 |
ກອງປະຊຸມ-ເວທີຍຸດທະສາດສົ່ງເສີມການຮ່ວມມືດ້ານເສດຖະກິດຫວຽດນາມ-ລາວ:
ໃນການປະກອບຄໍາເຫັນ, ທ່ານ ຟຸ້ງ ກວາງ ຫຽບ ໄດ້ເນັ້ນໜັກວ່າ ກອງປະຊຸມສົ່ງເສີມການລົງທຶນຫວຽດນາມ-ລາວ ວ່າເປັນເວທີທີ່ສໍາຄັນ ເພື່ອໃຫ້ການນໍາຂອງສອງລັດຖະບານ, ບັນດາກະຊວງ, ອົງການ ແລະ ກຸ່ມວິສາຫະກິດ ແລກປ່ຽນຍຸດທະສາດການຮ່ວມມື, ແກ້ໄຂຄວາມຫຍຸ້ງຍາກ ແລະ ເປີດກວ້າງບັນດາທິດທາງການລົງທຶນໃໝ່. ໃນທ່າມກາງບັນຍາກາດທີ່ສອງປະເທດ ຄົບຮອບບັນດາຂີດໝາຍໃຫຍ່ - 50 ປີ ວັນຊາດລາວ, 80 ປີ ວັນຊາດຫວຽດນາມ ແລະ ກອງປະຊຸມໃຫຍ່ຜູ້ແທນທົ່ວປະເທດຂອງແຕ່ລະປະເທດ - ກອງປະຊຸມສ້າງພື້ນຖານທີ່ເອື້ອຍອໍານວຍຄວາມສະດວກ ເພື່ອສົ່ງເສີມການຮ່ວມມືຮອບດ້ານ, ພິເສດແມ່ນໃນຂົງເຂດອຸດສາຫະກໍາເຄມີ ແລະ ຂຸດຄົ້ນແຮ່ທາດ.
Vinachem- ຄວາມອາດສາມາດການຜະລິດຂະໜາດໃຫຍ່ ແລະ ໂອກາດການຮ່ວມມືທີ່ກວ້າງຂວາງໃນລາວ:
ຢັ້ງຢືນຖານະບົດບາດຂອງ Vinachem ໃນການພັດທະນາອຸດສາຫະກໍາພື້ນຖານ, ທ່ານ ຟຸ້ງກວາງຫຽບ ໄດ້ໃຫ້ຮູ້ວ່າ ກຸ່ມບໍລິສັດ ໄດ້ສະໜອງຝຸ່ນ ໃນແຕ່ລະປີ ຫຼາຍກວ່າ 10 ລ້ານໂຕນ, ຢາງລົດ 7 ລ້ານເສັ້ນ, ທາດເຄມີ-ສານຊັກລ້າງ 1 ລ້ານໂຕນ; ພ້ອມດຽວກັນ, ກໍເປັນຜູ້ຜະລິດແບັດເຕີລີ - ໝໍ້ໄຟ ລາຍໃຫຍ່ໃນຫວຽດນາມ ດ້ວຍລາຍຮັບຂອງວິສາຫະກິດ ທີ່ບຸນລຸ 2.5 ຕື້ໂດລາ ແລະ ເປັນຕະຫຼາດສົ່ງອອກ ໄປຫຼາຍກວ່າ 70 ປະເທດ. ລາວ ກໍຖືກຕີລາຄາເປັນຕະຫຼາດທີ່ອຸດົມສົມບູນດ້ານທ່າແຮງບົ່ມຊ້ອນ, ມີຄວາມຕ້ອງການສູງ ດ້ານຝຸ່ນ, ຢາງລົດ, ແບັດເຕີລີ, ໝໍ້ໄຟ.... ແມ່ນບັນດາຂົງເຂດທີ່ Vinachem ມີທ່າແຮງ. ຊຸມປີຜ່ານມາ, ວົງເງິນການຄ້າ ລະຫວ່າງ Vinachem ແລະ ບັນດາວິສາຫະກິດລາວ ບັນລຸປະມານ 70 ລ້ານໂດລາ/ປີ, ຮອງຮັບທ່າອ່ຽງການເຕີບໂຕທີ່ຕັ້ງໜ້າ ແລະ ໝັ້ນຄົງໃນໄລຍະທີ່ຈະມາເຖິງ.
