ກຕທ ຍາດແຍ່ງການຊ່ວຍເຫຼືອຈາກວົງຄະນາຍາດສາກົນນັບມື້ເພີ່ມຂຶ້ນ

ກະຊວງການຕ່າງປະເທດໄດ້ເດັດດ່ຽວຢຶດໝັ້ນແນວທາງການຕ່າງປະເທດຂອງພັກໃນແຕ່ລະໄລຍະບົນຫຼັກການ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື, ພ້ອມທັງ ສົມທົບກໍາລັງແຮງຂອງຊາດ ກັບ ກໍາລັງແຮງຍຸກສະໄໝ, ມີຄວາມເປັນເຈົ້າການ ແລະ ມີຄວາມຕັ້ງໜ້າໃນການເຊື່ອມໂຍງສາກົນຢ່າງຮອບດ້ານ, ກວ້າງຂວາງ ແລະ ເລິກເຊິ່ງ, ອັນໄດ້ເຮັດໃຫ້ເພື່ອນມິດ ຂອງ ສປປ ລາວ ໄດ້ນັບມື້ນັບເພີ່ມຂຶ້ນ, ສາມາດຍາດແຍ່ງເອົາການສະໜັບສະໜູນ ແລະ ຄວາມເຫັນອົກເຫັນໃຈ, ພ້ອມທັງການຊ່ວຍເຫຼືອຈາກວົງຄະນາຍາດສາກົນ ກໍໄດ້ນັບມື້ນັບເພີ່ມຂຶ້ນເຊັ່ນກັນຊຶ່ງສະແດງອອກມາຮອດປັດຈຸບັນນີ້, ສປປ ລາວ ໄດ້ສ້າງຕັ້ງສາຍພົວພັນການທູດ ກັບ 151 ປະເທດ ແລະ ມີການພົວພັນກັບ 140 ພັກ ຈາກ 83 ປະເທດໃນໂລກ; ມີສໍານັກງານຕາງໜ້າການທູດ ຢູ່ຕ່າງປະເທດ 41 ແຫ່ງ, ໃນນີ້ ມີສະຖານເອກອັກຄະລັດຖະທູດ 28 ແຫ່ງ, ສໍານັກງານຜູ້ຕາງໜ້າຖາວອນ 3 ແຫ່ງ, ສະຖານກົງສູນໃຫຍ່ 10 ແຫ່ງ ແລະ ຫ້ອງການກົງສູນ 1 ແຫ່ງ; ມີກົງສູນກິດຕິມະສັກຂອງ ສປປ ລາວ ຢູ່ຕ່າງປະເທດ 23 ແຫ່ງ, ກົງສູນກິດຕິມະສັກຂອງຕ່າງປະເທດຢູ່ ສປປ ລາວ 18 ແຫ່ງ,ຂະແໜງການຕ່າງປະເທດກໍໄດ້ປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມແຫ່ງຊາດຊຶ່ງປະກອບ ສ່ວນເຮັດໃຫ້ເສດຖະກິດຂອງລາວໄລຍະຜ່ານມາ ໄດ້ຂະຫຍາຍຕົວຢ່າງໝັ້ນທ່ຽງ, ລາຍໄດ້ສະເລ່ຍຂອງປະຊາຊົນເພີ່ມຂຶ້ນ, ອັດຕາຄວາມທຸກຍາກຂອງປະຊາຊົນຫຼຸດລົງ ແລະ ອື່ນໆຊຶ່ງສິ່ງເຫຼົ່ານີ້ ກໍຍ້ອນມາຈາກການກໍານົດແນວທາງນະໂຍບາຍອັນຖືກຕ້ອງຂອງພັກ-ລັດ ຈຶ່ງສາມາດເຮັດໃຫ້ພວກເຮົາ ສາມາດຍາດແຍ່ງເອົາການສະໜັບສະໜູນ ແລະ ຊ່ວຍເຫຼືອຈາກປະຊາຄົມໂລກ,ການຍາດແຍ່ງການສະໜັບສະໜູນ, ການຊ່ວຍເຫຼືອ ແລະ ຄວາມເຫັນອົກເຫັນໃຈຈາກປະຊາຄົມໂລກ ຈຶ່ງມີຄວາມສໍາຄັນເປັນຢ່າງຍິ່ງ ເພື່ອປະກອບສ່ວນເຂົ້າໃນການຈັດຕັ້ງປະຕິບັດ 2 ໜ້າທີ່ຍຸດທະສາດຂອງຊາດ.

