ສປປ ລາວ ກຳລັງປະເຊີນກັບໄພພິບັດທາງອຸຕຸນິຍົມເຊັ່ນ: ພາຍຸ, ນ້ຳຖ້ວມ, ໄພແຫ້ງແລ້ງ ແລະ ຄວາມຮ້ອນທີ່ເພີ່ມທະວີຄວາມຮຸນແຮງຂຶ້ນເນື່ອງຈາກການປ່ຽນແປງຂອງສະພາບອາກາດ. ນ້ຳຖ້ວມໃນປີ 2024 ໃນແຂວງຫຼວງນໍ້າທາ ເກີດຄວາມເສຍຫາຍໜັກເປັນຕົວຢ່າງທີ່ຊັດເຈນຂອງຄວາມຈຳເປັນຢ່າງຮີບດ່ວນໃນການກະກຽມຄວາມພ້ອມໃນການຮັບມືກັບໄພພິບັດຢ່າງມີປະສິດທິພາບ. ການຮັບປະກັນວ່າຂໍ້ຄວາມແຈ້ງເຕືອນໄພພິບັດສາມາດເຂົ້າເຖິງທຸກຄົນ ລວມທັງຜູ້ພິການແມ່ນສິ່ງສຳຄັນຫຼາຍໃນການປົກປ້ອງຊຸມຊົນ ລວມທັງການສ້າງຄວາມພ້ອມ ແລະ ຂີດຄວາມສາມາດໃຫ້ແກ່ລັດຖະບານໃນການຄຸ້ມຄອງປະຊາຊົນໄດ້ດີຂຶ້ນ.
ການຈັດຝຶກອົບຮົມຄັ້ງນີ້, ເກີດຂຶ້ນຈາກຄຳແນະນຳໃນລາຍງານການສຳຫຼວດຄວາມຮັບຮູ້ລະບົບແຈ້ງເຕືອນໄພພິບັດທີ່ສະເໜີໃຫ້ມີການພັດທະນາລະບົບແຈ້ງເຕືອນທີ່ປະກອບດ້ວຍຄວາມຫຼາກຫຼາຍເຂົ້າເຖິງໄດ້ສະດວກ ແລະ ໃຫ້ຄວາມສຳຄັນກັບຜູ້ທີ່ເປັນກຸ່ມສ່ຽງ ແລະ ບອບບາງທີ່ສຸດ ຊຶ່ງຜົນການສຳຫຼວດພົບວ່າຜູ້ພິການຫຼາຍຄົນໃນ ສປປ ລາວ ປະສົບກັບອຸປະສັກໃນການຮັບຂໍ້ມູນຂ່າວສານ, ຄວາມເຂົ້າໃຈ ແລະ ການປະຕິບັດຕາມຂໍ້ຄວາມແຈ້ງເຕືອນ. ຊ່ອງວ່າງເຫຼົ່ານີ້, ບໍ່ພຽງແຕ່ເປັນອັນຕະລາຍຕໍ່ຕົວບຸກຄົນ, ແຕ່ຍັງບັນທອນຄວາມສາມາດຂອງຊຸມຊົນໃນການຕອບສະໜອງຕໍ່ສະຖານະການຈຳເປັນອີກດ້ວຍ.