ໂຄງການເກືອກາລີ ຢູ່ແຂວງຄໍາມ່ວນ - ຈຸດເນັ້ນໃນການປະກອບຄໍາເຫັນຂອງ ປະທານສະພາສະມາຊິກ ກຸ່ມບໍລິສັດເຄມີຫວຽດນາມ:
ໃນການປະກອບຄໍາເຫັນ ປະທານ Vinachem ໄດ້ໃຊ້ເວລາຫຼາຍ ໃນການລາຍງານຄວາມຄືບໜ້າຂອງໂຄງການຂຸດຄົ້ນ ແລະ ປຸງແຕ່ງເກືອກາລີ ຢູ່ແຂວງຄໍາມ່ວນ - ໂຄງການທີ່ເປັນຈຸດສໍາຄັນພິເສດຂອງກຸ່ມບໍລິສັດ ແລະ ມີຄວາມໝາຍຍຸດທະສາດ ຕໍ່ຄວາມໝັ້ນຄົງດ້ານແຫຼ່ງສະໜອງ ຂອງຂະແໜງຝຸ່ນຫວຽດນາມ. ທ່ານໄດ້ສະແດງຄວາມຂອບໃຈຢ່າງສຸດຊຶ້ງ ຕໍ່ການນໍາຂອງສອງລັດຖະບານ, ບັນດາກະຊວງ, ອົງການ ທີ່ໄດ້ສ້າງເງື່ອນໄຂ ເພື່ອໃຫ້ Vinachem ໃນແຕ່ລະບາດກ້າວ ແກ້ໄຂຂໍ້ຫຍຸ້ງຍາກ, ຍູ້ແຮງລະດັບຄວາມຄືບໜ້າຂອງໂຄງການ. ໄລຍະຜ່ານມາ, ກຸ່ມບໍລິສັດ ໄດ້ສົ່ງຄະນະເຮັດວຽກຫຼາຍຊຸດ ມາເຮັດວຽກໂດຍກົງກັບການນໍາຂອງລັດຖະບານ, ກະຊວງອຸດສາຫະກໍາ ແລະ ການຄ້າ, ແຂວງຄໍາມ່ວນ, ຄະນະກໍາມະການຮ່ວມມື ລາວ-ຫວຽດນາມ, ກົມທໍລະນີ ແລະ ແຮ່ທາດ, ກົມສິ່ງແວດລ້ອມ ແລະ ອົງການທີ່ກ່ຽວຂ້ອງ ແນໃສ່ຍູ້ແຮງການປະສານສົມທົບ ແລະ ແກ້ໄຂບັນດາບັນຫາທີ່ເກີດຂຶ້ນຢູ່ພື້ນທີ່.