ທ່ານກ່າວຕື່ມວ່າ:ທິດທາງແຜນການເຄື່ອນໄຫວການຕ່າງປະເທດໃນຕໍ່ໜ້າ,ສືບຕໍ່ຈັດຕັ້ງຜັນຂະ ຫຍາຍທິດທາງ ແລະ ແນວທາງການຕ່າງປະເທດຂອງມະຕິກອງປະຊຸມໃຫຍ່ຂອງພັກໃນການຈັດຕັ້ງປະຕິບັດແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍຂອງພັກ, ຕັ້ງໜ້າປະຕິບັດຄໍາຂວັນ “ການທູດປ້ອງກັນເຫດ ແລະ ບຸກທະລຸ ເພື່ອປົກປັກຮັກສາ ແລະ ພັດທະນາປະເທດຊາດ”, ແນໃສ່ນໍາອົາຜົນປະໂຫຍດສູງສຸດມາສູ່ປະເທດຊາດ,ສືບຕໍ່ສ້າງສະພາບແວດລ້ອມພາຍນອກທີ່ເອື້ອອຳນວຍ, ເປັນເຈົ້າການຍາດແຍ່ງກາລະໂອກາດ ຄຽງຄູ່ກັບການຈຳກັດຜົນກະທົບຈາກສະພາບພາຍນອກ, ສາມາດປົກປັກຮັກສາໝາກຜົນຂອງການປະຕິວັດ,ປົກປ້ອງຜົນປະໂຫຍດແຫ່ງຊາດຂອງ ສປປ ລາວ ຢູ່ໃນເວທີສາກົນ ແລະ ຂົນຂວາຍຍາດແຍ່ງຜົນປະໂຫຍດທາງດ້ານເສດຖະກິດ ມາໃຫ້ປະເທດຊາດນັບມື້ນັບຫຼາຍຂຶ້ນ, ໂດຍສະເພາະແມ່ນການເຄື່ອນໄຫວວຽກງານການຕ່າງປະເທດ ຕ້ອງຕິດພັນກັບການທູດເສດຖະກິດ ເພື່ອຮັບໃຊ້ການພັດທະນາເສດຖະກິດ-ສັງຄົມຂອງປະເທດ,ຫັນການພົວພັນຮ່ວມມືກັບເປົ້າໝາຍຕ່າງໆເຂົ້າສູ່ລວງເລິກ ແລະ ມີປະສິດທິຜົນ, ເສີມສ້າງສາຍພົວພັນກັບບັນດາປະເທດເພື່ອນມິດຍຸດທະສາດຮ່ວມອຸດົມການສັງຄົມນິຍົມ ເປັນບຸລິມະສິດສຳຄັນ ໂດຍສະເພາະແມ່ນເຮັດໃຫ້ການພົວພັນແບບພິເສດ ລາວ-ຫວຽດນາມ ແລະ ການພົວພັນຄູ່ຮ່ວມຊາຕາກຳລາວ-ຈີນ ໃຫ້ມີຄຸນນະພາບອັນໃໝ່ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ, ມີໝາກຜົນກັບປະເທດເພື່ອນບ້ານ ເພີ່ມທະວີການເຄື່ອນໄຫວໃນຂອບອາຊຽນ; ເສີມຂະຫຍາຍການພົວພັນຮ່ວມມືກັບບັນດາປະເທດໃຫຍ່ຢ່າງໝັ້ນທ່ຽງ; ເປີດກວ້າງການພົວພັນຮ່ວມມືກັບປະເທດຕ່າງໆຕາມຈັງຫວະທີ່ເໝາະສົມ, ແກ້ໄຂການພົວພັນກັບປະເທດຕ່າງໆຢ່າງຄ່ອງແຄ້ວ ແລະ ຮັບປະກັນຜົນປະໂຫຍດແຫ່ງຊາດຂອງພວກເຮົາເສີມຂະຫຍາຍການເຄື່ອນໄຫວການທູດຢ່າງຮອບດ້ານ, ໂດຍສົມທົບລະຫວ່າງການເຄື່ອນໄຫວການທູດທາງການຂອງລັດ ກັບການເຄື່ອນໄຫວການທູດສາຍພັກ, ການທູດລັດຖະສະພາ ແລະ ການທູດປະຊາຊົນ; ລະຫວ່າງການທູດການເມືອງກັບການທູດເສດຖະກິດ ແລະ ການທູດວັດທະນະທຳ ແລະ ປະສານສົມທົບລະຫວ່າງວຽກງານຕ່າງປະເທດກັບປ້ອງກັນຊາດ-ປ້ອງກັນຄວາມສະຫງົບຢ່າງແໜ້ນແຟ້ນ ເກື້ອກູນ ຊຶ່ງກັນ ແລະ ກັນ,ເພີ່ມທະວີການປະສານສົມທົບ ລະຫວ່າງ ພາກສ່ວນກ່ຽວຂ້ອງໃນການເຄື່ອນໄຫວຕໍ່ສູ້ການເມືອງ, ທັບມ້າງກົນອຸບາຍມ້າງເພທຳລາຍ, ການຫັນປ່ຽນໂດຍສັນຕິຂອງສັດຕູ, ເພີ່ມທະວີການຄຸ້ມຄອງການນໍາໃຊ້ສື່ສັງຄົມອອນລາຍ,ຕິດພັນກັບການຕອບໂຕ້ການໂຄສະນາບິດເບືອນໃສ່ຮ້າຍປ້າຍສີຂອງກຸ່ມຄົນບໍ່ຫວັງດີ, ອະທິບາຍຊີ້ແຈງຕໍ່ສາກົນຢ່າງທັນການ ແລະ ຢູ່ໃນທ່າບຸກ. ເຜີຍແຜ່ແນວທາງນະໂຍບາຍຂອງພັກ-ລັດ, ຜົນສຳເລັດການເຄື່ອນໄຫວວຽກງານຕ່າງປະເທດ ເພື່ອສ້າງຄວາມເຂົ້າໃຈ ແລະ ການສະໜັບສະໜູນຈາກສັງຄົມ ເພື່ອສ້າງສະພາບເວດລ້ອມອັນດີຢູ່ພາຍໃນ ແລະ ພາຍນອກ.

(ຂ່າວ-ພາບ:ສຳນານ)