 |
ໃນວາລະຕອນເຊົ້າ, ມີການດຳເນີນກອງປະຊຸມປຶກສາຫາລືວິຊາການກ່ຽວກັບວຽກງານປິ່ນອ້ອມຂອງຂະແໜງການແກ້ໄຂບັນຫາລະເບີດບໍ່ທັນແຕກ (ລບຕ) ທີ່ຕົກຄ້າງ ຢູ່ ສປປ ລາວ, ໂດຍການເປັນປະທານຮ່ວມຂອງທ່ານ ອາລົມລັງສີ ລາຊະວົງ, ຮອງຫົວໜ້າກົມອົງການຈັດຕັ້ງສາກົນ, ກະຊວງການຕ່າງປະເທດ ແລະ ທ່ານ ນາງ Johanna Hazebroek, ເລຂາເອກສະຖານເອກອັກຄະລັດຖະທູດ ອົສຕຣາລີ ປະຈຳ ສປປ ລາວ. ຈຸດປະສົງຂອງກອງປະຊຸມແມ່ນເພື່ອເພິີ່ມທະວີຄວາມເຂົ້າໃຈຕໍ່ວຽກງານ ລບຕ ຢູ່ ສປປ ລາວ ພ້ອມທັງເປັນການແລກປ່ຽນປຶກສາຫາລືບັນຫາປິ່ນອ້ອມ ຕິດພັນກັບທຸກຂະແໜງການ, ກະຊວງ ແລະ ອົງການປະຕິບັດງານເປັນຕົ້ນແມ່ນ ບັນຫາການປ່ຽນແປງຂອງສະພາບດິນຟ້າອາກາດ, ສິ່ງແວດລ້ອມ, ບົດບາດຍິງ-ຊາຍ, ສິດທິຂອງຜູ້ພິການ, ການພັດທະນາແບບຍືນຍົງ ແລະ ການມີສ່ວນຮ່ວມຂອງຊຸມຊົນເພື່ອຮັບປະກັນປະສິດທິພາບ ແລະ ປະສິດທິຜົນໃນການການແກ້ໄຂບັນຫາ ລບຕ ຢູ່ ສປປ ລາວ. ກອງປະຊຸມໄດ້ສຸມໃສ່ການແລກປ່ຽນທາງດ້ານມາດຕະການ ແລະ ບົດຮຽນໃນການຈັດຕັ້ງປະຕິບັດທີ່ຖືເອົາການມີສ່ວນຮ່ວມຂອງ ປະຊາຊົນ ແລະ ຊຸມຊົນເປັນໃຈກາງ. ກອງປະຊຸມໄດ້ຮັບຟັງການກໍານົດວຽກງານດັ່ງກ່າວເຂົ້າໃນຮ່າງປະຕິບັດງານນະຄອນຫຼວງວຽງຈັນ ເພື່ອເປັນການຈັດຕັ້ງປະຕິບັດສົນທິສັນຍາວ່າດ້ວຍການເກືອດຫ້າມລະເບີດບໍ່ທັນແຕກ. ບັນຍາກາດກອງປະ ຊຸມໄດ້ດຳເນີນເຕັມໄປດ້ວຍເນື້ອໃນທີ່ມີຄວາມໝາຍ ຊຶ່ງບັນດາບົດຮຽນ ແລະ ຂໍ້ສະເໜີແນະຕ່າງໆທີ່ໄດ້ຮັບໃນກອງປະຊຸມຄັ້ງນີ້ ຈະເປັນສ່ວນສຳຄັນໃນການຮ່າງແຜນປະຕິບັດງານນະຄອນຫຼວງວຽງຈັນ ທີ່ຈະໄດ້ນໍາມາພິຈາລະນາ ເເລະ ຮັບຮອງໃນເດືອນກັນຍາ 2026 ທີ່ນະຄອນຫຼວງວຽງຈັນ.
