ໂດຍການເປັນປະທານຂອງທ່ານ ບຸນຈັນ ກົມບຸນຍະສິດ ຫົວໜ້າກົມປູກຝັງ, ມີທ່ານ ວັນທ່ຽງ ພົມມະສຸລິນ ຮອງຫົວໜ້າກົມປູກຝັງ, ຮອງຫົວໜ້າຫ້ອງການ ກສ, ຮອງຫົວໜ້າສະຖາບັນຄົ້ນຄ້ວາກະສິກໍາ, ປ່າໄມ້ ແລະ ພັດທະນາຊົນນະບົດ, ຮອງຫົວໜ້າກົມສົ່ງເສີມກະສິກໍາ ແລະ ສະຫະກອນ ຕາງໜ້າຈາກກົມແຜນການ ແລະ ການຮ່ວມມື, ກົມຄຸ້ມຄອງ ແລະ ພັດທະນາທີ່ດິນ, ບັນດາຫົວໜ້າພະແນກ, ຮອງພະແນກ, ຫົວໜ້າສູນ, ຮອງສູນ, ຜູ້ປະສານງານອາຊຽນຂອງກົມປູກຝັງ, ຕາງໜ້າຜູ້ສະໜັບສະໜູນ ຈາກໂຄງການສົ່ງເສີມຕ່ອງໂສ້ ການຜະລິດກະສິກຳແບບຍືນຍົງໃນອາຊຽນ ໄລຍະ II. (ASEAN AgriTrade II) ໃຫ້ການສະໜັບສະໜູນກອງປະຊຸມຄັ້ງນີ້.
ຈຸດປະສົງຂອງກອງປະຊຸມຄັ້ງນີ້ແມ່ນເພື່ອລາຍງານຄວາມຄືບໜ້າແຕ່ລະກິດຈະກຳຂອງຂະແໜງ ການປູກຝັງກັບອາຊຽນ ລວມທັງບັນດາສິ່ງທ້າທາຍ, ແນວທາງແກ້ໄຂ ແລະ ແຜນກິດຈະກໍາໃນຕໍ່ໜ້າ.
ທ່ານ ບຸນຈັນ ກົມບຸນຍະສິດ ໄດ້ກ່າວເປີດກອງປະຊຸມ ແລະ ປະກອບຄຳເຫັນບາງຕອນ: “ກອງປະຊຸມສຳມະນາວຽກງານການຮ່ວມມືອາຊຽນໃນຂະແໜງການປູກຝັງຄັ້ງນີ້, ແມ່ນກິດຈະກຳໜຶ່ງທີ່ນອນໃນວຽກງານແຜນການ ແລະ ຮ່ວມມືຂອງກົມປູກຝັງ, ມີຄວາມສຳຄັນ ແລະ ຈຳເປັນທີ່ສຸດໃນການປະກອບສ່ວນເຂົ້າໃນແຜນງານຜະລິດສະບຽງອາຫານ ແລະ ຜະລິດເປັນສິນຄ້າໃນໜ້າທີ່ວຽກງານການຮ່ວມມືລະຫວ່າງຂະ ແໜງການປູກຝັງກັບອາຊຽນ ສະນັ້ນ, ເມື່ອລະບົບຂອງວຽກງານການຮ່ວມມືກັບອາຊຽນ ໄດ້ຮັບການພັດທະນາ ແລະ ປັບປຸງໃຫ້ດີຂຶ້ນ, ກໍຈະມີຜົນກະທົບທີ່ດີໂດຍກົງ ໃຫ້ແກ່ຂະບວນການຮ່ວມມືກັບອາຊຽນ ແລະ ສາກົນ ໃນການຈັດຕັ້ງປະຕິບັດວຽກງານການເຄື່ອນໄຫວມີຜົນດີໃນການພັດທະນາ ແລະ ໜ້າທີ່ບົດບາດດ້ານການຮ່ວມມືໃນຂະແໜງການປູກຝັງ. ວຽກງານຂະແໜງການປູກຝັງ ເປັນຂະແໜງໜຶ່ງທີ່ມີຄວາມສຳຄັນ ໃນການປະກອບສ່ວນໃຫ້ແກ່ການພັດທະນາທາງດ້ານການຮ່ວມມືດ້ານວິຊາການຂະແໜງ ການປູກຝັງກັບອາຊຽນ ລວມມີ 4 ວຽກງານຫຼັກ ຄື: 1). ຄະນະກຳມະການຄ້ຳປະກັນຄັງແຮສະບຽງອາຫານອາຊຽນ (AFSRB), 2). ໜ່ວຍງານວິຊາການດ້ານພືດອາຊຽນ (ASWGC), ໜ່ວຍງານການເຊື່ອມໂຍງ ກ່ຽວກັບ ສານພິດຕົກຄ້າງຂອງຢາປາບສັດຕູພືດ (MRLs), 3). ໜ່ວຍງານຊ່ຽວຊານດ້ານການເຊື່ອມໂຍງມາດຕະການສຸຂານາໄມພືດ (SPS). 4). ໜ່ວຍງານຊ່ຽວຊານດ້ານການປະຕິບັດກະສິກຳອິນຊີອາຊຽນ ແລະ ໜ່ວຍງານຊ່ຽວຊານດ້ານການປະຕິບັດກະສິກຳທີ່ດີອາຊຽນ (GAP, OA), ຄະນະສະເພາະກິດດ້ານມາດຕະຖານສິນຄ້າພືດ ອາຊຽນ ແລະ ຫົົວຂໍ້ອື່ນໆທີ່ກ່ຽວຂ້ອງ”.
