ແຫ່ງຊາດ ຂອງ ສປປ ລາວ”ຈະຈັດຂຶ້ນໃນກາງເດືອນພະຈິກ 2024ນີ້.
ທ່ານ ນາງ ພອນວັນ ອຸທະວົງ ຮອງລັດຖະມົນຕີ ກະຊວງແຜນການ ແລະ ການລົງທຶນ (ຜທ) ຮ່ວມກັບ ທ່ານ ບັກໂຮເດຍ ເບີຄະນ໋ອຟ ຜູ້ປະສານງານ ອົງການສະຫະປະຊາຊາດ ປະຈຳ ສປປ ລາວ ຖະແຫຼງຂ່າວຕໍ່ສື່ມວນຊົນ ກ່ຽວກັບຄວາມພ້ອມ ໃນການກະກຽມຈັດກອງປະຊຸມດັ່ງກ່າວເມື່ອວັນທີ 4 ພະຈິກ ນີ້.
ທ່ານ ນາງ ພອນວັນ ອຸທະວົງ ໄດ້ແຈ້ງໃຫ້ຊາບ ກ່ຽວກັບຜົນສໍາເລັດ ແລະ ຄວາມຄວາມຄືບໜ້າໃນການຈັດຕັ້ງ ປະຕິບັດຜັນຂະຫຍາຍຜົນກອງປະຊຸມໂຕະມົນ 2023 ຂອງບັນດາກະຊວງ, ຂະແໜງການ, ການຈັດຕັ້ງປະຕິບັດທ້າຍສະໄໝ ຂອງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025) ແລະ ສະເໜີກ່ຽວກັບ ການສ້າງແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ X (2026-2030) ຊຶ່ງປີນີ້, ລັດຖະບານ ແຫ່ງ ສປປ ລາວ ກໍຄື ກະຊວງແຜນການ ແລະ ການລົງທຶນ ໄດ້ເຊື້ອເຊີນຜູ້ແທນກອງປະຊຸມເຂົ້າຮ່ວມ ຫຼາຍກວ່າ 300 ທ່ານ. ໃນນັ້ນ, ປະກອບມີ ກະຊວງ, ຂະແໜງການ, ອົງການທຽບເທົ່າກະຊວງ ລວມທັງ 17 ແຂວງ ແລະ 1 ນະຄອນຫຼວງ, ບັນດາປະເທດເພື່ອນມິດສາກົນ, ຄູ່ຮ່ວມພັດທະນາ, ອົງການຈັດຕັ້ງທາງສັງຄົມ, ພາກເອກະຊົນ, ອົງການບໍ່ຫວັງຜົນກຳໄລ ແລະ ພາກສ່ວນ ທີ່ກ່ຽວຂ້ອງອື່ນໆເຂົ້າຮ່ວມ.
ທ່ານຮອງລັດຖະມົນຕີກະຊວງ ຜທ ກ່າວອີກວ່າ: ໃນປີ 2024 ເປັນປີທີ່ມີຄວາມໝາຍຄວາມສໍາຄັນຢ່າງຍິ່ງ, ເນື່ອງຈາກເປັນປີທີ່ພວກເຮົາກໍາລັງຢູ່ ໃນໄລຍະທ້າຍສະໄໝ ຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025) ແລະ ເປັນປີທີ່ພວກເຮົາພວມ ກະກຽມສ້າງແຜນພັດທະນາເສດຖະກິດ-ສັງຄົມ ແຫ່ງ ຊາດ 5 ປີ ຄັ້ງທີ X ຊຶ່ງກະຊວງແຜນການ ແລະ ການລົງທຶນ ກໍຄື ລັດຖະບານ ໄດ້ສໍາເລັດຮ່າງທີ 3 ຂອງແຜນດັ່ງກ່າວເປັນທີ່ຮຽບຮ້ອຍແລ້ວ. ພ້ອມກັນນີ້, ພວກເຮົາໄດ້ສຸມໃສ່ຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ໃນອີກ 1 ປີ (ປີ 2025)ທ່າມກາງສິ່ງທ້າທາຍຫຼາຍປະການ ເນື່ອງຈາກຫຼາຍປັດໄຈ ເຊັ່ນ: ສະພາບເສດຖະກິດໂລກທີ່ມີການຜັນແປ ແລະ ສັບສົນ, ອັດຕາເງິນເຟີ້ ແລະ ຄ່າຄອງຊີບສູງ, ຜົນກະທົບຈາກໄພນໍ້າຖ້ວມ ແລະ ອື່ນໆ ບົນພື້ນຖານທີ່ງົບປະມານມີຄວາມຈໍາກັດ ແລະ ຄວາມຕ້ອງການດ້ານການພັດທະນາເປັນຈຳນວນຫຼວງຫຼາຍ, ດັ່ງທີ່ໄດ້ກຳນົດໄວ້ໃນວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ພວກເຮົາກໍໄດ້ສູ້ຊົນ ຈັດຕັ້ງປະຕິບັດວຽກງານຍຸດທະສາດດ້ານການເງິນ ພາຍໃຕ້ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX (2021-2025) ແລະ ຍຸດທະສາດອື່ນໆ.
ທ່ານ ນາງ ພອນວັນ ອຸທະວົງ ຍັງໃຫ້ຮູ້ອີກວ່າ: ການກະກຽມກອງປະຊຸມໂຕະມົນໃນປີນີ້, ໄດ້ຮັບການນໍາພາ-ຊີ້ນໍາຢ່າງໃກ້ຊິດຈາກທ່ານນາຍົກລັດຖະມົນຕີ ແຫ່ງ ສປປ ລາວ, ປະທານຄະນະຊີ້ນໍາລະດັບຊາດ ເພື່ອຂະບວນການໂຕະມົນ. ກະຊວງແຜນການ ແລະ ການລົງທຶນ ຮ່ວມກັບຫ້ອງການຜູ້ປະສານງານ ອົງການສະຫະປະຊາຊາດ ແລະ ອົງການສະຫະປະຊາຊາດ ເພື່ອການພັດທະນາ ປະຈຳ ສປປ ລາວ ໄດ້ເຮັດວຽກຮ່ວມກັນຢ່າງໃກ້ຊິດກັບບັນດາກະຊວງ, ຂະແໜງການ, ທ້ອງຖິ່ນ, ປະເທດເພື່ອນມິດ, ຄູ່ຮ່ວມພັດທະນາ ແລະ ພາກສ່ວນກ່ຽວຂ້ອງອື່ນໆ ໃນການກະກຽມ ແລະ ຈັດກອງປະຊຸມໂຕະມົນໃນປີນີ້ ເຮັດໃຫ້ການກະກຽມກອງປະຊຸມໂຕະມົນ ປະຈໍາປີ 2024 ພ້ອມແລ້ວເກືອບ 100%.
ຂ່າວ-ພາບ: ນາງແສງຈັນ
ຄໍາເຫັນ