ໃນວາລະຕອນບ່າຍ, ໄດ້ຈັດກອງປະຊຸມເຜີຍແຜ່ຂໍ້ມູນທາງດ້ານພະລາທິການ ເພື່ອສ້າງຄວາມເຂົ້າໃຈ ແລະ ລາຍງານຄວາມຄືບໜ້າໃນການກະກຽມກອງປະຊຸມທົບທວນສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ຮອບວຽນ ທີ 3 ທີ່ ສປປ ລາວ ຈະເປັນເຈົ້າພາບ ຊຶ່ງວາລະດັ່ງກ່າວ ທ່ານ ອາລົມລັງສີ ລາຊະວົງ ໄດ້ລາຍງານຂໍ້ມູນດ້ານພະລາທິການ ແລະ ຂໍ້ມູນກິດຈະກຳປິ່ນອ້ອມອື່ນໆໂດຍລະອຽດ ພ້ອມທັງດໍາເນີນການຖາມ-ຕອບ ໃຫ້ແກ່ຄະນະທູຕານຸທູດ ແລະ ອົງການຈັດຕັ້ງສາກົນ ປະຈຳ ສປປ ລາວ ຕໍ່ຂອບວຽກດ້ານເນື້ອໃນ, ພະລາທິການ ເພື່ອກຽມຄວາມພ້ອມຮອບດ້ານ ແລະ ຮັບປະກັນຜົນສຳເລັດໃນການເປັນເຈົ້າພາບຈັດກອງປະຊຸມ 3RCCCM.
 |
ສຳຄັນໄປກວ່ານັ້ນ, ວາລະສຸດທ້າຍເເມ່ນໄດ້ຮັບກຽດຢ່າງສູງຈາກ ທ່ານ ອານຸພາບ ວົງໜໍ່ແກ້ວ, ຮອງລັດຖະມົນຕີກະຊວງການຕ່າງປະເທດ, ຮອງປະທານ ຜູ້ປະຈໍາການ ຄະນະນະກໍາມະການຄຸ້ມຄອງແຫ່ງຊາດເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ເປັນປະທານ ຈັດງານສົ່ງ ເສີມການມີສ່ວນຮ່ວມຂອງທຸກພາກສ່ວນໃນການຊ່ວຍເຫຼືອຜູ້ຖືກເຄາະຮ້າຍຈາກລະເບີດບໍ່ທັນເເຕກ ເເລະ ການສະໜັບສະໜູນການເປັນປະທານກອງປະຊຸມ 3RCCCM. ບັນດາຜູ້ເຂົ້າຮ່ວມໄດ້ຮັບຟັງຄວາມເປັນມາ, ບົດຮຽນ ແລະ ຮັບຊົມວິດີໂອ ກ່ຽວກັບພາລະບົດບາດຂອງລັດຖະບານຕໍ່ວຽກງານຊ່ວຍເຫຼືອຜູ້ຖືກເຄາະຮ້າຍຈາກ ລບຕ ຊຶ່ງເປັນການຍົກໃຫ້ເຫັນເຖິງຄວາມສຳຄັນດ້ານມະນຸດສະທຳພາຍໃຕ້ສົນທິສັນຍາ CCM. ພ້ອມດຽວກັນນັ້ນ, ພາຍໃນງານຍັງມີການວາງສະເເດງຮູບພາບກ່ຽວກັບ ຜົນກະທົບຈາກ ລບຕ, ວິຖີຊີວິດການເປັນຢູ່ຂອງຜູ້ຖືກເຄາະຮ້າຍ ແລະ ຄວາມຄືບໜ້າຂອງການຈັດຕັ້ງປະຕິບັດສົນທິສັນຍາ CCM ໃນ ສປປ ລາວ ໂດຍທັງໝົດນີ້ແມ່ນເພື່ອເສີມຂະຫຍາຍການຮ່ວມມືຂອງທຸກພາກສ່ວນໃນສັງຄົມໂດຍສະເພາະຄູ່ຮ່ວມພາກເອກະຊົນເພື່ອພ້ອມກັນເປັນເຈົ້າພາບຈັດກອງປະຊຸມທົບທວນ ຮອບວຽນທີ 3 ສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ (3RCCCM)ໃນລະຫວ່າງວັນທີ 13-18 ກັນຍາ 2026 ໃຫ້ໄດ້ຮັບຜົນສຳເລັດຢ່າງຈົບງາມ.
(ຂ່າວ: ກຕທ)
ຄໍາເຫັນ