ກປ ສາລະວັນ ເຜີຍແຜ່ນິຕິກຳຄຸ້ມຄອງໂຮງງານປຸງແຕ່ງພືດໃຫ້ຜູ້ປະກອບການ

ພະແນກກະສິກຳ ແລະ ປ່າໄມ້ (ກປ)ແຂວງສາລະວັນ ເຜີຍແຜ່ນິຕິກຳ ວຽກງານຄຸ້ມຄອງໂຮງງານປຸງແຕ່ງພືດ ແລະ ນິຕິກຳທີ່ກ່ຽວຂ້ອງ ກັບວຽກງານລ້ຽງສັດ ແລະ ການປະມົງ ໃຫ້ແກ່ຜູ້ປະກອບການ ພະແນກການທີ່ກ່ຽວຂ້ອງ ອ້ອມຂ້າງແຂວງ ແລະ ເມືອງ ໃນວັນທີ 14 ທັນວາ ນີ້ ທີ່ຫ້ອງປະຊຸມຂອງຕົນ ໂດຍການເປັນປະທານຂອງທ່ານ ອະນຸສັກ ຈໍາປາຄໍາ  ຫົວໜ້າພະແນກກະສິກຳ ແລະ ປ່າໄມ້ແຂວງສາລະວັນ ມີຫົວໜ້າ, ຮອງພະແນກການອອມຂ້າງ, ທ່ານເຈົ້າເມືອງ,ຮອງເຈົ້າເມືອງ ແລະ ຫົວໜ້າຫ້ອງການກະສິກຳ ແລະ ປ່າໄມ້ ຈາກ 8 ເມືອງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ໃນໂອກາດນີ້, ທ່ານ ອະນຸສັກຈໍາປາຄໍາ ກໍໄດ້ໃຫ້ຮູ້ວ່າ: ການຈັດກອງປະຊຸມໃນຄັ້ງນີ້ ຜູ້ເຂົ້າຮ່ວມຈະໄດ້ຮັບຟັງການເຜີຍແຜ່ ຂໍ້ຕົກລົງຂອງລັດຖະມົນຕີ ກະຊວງກະສິກຳ ແລະ ປ່າໄມ້ ວ່າດ້ວຍການຄຸ້ມຄອງການປຸງແຕ່ງພືດ ເລກທີ 3736/ກປ ລົງວັນທີ 19 ສິງຫາ  2022 ແລະ ຮັບຟັງການຜ່ານຄໍາສັ່ງ ແລະ ແຜນການຈັດຕັ້ງປະຕິບັດຄໍາສັ່ງ ຂອງລັດຖະມົນຕີກະຊວງກະສິກຳ  ແລະ ປ່າໄມ້  ວ່າດ້ວຍການເພີ່ມທະວີຄວາມເຂັ້ມງວດ  ໃນການຄຸ້ມຄອງການເກັບຊື້  ການປຸງແຕ່ງ ແລະ ການສົ່ງອອກມັນຕົ້ນ ສະບັບເລກທີ 4848/ກປ ລົງວັນທີ 1 ທັນວາ 2023 ເພື່ອເປັນການຊຸກຍູ້ສົ່ງເສີມຜູ້ປະກອບການ ກໍຄືປະຊາຊົນຜູ້ເຮັດການຜະລິດ ນໍາເອົານິຕິກຳຕ່າງໆໄປຈັດຕັ້ງປະຕິບັດໃຫ້ຖືກຕ້ອງ ແລະ ສອດຄ່ອງຕາມລະບຽບກົດໝາຍກຳນົດໄວ້; ສໍາລັບຂໍ້ຕົກລົງຂອງຂອງລັດຖະມົນຕີ ກະຊວງກະສິກຳ ແລະ ປ່າໄມ້ ເລກທີ 3736 ວ່າດ້ວຍການຄຸ້ມຄອງການປຸງແຕ່ງພືດປະກອບມີ  9  ໝວດ 60 ມາດຕາ ຊຶ່ງໄດ້ດຳນົດຫຼັກການ,ລະບຽບການ ແລະ ມາດຕະການ ກ່ຽວກັບການສ້າງຕັ້ງ, ການດຳເນີນກິດຈະການການຄຸ້ມຄອງ, ຕິດຕາມ ແລະ ກວດກາໂຮງງານປຸງແຕ່ງພືດ ເພື່ອໃຫ້ຖືກຕ້ອງຕາມມາດຕະຖານເຕັກນິກໂຮງງານ,ມາດຕະຖານຫຼັກການຜະລິດທີ່ດີ ຈາກນັ້ນຜູ້ເຂົ້າຮ່ວມກໍໄດ້ພ້ອມກັນປຶກສາຫາລື ແລກປ່ຽນປະກອບຄໍາຄິດຄໍາເຫັນຕໍ່ກອງປະຊຸມຕື່ມອີກ. 
(ຂ່າວ-ພາບ: ທິດລານີ ໂຄດໂຍທາ)