 |
ໃນກອງປະຊຸມຄັ້ງນີ້ ຈະໄດ້ພ້ອມກັນລົງເລິກເປັນວາລະພິເສດມີຫຼາຍເນື້ອໃນສຳຄັນ ພ້ອມກັນສຸມໃສ່ຄົ້ນຄວ້າປະກອບຄໍາຄິດຄຳເຫັນ ແລະ ພ້ອມກັນຕົກລົງເປັນເອກະພາບກັນ ບາງບັນຫາເນື້ອໃນທີ່ສຳຄັນ ໂດຍສະເພາະບົດສະຫຼຸບຕີລາຄາການຈັດຕັ້ງປະຕິບັດວຽກງານ ຂອງຄະນະບໍລິຫານງານ ສຊປລ ສະໄໝທີ VIII ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ; ໃນກອງປະຊຸມບັນດາຜູ້ແທນຍັງໄດ້ຍົກສູງຄວາມຮັບຜິດຊອບ ແລະ ສຸມສະຕິປັນຍາຂອງຕົນ ເຂົ້າໃນການຄົ້ນຄວ້າ ປະກອບຄໍາຄິດຄໍາເຫັນຕໍ່ກອງປະຊຸມຢ່າງກົງໄປກົງມາ ແລະ ເຫັນໄດ້ຄວາມໝາຍຄວາມສຳຄັນຕໍ່ຊີວິດການເມືອງຂອງຊາວໜຸ່ມ ເພື່ອສືບຕໍ່ຊີ້ນຳການເຄື່ອນໄຫວວຽກງານຂອງຊາວໜຸ່ມ-ເຍົາວະຊົນໃນຕໍ່ໜ້າ, ຜູ້ແທນກອງປະຊຸມໄດ້ພ້ອມກັນຄົ້ນຄວ້າ, ປຶກສາຫາລືບັນຫາຕ່າງໆ ເພື່ອກະກຽມຄວາມພ້ອມໃຫ້ແກ່ການດໍາເນີນກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VIII ແລະ ຮັບຮອງເອົາເອກະສານສໍາຄັນຕ່າງໆດັ່ງນີ້: ກອງປະຊຸມໄດ້ຮັບຟັງການລາຍງານຄວາມພ້ອມການກະກຽມກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ IX; ຄົ້ນຄວ້າຮ່າງລາຍງານການເມືອງກອງປະຊຸມໃຫຍ່ຜູູູ້ແທນຊາວໜຸ່ມທົ່ວປະເທດ ຄັ້ງທີ IX; ຄົ້ນຄວ້າຮ່າງແຜນພັດທະນາຊາວໜຸຸ່ມ - ເຍົາວະຊົນ 5 ປີ ຄັ້ງທີ III (2026-2030); ຮັບຮອງເອົາບົດສໍາຫຼວດການນໍາພາລວມຂອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ສະໄໝທີ VIII; ທົບທວນບາງພາກໃນກົດລະບຽບຂອງຄະນະຊາວໜຸຸ່ມປະຊາຊົນ ປະຕິວັດລາວ ສະໄໝທີ VIII; ທົບທວນບາງພາກໃນກົດລະບຽບການຈັດຕັ້ງເຍົາວະຊົນທັນວາ.
ປະທານກອງປະຊຸມຍັງໄດ້ຮຽກຮ້ອງມາຍັງຄະນະຊາວໜຸ່ມທຸກຂັ້ນ, ພະນັກງານສະມາຊິກຊາວໜຸ່ມ ແລະ ຊາວໜຸ່ມ-ເຍົາວະຊົນລາວບັນດາເຜົ່າ ໃນຂອບເຂດທົ່ວປະເທດ ຈົ່ງເພີ່ມທະວີຄວາມສາມັກຄີເປັນເອກະພາບທາງດ້ານແນວຄິດ, ອຸດົມການ, ຍົກສູງນໍ້າໃຈຮັກຊາດ, ຮັກບ້ານເກີດເມືອງນອນ, ຮັກສາວັດທະນະທຳອັນດີງາມຂອງຊາດ, ຂອງເຜົ່າ, ຮັກສາສິ່ງແວດລ້ອມ, ມີສະຕິເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ເດັດດ່ຽວຈັດຕັ້ງປະຕິບັດນະໂຍບາຍປ່ຽນແປງໃໝ່ຢ່າງມີຫຼັກການຂອງພັກໃຫ້ສໍາເລັດ, ພ້ອມກັນສຸມສະຕິປັນຍາເຂົ້າໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VIII ໃຫ້ປະກົດຜົນເປັນຈິງ. ພ້ອມກັນສ້າງຂະບວນການຂໍ່ານັບຮັບຕ້ອນ 3 ວັນປະຫວັດສາດຂອງຊາດ, ຂອງພັກ ແລະ ວັນສ້າງຕັ້ງ ຄຊປປລ ຄົບຮອບ 70 ປີ ກະກຽມຄວາມພ້ອມຮອບດ້ານໃຫ້ແກ່ກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ IX ໃຫ້ສໍາເລັດຜົນຕາມລະດັບຄາດໝາຍ ແລະ ແຜນການທີ່ວາງໄວ້.
 |
ຄໍາເຫັນ