ພາຍຫຼັງທ່ານປະທານໄດ້ກ່າວເປີດ ແລະ ມີຄຳເຫັນຕໍ່ກອງປະຊຸມແລ້ວ ກໍໄດ້ມອບໃຫ້ ທ່ານ ວັນທ່ຽງ ພົມມະສຸລິນ ສືບຕໍ່ຊີ້ນຳ-ນຳພາກອງປະຊຸມ. ກອງປະຊຸມໄດ້ຮັບຟັງການນຳສະເໜີການຈັດຕັ້ງປະຕິບັດຄຸ້ມຄອງວຽກງານການຮ່ວມມືຂອງກົມປູກຝັງກັບອາຊຽນ, ໜ່ວຍງານວິຊາການ ກ່ຽວກັບ ພືດອາຊຽນ, ຄະນະກຳມະການຄ້ຳປະກັນຄັງແຮສະບຽງອາຫານອາຊຽນ ແລະ ຄະນະສະເພາະກິດອາຊຽນ ເພື່ອພັດທະນາລະບຽບການ ຮັບຮອງດ້ານມາດຕະຖານ ແລະ ການຢັ້ງຢຶນ ໂດຍພະແນກແຜນການ ແລະ ການຮ່ວມມື,ໜ່ວຍງານຊ່ຽວຊານດ້ານການເຊື່ອມໂຍງມາດຕະການສຸຂານາໄມພືດ, ວຽກ ງານສຸຂານາໄມ ແລະ ສຸຂານາໄມພືດ ໂດຍພະແນກກັກກັນພືດ, ໜ່ວຍງານການເຊື່ອມໂຍງ ກ່ຽວກັບສານພິດຕົກຄ້າງ ຂອງຢາປາບສັດຕູພືດ ແລະ ຄະນະສະເພາະກິດອາຊຽນ ກ່ຽວກັບ ກົດລະຫັດອາຫານ ໂດຍພະແນກລະບຽບການ ແລະ ຂຶ້ນປັດໄຈການຜະລິດ, ໜ່ວຍງານຊ່ຽວຊານດ້ານການຈັດຕັ້ງປະຕິບັດກະສິກຳອິນຊີອາຊຽນ, ໜ່ວຍງານຊ່ຽວຊານດ້ານການປະຕິບັດກະສິກຳທີ່ດີອາຊຽນ ແລະ ຄະນະສະເພາະກິດດ້ານມາດຕະຖານສິນຄ້າພືດ ອາຊຽນ ໂດຍພະແນກມາດຕະຖານ ແລະ ການຢັ້ງຢືນ ແລະ ວຽກງານຮ່ວມມືອາຊຽນ ໂດຍສູນກະສິກຳສະອາດ. ຈາກນັ້ນ ຜູ້ແທນກອງປະຊຸມກໍໄດ້ມີການສົນທະນາແລກປ່ຽນຄຳເຫັນຢ່າງກົງໄປກົງມາ ແບບສ້າງສັນ ແລະ ເຫັນໄດ້ວ່າການປະກອບຄຳເຫັນຂອງແຕ່ລະທ່ານນັ້ນລ້ວນແລ້ວແຕ່ເປັນຄຳເຫັນທີ່ເປັນປະໂຫຍດໃຫ້ແກ່ວຽກງານການຮ່ວມມືອາຊຽນ ໃນຂະແໜງການປູກຝັງໃນການປັບປຸງ ແລະ ຈັດຕັ້ງຜັນຂະຫຍາຍໃນຕໍ່ໜ້າ.
(ຂ່າວ: ພະແນກເຕັກໂນໂລຊີຂໍ້ມູນ-ຂ່າວສານ, ຫ້ອງການ ກສ)
ຄໍາເຫັນ