ກຊສ ປາຖະກະຖາວັນສ້າງຕັ້ງພັກຄົບຮອບ 69 ປີ

ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ (ກຊສ) ໄດ້ຈັດພິທີ ປາຖະກະຖາວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 69ປີ (22 ມີນາ 1955 -22 ມີນາ 2024) ແລະ ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 78 ປີ (21ມີນາ 1946-21 ມີນາ 2024)ຂຶ້ນໃນວັນທີ 26 ມີນາ ນີ້ເປັນກຽດປາຖະກະຖາໂດຍສະຫາຍ ໄຊນະຄອນອິນທະວົງ ຮອງເລຂາຄະນະພັກຮອງລັດຖະມົນຕີກຊສ, ມີຄະນະປະຈໍາພັກ, ຄະນະພັກແລະພາກສ່ວນກ່ຽວຂ້ອງເຂົ້າຮ່ວມຮັບຟັງ.
ຈຸດປະສົງຂອງ ການປາຖະກະຖາໃນຄັ້ງນີ້ເພື່ອເປັນການທົບທວນມູນເຊື້ອ ແລະ ໄຊຊະນະອັນຍິ່ງໃຫຍ່ຂອງການປະຕິວັດ ພາຍໃຕ້ການນໍາພາຂອງພັກ ພ້ອມທັງລະນຶກເຖິງຄຸນງາມຄວາມດີ ແລະ ນໍ້າໃຈເສຍສະຫຼະ ຂອງບັນດານັກຮົບທີ່ໄດ້ອຸທິດຕົນ ເພື່ອປະເທດຊາດໃນຂະບວນການປະຕິວັດຜ່ານມາ ແລະ ເພື່ອສືບຕໍ່ເສີມຂະຫຍາຍມູນເຊື້ອ, ທາດແທ້ ຂອງພັກເຮົາ ເຂົ້າໃນການຊີ້ນໍາ-ນໍາພາຈັດຕັ້ງປະຕິບັດພາລະກິດປົກປັກຮັກສາແລະສ້າງສາພັດທະນາປະເທດຊາດຕາມທິດສັງຄົມນິຍົມມາໝູນໃຊ້ເຂົ້າໃນການປະຕິບັດໜ້າທີ່ການເມືອງຂອງສະມາຊິກພັກ-ພະນັກງານໃນທົ່ວກະຊວງຊັບພະຍາກອນທຳມະຊາດແລະສິ່ງແວດລ້ອມ ໃຫ້ບັນລຸຕາມຄາດໝາຍທີ່ວາງໄວ້.
ສະຫາຍຮອງເລຂາຄະນະພັກ ກະຊວງໄດ້ຍົກໃຫ້ເຫັນກ່ຽວກັບການກໍາເນີດ, ທາດແທ້ ແລະ ອຸດົມການ ກໍຄືຜົນງານການນໍາພາຂອງພັກປະຊາຊົນປະຕິວັດລາວໃນຕະຫຼອດໄລຍະ 69 ປີຜ່ານມາຊຶ່ງແມ່ນອົງການຈັດຕັ້ງທີ່ເປັນກອງນໍາໜ້າ ແລະ ເປັນຕົວແທນແຫ່ງສິດຜົນປະໂຫຍດ ຂອງຊົນຊັ້ນກໍາມະກອນ, ຊາວຜູ້ອອກແຮງງານລາວບັນດາເຜົ່າ ທີ່ໄດ້ນໍາພາປວງຊົນລາວທັງຊາດ ດໍາເນີນພາລະກິດປ່ຽນແປງໃໝ່, ກໍ່ສ້າງ ແລະ ຂະຫຍາຍລະບອບປະຊາທິປະໄຕປະຊາຊົນ ແລະ ສ້າງປະຖົມປັດໄຈໃຫ້ແກ່ການກ້າວຂຶ້ນສັງຄົມນິຍົມເທື່ອລະກ້າວ. 
ພ້ອມດຽວກັນນັ້ນ, ສະຫາຍຮອງເລຂາພັກຍັງໄດ້ຍົກໃຫ້ຮູ້ກ່ຽວກັບວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ແມ່ນວັນໜຶ່ງທີ່ສຳຄັນ ໃນປະຫວັດສາດຂອງຊາດລາວເຮົາ, ເປັນວັນທີ່ພວກຈັກກະພັດລ່າເມືອງຂຶ້ນໄດ້ສ້າງໂສກນາດຕະກຳໃຫ້ປະຊາຊົນລາວ ກໍຄືປະຊາຊົນຊາວເມືອງທ່າແຂກ ແລະ ພະນັກງານນັກຮົບຂອງພວກເຮົາ. ຍ້ອນແນວນັ້ນ, ໃນໄລຍະຜ່ານມາພວກເຮົາຈຶ່ງພ້ອມກັນລະນຶກເຖິງວັນທີ 21ມີນາ 1946 ເປັນວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ.
ພາຍຫຼັງສໍາເລັດຮັບຟັງປາຖະກະຖາໃນຕອນທ້າຍຂອງພິທີ ກໍໄດ້ມີການມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023 ຈໍານວນ 27 ໜ່ວຍພັກໃນຈໍານວນທັງໝົດ 34 ໜ່ວຍພັກ.
(ຂ່າວ: ກະຊວງຊັບ, ພາບ: ແສງຈັນ)