ມາຮອດປັດຈຸບັນ, ໂຄງການໄດ້ຮັບການຕິດຕາມບັນດາຂີດໝາຍການຈັດຕັ້ງຜັນຂະຫຍາຍທີ່ສໍາຄັນ. ອຸປະກອນ ແລະ ກົນຈັກທັງໝົດ ຈາກຫວຽດນາມ ແລະ ໄທ ໄດ້ຖືກຂົນສົ່ງມາເຖິງສະຖານທີ່ກໍ່ສ້າງ; ບົດລາຍງານການສຶກສາຄວາມເປັນໄປໄດ້ (FS)ປັບປຸງສໍາເລັດໄວຂຶ້ນ ປະມານ 1.5 ເດືອນ ດ້ວຍການສະຫຼຸບຄວາມເປັນໄປໄດ້ດ້ານເຕັກນິກ ແລະ ປະສິດທິຜົນຂອງເສດຖະກິດ-ສັງຄົມ; ເອກະສານບົດລາຍງານ FS ປັບປຸງສໍາເລັດ ໄດ້ຖືກຍືນເຂົ້າພິຈາລະນາປະເມີນຜົນ; ບັນດາຫົວໜ່ວຍສືບສວນ ແລະ ການເຮັດບົດປະເມີນຜົນກະທົບສິ່ງແວດລ້ອມ ໄດ້ມີຄວາມເປັນເອກະພາບ. ກຸ່ມບໍລິສັດ ກໍຍັງໄດ້ເຮັດວຽກກັບບັນດາອົງການສິນເຊື່ອ ເພື່ອຈັດສັນແຫຼ່ງທຶນ, ຈັດກອງປະຊຸມສໍາມະນາວິທະຍາສາດ ຮັບເອົາຄໍາຄິດເຫັນຂອງຊ່ຽວຊານ ແລະ ເປັນເຈົ້າການກະກຽມເອກະສານແຈ້ງເຊີນປະມູນ ການອອກແບບ FEED, ສັນຍາ EPC ພ້ອມກັບບັນດາເງື່ອນໄຂດ້ານພື້ນຖານວັດຖຸ ແນໃສ່ຄວາມພ້ອມໃນການກ້າວເຂົ້າສູ່ໄລຍະດຳເນີນງານ. Vinachem ກໍາລັງສຶກສາຮູບແບບນິຄົມກະເສດອຸດສາຫະກໍາ ຫຼື ເຂດເຕັກໂນໂລຊີສູງ ເພື່ອຕອບສະໜອງນະໂຍບາຍທີ່ເປັນບຸລິມະສິດຂອງລາວ, ເປີດກວ້າງໂອກາດກາຍເປັນລະບົບຕ່ອງໂສ້ມູນຄ່າໃໝ່ ແລະ ສອດຄ່ອງກັບທິດທາງການພັດທະນາອຸດສາຫະກໍາຂອງປະເທດເພື່ອນ.
 |
ຄວາມໝາຍຍຸດທະສາດ ແລະ ການຕັດສິນໃຈຂອງ Vinachem ໃນການຈັດຕັ້ງຜັນຂະຫຍາຍໂຄງການ:
ທ່ານ ຟຸ້ງກວາງຫຽບ ກ່າວວ່າ: ແຕ່ລະປີ, ຫວຽດນາມ ຕ້ອງການນໍາເຂົ້າເກືອກາລີ ເກືອບ 1 ລ້ານໂຕ; ໃນນັ້ນ, ປະມານ 350,000 ໂຕນແມ່ນມາຈາກລາວ; ສະເພາະ Vinachemນໍາເຂົ້າ ປະມານ 190,000 ໂຕນ. ດັ່ງນັ້ນ, ການຈັດຜັນຂະຫຍາຍໂຄງການເກືອກາລີ ໃຫ້ສໍາເລັດ ແມ່ນມີຄວາມໝາຍສໍາຄັນພິເສດ ຕໍ່ຄວາມເປັນເຈົ້າການໃນການສະໜອງ, ຮັບປະກັນການພັດທະນາທີ່ໝັ້ນຄົງ ແລະ ເປັນກໍາລັງຂັບເຄື່ອນໃຫ້ກຸ່ມບໍລິສັດ ເຕີບໂຕໃນລະດັບ 2 ໂຕເລກ ໃນປີ 2026 – 2030. ນອກຈາກນີ້ກໍ, ເປັນໂຄງການທີ່ປະກອບສ່ວນ ເຮັດໃຫ້ສາຍພົວພັນມິດຕະພາບ, ການຮ່ວມມືພິເສດ ຫວຽດນາມ-ລາວ ເລິກເຊິ່ງຍິ່ງຂຶ້ນ.