ທ່ານ ບຸນເຕີມ ສີສຸພັນທະວົງ ກ່າວວ່າ: ‘’ກົມອຸຕຸນິຍົມ ແລະ ອຸທົກກະສາດ (DMH), ພວກເຮົາມຸ່ງໝັ້ນທີ່ຈະເຮັດໃຫ້ການຄາດຄະເນ ແລະ ການເຕືອນໄພຂອງພວກເຮົາກວ້າງຂວາງ ແລະ ເຂົ້າເຖິງໄດ້ຫຼາຍຂຶ້ນ. ພວກເຮົາຮັບຮູ້ວ່າຜູ້ພິການປະເຊີນກັບສິ່ງທ້າທາຍຫຼາຍຢ່າງໃນລະຫວ່າງໄພພິບັດເກີດຂຶ້ນ ແລະ ພວກເຮົາຕ້ອງເຮັດວຽກຮ່ວມກັນຫຼາຍຂຶ້ນກັບຄູ່ຮ່ວມງານທັງໝົດເພື່ອຮັບປະກັນວ່າຈະບໍ່ມີໃຜຖືກປະຖິ້ມໄວ້ເບື້ອງຫຼັງ. ກອງປະຊຸມປຶກສາຫາລືຄັ້ງນີ້ແມ່ນໂອກາດອັນລ້ຳຄ່າທີ່ຈະຮັບຟັງ, ຮຽນຮູ້, ແລະ ເສີມສ້າງການບໍລິການເຕືອນໄພລ່ວງໜ້າຂອງພວກເຮົາໂດຍການລວມເອົາສຽງ ແລະ ປະສົບການຂອງຜູ້ພິການ.’’
ການອົບຮົມຄັ້ງນີ້ແມ່ນເປັນການສະໜັບສະໜູນຄວາມມຸ່ງໝັ້ນຂອງ ສປປ ລາວ ຕໍ່ຂໍ້ບັງຄັບມາດຕາ 11 ຂອງອະນຸສັນຍາສະຫະປະຊາຊາດ ວ່າດ້ວຍສິດຂອງຜູ້ພິການ ຊຶ່ງຮຽກຮ້ອງໃຫ້ມີການປົກປ້ອງ ແລະ ຮັບປະກັນຄວາມປອດໄພໃຫ້ຜູ້ພິການໃນສະຖານະການສ່ຽງອັນຕະລາຍລວມທັງໄພພິບັດທາງທຳມະຊາດອີກດ້ວຍ. ນອກຈາກນີ້ຍັງສອດຕ່ອງກັບແຜນງານວ່າດ້ວຍການແຈ້ງເຕືອນລ່ວງໜ້າສຳລັບໝົດທຸກຄົນຂອງ ສປປ ລາວ ທີ່ມຸ່ງໝັ້ນໃນການສ້າງລະບົບແຈ້ງເຕືອນໄພທີ່ຄອບຄຸມ ແລະ ໃຫ້ຄວາມສຳຄັນກັບປະຊາຊົນຢ່າງແທ້ຈິງພາຍໃນປີ 2027.
ທ່ານ ກິນດາວົງ ຫຼວງລາດ ກ່າວວ່າ: ເພື່ອຜັນຂະຫຍາຍຂອບແຜນງານເຊັນໄດຂອງສາກົນວ່າດ້ວຍການຫຼຸດຜ່ອນຄວາມສ່ຽງໄພພິບັດ 2015-2030, ແຜນພັດທະນາແບບຍືນຍົງ (SDG 11), ຍຸດທະສາດອີນຊອນເປົ້າ ໝາຍທີ 7, ຖະແຫຼ່ງການປັກກິງຢູ່ມາດຕາ 11 ຂອງ CRPD ຊຶ່ງເນັ້ນໃຫ້ເຫັນຄວາມສໍາຄັນຂອງການຫຼຸດຜ່ອນຄວາມສ່ຽງໄພພິບັດ ໂດຍການເອົາຜູ້ພິການເຂົ້າມີສ່ວນຮ່ວມໃນທຸກກິດຈະກຳໃນການການກຽມຄວາມພ້ອມ ແລະ ຮັບມືກັບໄພພິບັດ ໂດຍສະເພາະແມ່ນການຮັບຂໍ້ມູນຂ່າວສານການເຕືອນໄພລ່ວງໜ້າ. ກອງປະຊຸມປຶກສາຫາລືຄັ້ງນີ້ແມ່ນເປັນບາດກ້າວສຳຄັນໃນການແລກປ່ຽນບົດຮຽນທີ່ດີ, ສິ່ງທ້າທາຍ, ທິດທາງແກ້ໄຂໃນຕໍ່ໜ້າ ແລະ ເປັນການຍົກສູງບົດບາດການມີສ່ວນຮ່ວມຂອງຜູ້ພິການເຂົ້າມີສ່ວນຮ່ວມໃນການຫຼຸດຜ່ອນຄວາມສ່ຽງໄພພິບັດ ເພື່ອພັດທະນາໃຫ້ລະບົບເຕືອນໄພລ່ວງໜ້າໃຫ້ທຸກພາກສ່ວນ, ທຸກຄົນໃນສັງຄົມໄດ້ຮັບຂໍ້ມູນຂ່າວສານຢ່າງທົ່ວເຖິ່ງ ແລະ ບໍ່ມີໃຜຖືກປະຖິ້ມຢູ່ເບື້ອງຫຼັງ.
