 |
ທ່ານ ນາງ ບຸນຄໍາ ວໍລະຈິດ ໄດ້ກ່າວວ່າ: ກອງປະຊຸມຄັ້ງນີ້, ຈັດຂຶ້ນເພື່ອສະຫຼຸບຕີລາຄາໝາກຜົນຂອງການເຄື່ອນໄຫວວຽກງານຂອງ ທຫລ ປະຈໍາປີ 2025 ແລະ ວາງທິດທາງແຜນການປີ 2026 ຊຶ່ງກອງປະຊຸມສະພາບໍລິຫານ ທຫລ ຄັ້ງຜ່ານມາ, ທຫລ ໄດ້ເອົາໃຈໃສ່ຈັດຕັ້ງຜັນຂະຫຍາຍມະຕິຂອງກອງປະຊຸມສະພາບໍລິຫານຢ່າງເປັນເຈົ້າການ ດ້ວຍຄວາມຮັບຜິດຊອບສູງ ມີຜົນສໍາເລັດຫຼາຍດ້ານ ໂດຍສະ ເພາະການຮັກສາສະຖຽນລະພາບເງິນຕາແຫ່ງຊາດ ຊຶ່ງເຫັນວ່າອັດຕາເງິນເຟີ້ສະເລ່ຍໃນປີ 2025 ຢູ່ໃນລະດັບ 7.7% ຫຼຸດລົງຈາກລະດັບ 23.13% ໃນປີ 2024; ອັດຕາແລກປ່ຽນມີຄວາມສະຫງົບໂດຍພື້ນ ຖານ ແລະ ຄັງສຳຮອງເງິນຕາຕ່າງປະເທດ ຢູ່ໃນລະດັບກຸ້ມການນໍາເຂົ້າໄດ້ 6.45 ເດືອນ (ບັນລຸຕາມຄາດໝາຍທີ່ກຳນົດໄວ້); ປະລິມານເງິນ M2 ຂະຫຍາຍຕົວໃນອັດຕາ 18.72% ທຽບໃສ່ໄລຍະດຽວກັນຂອງປີຜ່ານມາ. ສະຖຽນລະພາບການເງິນ ເຫັນວ່າມີຄວາມໝັ້ນທ່ຽງໃນລະດັບດີ, ອັດຕາສ່ວນ NPLs ຢູ່ໃນລະດັບ 1.18%; ພ້ອມນີ້, ພວກເຮົາໄດ້ສໍາເລັດການຫັນ ທນບ ເປັນທະນາຄານພັດທະນາຊົນນະບົດ (ທພບ), ພ້ອມທັງມີການພັດທະນາ-ເຊື່ອມໂຍງລະບົບການຊຳລະກັບປະເທດເພື່ອນບ້ານຢ່າງມີຜົນສຳເລັດໃນລະດັບດີ. ເຖິງວ່າສະຖຽນລະພາບເງິນຕາ ຈະມີທ່າອ່ຽງທີ່ຕັ້ງໜ້າດີຂຶ້ນ, ແຕ່ກໍເຫັນວ່າຍັງບໍ່ທັນສາມາດແກ້ໄຂບັນຫາເຄັ່ງຮ້ອນທີ່ມີຢູ່ໃນປັດຈຸບັນໃຫ້ຂາດຕົວໝົດໄປໄດ້ ແລະ ການປະຕິບັດບັນດາຄາດໝາຍ, ດ້ານຕົວຊີ້ວັດທີ່ສະພາແຫ່ງຊາດຮັບຮອງຍັງບໍ່ທັນບັນລຸທຸກຄາດໝາຍ.
 |
ກອງປະຊຸມຄັ້ງນີ້, ໄດ້ພິຈາລະນາຮ່າງເອກະສານສໍາຄັນຄື: ບົດລາຍງານການເຄື່ອນໄຫວວຽກງານພົ້ນເດັ່ນ ແລະ ການຈັດຕັ້ງປະຕິບັດແຜນເງິນຕາ ທຫລ ປະຈຳປີ 2025 ແລະ ວາງທິດທາງແຜນການປີ 2026 ຮຽກຮ້ອງມາຍັງບັນດາທ່ານຮອງປະທານ ແລະ ກຳມະການສະພາບໍລິຫານ ແລະ ຜູ້ເຂົ້າຮ່ວມກອງປະຊຸມ ຈົ່ງເຊີດຊູຄວາມຮັບຜິດຊອບສຸມໃສ່ຄົ້ນຄວ້າປະກອບຄໍາຄິດ-ຄໍາເຫັນໃສ່ເນື້ອໃນເອກະສານຢ່າງເລິກ ເຊິ່ງ ແລະ ກົງໄປກົງມາ ເພື່ອຊອກຫາວິທີທາງອອກທີ່ເໝາະສົມ ແລະ ສາມາດນຳໄປຈັດຕັ້ງປະຕິບັດຕົວຈິງຢ່າງເປັນຮູບປະທຳ.
ຂ່າວ: ບຸນຕອມ; ພາບ: ບຸນອຸ້ມ
ຄໍາເຫັນ