ປະທານ Vinachem ຢັ້ງຢືນວ່າ ການສໍາເລັດຕາມລະດັບຄວາມຄືບໜ້າຂອງໂຄງການ ບໍ່ເກືອກາລີ ແມ່ນໜຶ່ງໃນບັນດາໜ້າທີ່ການເມືອງ ທີ່ເປັນຈຸດສຸມຂອງກຸ່ມບໍລິສັດ ທັງເປັນຄວາມຮັບຜິດຊອບ, ທັງເປັນກຽດຕິຍົດ. ທ່ານ ໄດ້ເຊື່ອມຊຶມເອົາຈິດໃຈຊີ້ນໍາຂອງ ທ່ານ ຟ້າມມິ່ງຈິງ ນາຍົກລັດຖະມົນຕີ ທີ່ວ່າ: “ບໍ່ເວົ້າວ່າບໍ່ເຮັດ, ບໍ່ເວົ້າວ່າຍາກ, ບໍ່ເວົ້າວ່າຈະເຮັດ ແຕ່ບໍ່ເຮັດ; ເວົ້າແລ້ວຕ້ອງເຮັດ, ບໍ່ຕ້ອງຖອຍຫຼັງ” ຖືນີ້ເປັນທິດທໍາແຫ່ງການກະທໍາບຸກທະລຸ ໃນການຈັດຕັ້ງຜັນຂະຫຍາຍໂຄງການ.
ຂໍ້ສະເໜີສົ່ງເສີມການຮ່ວມມືການລົງທຶນ ແລະ ປະສິດທິຜົນທີ່ດີທີ່ສູດຂອງໂຄງການເກືອກາລີ:
ໃນກອງປະຊຸມ,Vinachem ໄດ້ສະເໜີໃຫ້ລັດຖະບານສອງປະເທດ ສືບຕໍ່ເອົາໃຈໃສ່ສະໜັບສະໜູນ, ເລັ່ງການພິຈາລະນາ ແລະ ອະນຸມັດຜ່ານບົດລາຍງານ FS; ສ້າງເງື່ອນໄຂທີ່ອະນຸຍາດໃຫ້ມີການດໍາເນີນງານດ້ານໂຄງສ້າງພື້ນຖານບາງສ່ວນລ່ວງໜ້າ ເມື່ອ FS ໄດ້ຮັບການອະນຸມັດຜ່ານ;ພິຈາລະນາການນໍາໃຊ້ກົນໄກບຸລິມະສິດພິເສດດ້ານອາກອນລາຍໄດ້ວິສາຫະກິດ, ອາກອນຊັບພະຍາກອນ, ອາກອນສົ່ງອອກ; ພ້ອມດຽວກັນ, ກໍສະໜັບສະໜູນວຽກງານຂອງ Vinachem ແລະ ບັນດານັກລົງທຶນຫວຽດນາມ ພ້ອມກັນປະສານສົມທົບພັດທະນາໃນເນື້ອທີ່ຫຼາຍກວ່າ 90 km2ແນໃສ່ການກໍ່ຮ່າງສ້າງຕົວເປັນຮູບແບບກຸ່ມອຸດສາຫະກໍາ ຕາມກົດໝາຍວ່າດ້ວຍການສົ່ງເສີມການລົງທຶນຂອງລາວ.
ສະຫຼຸບການປະກອບຄໍາເຫັນ, ທ່ານ ຟຸ້ງກວາງຫຽບ ເນັ້ນໜັກວ່າ Vinachem ຈະສືບຕໍ່ເສີມຂະຫຍາຍຄວາມຕັດສິນໃຈສູງສຸດ, ປະສານສົມທົບຢ່າງແໜ້ນແຟ້ນ ກັບບັນດາອົງການກ່ຽວຂ້ອງຂອງສອງປະເທດ, ແນໃສ່ຈັດຕັ້ງຜັນຂະຫຍາຍໂຄງການ ຖືກຕ້ອງກັບລະດັບຄວາມຄືບໜ້າ ແລະ ປະກອບສ່ວນຢ່າງແທດເໝາະກັບສະພາບຕົວຈິງ ເຂົ້າໃນການພັດທະນາເສດຖະກິດ-ສັງຄົມ, ປັບປຸງເພີ່ມຕື່ມອີກ ສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີພິເສດ ຫວຽດນາມ-ລາວ.
(ບົດ-ພາບ: Vinachem)
ຄໍາເຫັນ