ທ່ານ ວິງທອງ ຈັນທະວົງ, ສູນປຶກສາການບູລະນາການຄົນພິການ ກ່າວວ່າ: ຂ້າພະເຈົ້າຮູ້ສຶກໝັ້ນໃຈທີ່ເຫັນຜູ້ເຂົ້າຮ່ວມຈາກຫຼາກຫຼາຍຂະແໜງການ ແລະ ອົງການມາຮ່ວມກັນໃນວັນນີ້ຢູ່ທີ່ນີ້, ລວມທັງກະຊວງຕ່າງໆ, ອົງການພັດທະນາສັງຄົມ, ອົງການຂອງຜູ້ພິການ, ອົງການສະຫະປະຊາຊາດ ແລະ ຄູ່ຮ່ວມພັດທະນາອື່ນໆ. ເມື່ອທຸກຝ່າຍເຂົ້າໃຈອຸປະສັກຂອງຜູ້ພິການແຕ່ລະປະເພດ, ການພັດທະນາເຄື່ອງມື ແລະ ເຕັກໂນໂລຊີສື່ສານທີ່ເໝາະສົມທີ່ສາມາດນຳໄປໃຊ້ເພື່ອໃຫ້ຂ່າວສານເຂົ້າເຖິງຄົນທົ່ວສັງຄົມໄດ້ໃນຍາມເກີດເຫດສຸກເສິນ”
ທ່ານ ນາໂອກິ ມາເອະກາວາ ກ່າວວ່າ: ໃນຖານະທີ່ເປັນອົງການມະນຸດສະທຳທີ່ໃຫຍ່ທີ່ສຸດໃນໂລກ, ອົງການອາຫານໂລກມຸ່ງໝັ້ນວ່າຈະບໍ່ປະຖິ້ມໃຜໄວ້ຂ້າງຫຼັງ – ໂດຍສະເພາະໃນເວລາວິກິດ. ໃນ ສປປ ລາວ, ພວກເຮົາກຳລັງຊ່ວຍລັດຖະບານສ້າງລະບົບເພື່ອຈັດການຄວາມສ່ຽງຈາກການປ່ຽນແປງຂອງສະພາບອາກາດ ແລະ ເຫດການສຸກເສີນອື່ນໆ, ໂດຍໃຫ້ຄວາມສຳຄັນກັບການເຂົ້າເຖິງຂໍ້ມູນທີ່ທັນເວລາ, ຊັດເຈນ ແລະ ປະຕິບັດໄດ້ ເພື່ອຊ່ວຍຊີວິດຜູ້ຄົນໃຫ້ໄດ້ຫຼາຍທີ່ສຸດ. ການອົບຮົມນີ້ເປັນເຄື່ອງຢືນຢັນເຖິງການຮ່ວມມືໃນການດຳເນີນງານໃນຍາມເກີດເຫດການສຸກເສິນ.”
(ຂ່າວ: ແສງຈັນ)
ຄໍາເຫັນ