ກອງປະຊຸມໂຕະມົນປະຈຳປີ 2023 ເນັ້ນຄົ້ນຄວ້າ 3 ຫົວຂໍ້ສໍາຄັນເພື່ອພັດທະນາແບບຍືນຍົງ

ກອງປະຊຸມໂຕະມົນປະຈຳປີ 2023 ພາຍໃຕ້ຫົວຂໍ້ “ເລັ່ງລັດການຈັດຕັ້ງປະຕິບັດຜົນການທົບທວນກາງສະໄໝ ຂອງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ເພື່ອບັນລຸເປົ້າໝາຍການພັດທະນາແບບຍືນຍົງ ແລະ ຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ຂອງ ສປປ ລາວ” ຈັດຂຶ້ນວັນທີ 13 ກຸມພາ ນີ້ທີ່ຫໍປະຊຸມແຫ່ງຊາດນະຄອນຫຼວງວຽງຈັນ. ໂດຍເປັນປະທານຮ່ວມຂອງທ່ານ ຄຳເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ, ທ່ານ ບັກໂຄເດຍ ເບີຄະນ໋ອຟຜູ້ປະສານງານອົງການສະຫະປະຊາຊາດ ປະຈຳ ສປປ ລາວ ຊຶ່ງມີບັນດາທ່ານຮອງລັດຖະມົນຕີກະຊວງການຕ່າງປະເທດ, ກະຊວງການເງິນ, ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ກະຊວງແຜນການ ແລະ ການລົງທຶນ, ກະຊວງສຶກສາທິການ ແລະ ກິລາ, ກະຊວງສາທາລະນະສຸກ, ກະຊວງແຮງງານ ແລະ ສະຫວັດດີການສັງຄົມ, ຮອງປະທານກໍາມາທິການສະພາແຫ່ງຊາດ, ອົງການທຽບເທົ່າກະຊວງ, ຮອງເຈົ້າແຂວງ, ຮອງເຈົ້າຄອງ, ພະແນກແຜນການ ແລະ ການລົງທຶນແຂວງ, ເອກອັກຄະລັດຖະທູດ,ທູຕານຸທູດ ແລະ ອົງການຈັດຕັ້ງສາກົນເຂົ້າຮ່ວມ.
ໃນກອງປະຊຸມ, ໄດ້ມີການນໍາສະເໜີ 3 ຫົວຂໍ້ສໍາຄັນຄື: 1). ບົດສະຫຼຸບການຈັດຕັ້ງປະຕິບັດກາງສະໄໝແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX, ຍຸດທະສາດດ້ານການເງິນ ເພື່ອສະໜັບສະໜູນແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ແລະ ຂອບການຟື້ນຟູເສດຖະກິດຂອງ ສປປ ລາວ; 2). ບົດລາຍງານແບບສະໝັກໃຈແຫ່ງຊາດ ຄັ້ງທີ III ແລະ ແຜນຍຸດທະສາດການຂ້າມຜ່ານອອກຈາກສະຖານະພາບດ້ອຍພັດທະນາຢ່າງໂລ່ງລ່ຽນຂອງ ສປປ ລາວ, ວິໄສທັດຮອດປີ 2030 ແລະ ທິດທາງໃນຕໍ່ໜ້າ ແລະ 3). ນຳສະເໜີກ່ຽວກັບການຮ່ວມມືເພື່ອການພັດທະນາ (ການຕິດຕາມການເປັນຄູ່ຮ່ວມມືສາກົນ ຄັ້ງທີ 4 ແລະ ບົດແນະນໍາການຈັດຕັ້ງປະຕິບັດຂະບວນການໂຕະມົນ).
ນອກຈາກນີ້, ກອງປະຊຸມຍັງໄດ້ຮັບຟັງການລາຍງານຜົນຂອງການປຶກສາຫາລື ຈາກກຸ່ມສົນທະນາໃນ 2 ຫົວຂໍ້ຄື: 1. ສະພາບເສດຖະກິດ ແລະ ທິດທາງການເຕີບໂຕເພື່ອຄວາມຍືນຍົງ ແລະ ສີຂຽວ; 2. ຊັບພະຍາກອນມະນຸດເພື່ອການພັດທະນາແບບຍືນຍົງ. ພາຍຫຼັງສຳເລັດກອງປະຊຸມດັ່ງກ່າວ ທ່ານປະທານ ແລະ ປະທານຮ່ວມຂອງກອງປະຊຸມ ພ້ອມດ້ວຍຜູ້ຕາງໜ້າຝ່າຍຄູ່ຮ່ວມພັດທະນາ ໄດ້ນຳສະເໜີຜົນ ແລະ ເນື້ອໃນຈິດໃຈຂອງກອງປະຊຸມ ເພື່ອລາຍງານຕໍ່ທ່ານນາຍົກລັດຖະມົນຕີ ແຫ່ງ ສປປ ລາວ ເພື່ອເປັນທິດທາງໃນການຈັດຕັ້ງຜັນຂະຫຍາຍຜົນຂອງກອງປະຊຸມໂຕະມົນ ປີ 2023 ໃຫ້ປະກົດຜົນເປັນຈິງ.
(ຂ່າວ-ພາບ: ຂ່າວສານກະສິກຳ ປ່າໄມ້)