ທ່ານ ສຸນີ ນາມມະບົວລີ ວ່າການຫົວໜ້າພະແນກສຶກສາທິການ ແລະ ກິລາແຂວງກ່າວວ່າ: ລັດເຮົາໄດ້ມີການຜັນຂະຫຍາຍລັດຖະທໍາມະນູນສະບັບປີ 2015 ເປັນກົດໝາຍໃນຂົງເຂດຕ່າງໆຈໍານວນ 139 ສະບັບ, ຂົງ ເຂດເສດຖະກິດ 61 ສະບັບ, ຂົງເຂດວັດທະນະທໍາ-ສັງຄົມ 36 ສະບັບ, ຂົງເຂດການປົກຄອງ ແລະ ຍຸຕິທຳ 28 ສະບັບ, ຂົງເຂດປ້ອງກັນຊາດ-ປ້ອງກັນຄວາມສະຫງົບ 9 ສະບັບ ແລະ ຂົງເຂດຕ່າງປະທດ 5 ສະບັບ ບັນດາກົດໝາຍເຫຼົ່ານັ້ນໄດ້ກາຍເປັນເຄື່ອງມືໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍໃຫ້ນັບມື້ເປັນລະບົບຄົບຊຸດຂຶ້ນເທື່ອລະກ້າວ, ເປັນຫຼັກຄໍ້າປະກັນໃຫ້ແກ່ການປະຕິບັດ ແລະ ເສີມຂະຫຍາຍສິດເປັນເຈົ້າປະເທດຊາດຂອງປະຊາຊົນລາວບັນດາເຜົ່າ ແລະ ເປັນພື້ນຖານນິຕິກໍາຄໍ້າປະກັນ ການກໍາອໍານາດຂອງພັກເຮົາ, ບັນດາກະຊວງ, ອົງການຂັ້ນສູນກາງ ແລະ ອົງການອໍານາດລັດຂັ້ນທ້ອງຖິ່ນ ໄດ້ເອົາໃຈໃສ່ໂຄສະນາເຜີຍແຜ່ ແລະ ສ້າງຂະບວນການກ່ຽວກັບວັນລັດຖະທໍາມະນູນຢ່າງກວ້າງຂວາງ ດ້ວຍຫຼາຍຮູບຫຼາຍແບບ ໂດຍສະເພາະໄດ້ຈັດຕັ້ງພິທີສະເຫຼີມສະຫຼອງວັນປະກາດໃຊ້ລັດຖະທໍາມະນູນ, ຈັດປາຖະກະຖາຢູ່ບັນດາກະຊວງ, ອົງການ, ທ້ອງຖິ່ນ, ສະຖາບັນການສຶກສາ, ໂຮງຈັກໂຮງງານ ແລະ ໄດ້ເອົາລັດຖະທໍາມະນູນເຂົ້າເປັນຫຼັກສູດການສຶກສາຂັ້ນຕ່າງໆ ເພື່ອສ້າງຄວາມຮັບຮູ້ເຂົ້າໃຈ ແລະ ຍົກສູງສະຕິເຄົາລົບລັດຖະທໍາມະນູນ ແລະ ກົດໝາຍໃນທົ່ວສັງຄົມໃຫ້ນັບມື້ສູງຂຶ້ນ, ເອົາໃຈໃສ່ປັບປຸງພາລະບົດບາດຂອງອົງການນິຕິບັນຍັດ, ອົງການບໍລິຫານລັດ, ສານປະຊາຊົນໃນແຕ່ລະໄລຍະ ເຮັດໃຫ້ອົງການດັ່ງກ່າວສາມາດເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນ ຕາມທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ, ການບໍລິຫານຄຸ້ມຄອງລັດດ້ວຍກົດໝາຍ ໄດ້ມີບາດກ້າວດີຂຶ້ນຢ່າງຕໍ່ເນື່ອງ ສາມາດປົກປ້ອງສິດຜົນປະໂຫຍດຂອງລັດ ລວມໝູ່ ແລະ ຂອງປະຊາຊົນບັນດາເຜົ່າໄດ້ເປັນຢ່າງດີ.
ຈາກນັ້ນ, ຜູ້ເຂົ້າຮ່ວມກອງປະຊຸມໄດ້ປະກອບຄຳຄິດຄຳເຫັນ ເພື່ອພ້ອມກັນປັບປຸງບາງເນື້ອໃນໃຫ້ສອດ ຄ່ອງກັບໜ້າທີ່ການເມືອງຂອງພັກ ແລະ ລັດໃນໄລຍະໃໝ່ໃຫ້ມີເນື້ອໃນຮັດກຸມ, ຄົບຖ້ວນສົມບູນຂຶ້ນຕື່ມ.
ຂ່າວ: ທິດລານີ ໂຄດໂຍທາ
ຄໍາເຫັນ