານທິດສະດີ ແລະ ພຶດຕິກຳ ທີ່ມີຊີວິດຊີວາແລ້ວ ຍັງຈະປະກອບສ່ວນເຂົ້າໃນການຜັນຂະຫຍາຍແນວທາງ, ແຜນນະໂຍບາຍຂອງພັກ ແລະ ນະໂຍບາຍຂອງລັດ ຢູ່ລາວ ແລະຈີນໃຫ້ປະກົດຜົນເປັນຈິງ. ຜົນສຳເລັດໃນການຄົ້ນຄວ້າ ແມ່ນການປະກອບສ່ວນເຫື່ອແຮງສະຕິປັນຍາຂອງຖັນແຖວນັກວິທະຍາສາດ, ນັກທິດສະດີ, ກໍຄືຄະນະຮັບຜິດຊອບ ແນໃສ່ເພີ່ມທະວີຄັງສາງທິດສະດີໃຫ້ມີຄວາມອຸດົມສົມບູນຍິ່ງຂຶ້ນ.ທັງໝົດນີ້, ຈະເປັນພື້ນຖານໃຫ້ແກ່ການສືບຕໍ່ຄົ້ນຄວ້າໃຫ້ອຸດົມບູນ ແລະໝູນໃຊ້ເຂົ້າໃນຕົວຈິງຢ່າງເປັນຮູບປະທຳ.
(ຂ່າວ-ພາບ: ສຸກສະຫວັນ)