ກຸ່ມບໍລິສັດ ຕັງຈະເລີນ ມອບເງິນ-ເຄື່ອງຊ່ວຍເຫຼືອໃຫ້ແຂວງຈຳປາສັກ

ກຸ່ມບໍລິສັດ ຕັງຈະເລີນ ຈຳກັດມອບເງິນສົດ, ວັດສະດຸ ແລະ ເຄື່ອງບໍລິໂພກ ລວມມູນຄ່າ 500 ລ້ານກີບ ໃຫ້ແຂວງຈຳປາສັກ, ປະກອບສ່ວນ ໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ.
ພິທີມອບ-ຮັບນີ້ ໄດ້ຈັດຂຶ້ນ ໃນວັນທີ 18 ມັງກອນ ນີ້ທີ່ຫ້ອງວ່າການແຂວງ, ກ່າວມອບໂດຍ ທ່ານ ນາງ ເພັດສະໄໝ ແສງອາລຸນ ຮອງປະທານກຸ່ມບໍລິສັດ ຕັງຈະເລີນ ຈໍາກັດ ແລະ ກ່າວຮັບໂດຍ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກປະທານຄະນະກຳມະການປ້ອງກັນຊາດ-ປ້ອງກັນຄວາມສະຫງົບແຂວງ ຈຳປາສັກ, ມີ ພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ. 
ໂອກາດນີ້, ທ່ານເຈົ້າແຂວງຈຳປາສັກ ໄດ້ສະແດງຄວາມຂອບໃຈ ແລະ ຊົມເຊີຍ ມາຍັງຄະນະນຳຂອງກຸ່ມບໍລິສັດ ຕັງຈະເລີນ ຈໍາກັດ, ຜ່ານມາໄດ້ປະກອບສ່ວນຢ່າງຫຼວງຫຼາຍ ເຂົ້າໃນການພັດທະນາເສດຖະກິດ-ສັງຄົມ ຂອງແຂວງ ເປັນຕົ້ນ ໃນໄລຍະການແຜ່ລະບາດຂອງພະຍາດໂຄວິດ-19 ກຸ່ມບໍລິສັດ ຕັງຈະເລີນ ໄດ້ປະກອບສ່ວນ ເປັນວັດຖຸ ແລະ ເງິນສົດ ເຂົ້າໃນ ວຽກງານດັ່ງກ່າວ ແລະ ໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ, ກຸ່ມບໍລິສັດ ຕັງຈະເລີນ ຈໍາກັດ ໄດ້ມອບ ເງິນຈຳນວນ 200 ລ້ານກີບແລະ ວັດສະດຸ - ເຄື່ອງບໍລິໂພກ ມູນຄ່າ 300 ລ້ານກີບ ລວມເປັນ ມູນຄ່າ 500 ລ້ານກີບ, ອົງການປົກຄອງແຂວງຈຳປາສັກ ຈະນຳໃຊ້ເຂົ້າໃນກິດຈະກຳການອວຍພອນ, ເພື່ອເປັນກຳລັງໃຈໃຫ້ກຳລັງ ນາຍ ແລະ ພົນທະຫານ ລວມທັງປັບປຸງໂຄງລ່າງພື້ນຖານ ຢູ່ຈຸດຫ່າງໄກສອກຫຼີກ, ຄຽງຄູ່ກັບການພັດທະນາກໍາລັງໃຫ້ມີຄວາມເຂັ້ມແຂງ, ທັນສະໄໝ, ສຸມໃສ່ຮັກສາຄວາມເປັນລະບຽບຮຽບຮ້ອຍຂອງສັງຄົມ ບໍລິເວນຊາຍແດນ ແລະ ວຽກງານອື່ນໆ. ທັງເປັນການປະກອບສ່ວນ ເຂົ້າໃນການສະເຫຼີມສະຫຼອງ ໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ອີກດ້ວຍ.
ຂ່າວ-ພາບ: ທັດຊະນະ